Hikmat Hoshimov: “Mashg'ulotlarda yoshlar bilan tengma-teng ishlayotganim uchun ham jismoniy tayyorgarligim joyida deb o'ylayman”

Tajribali futbolchiga ko'pchilik Rustam Mirsodiqovning maydondagi yordamchisi deya etirof beradi. Haqiqatdan ham futbolchilik faoliyatii davomida asosan ushbu mutaxassis bilan hamkorlik qilib kelayotgan Hoshimovning Bekobod jamoasida tutgan o'rni katta. Bu yilgi chempionatda “Metallurg” sardori 30ta uchrashuvni almashtirishlarsiz o'tkazgani esa tahsinga loyiqdir. Hikmat Hoshimov bilan suhbatlashganimizda, eng avvalo shu haqda so'radik.

- Hikmat aka, bu yilgi chempionatda 30ta uchrashuvda maydonga tushib, ahamiyatlisi o'yinlarni almashtirishlarsiz o'tkazganingizni ko'rish mumkin. 36 yoshda bo'la turib, bunday natijaga qanday erishmoqdasiz?
-  (Kulib) Bu birinchi marta emas-ku! O'tgan yili ham shunday bo'lgandi. Buning sababi shundaki, mashg'ulotlarda yoshlar bilan qolishmasdan tengma-teng ishlayman. Jismoniy tayyorgarligim shuning uchun meyorida bo'lsa kerak. Rejimga ham qattiq amal qilaman. Busiz bo'lmaydi. Menda shunday odat bor-ki, yoshlarga nasihat qilib, ko'rsatma berishdan oldin o'shani oldin o'zim bajaraman. Mashg'ulotda ham astoydil ter to'kaman. O'z ustingizda ishlamasangiz istaysizmi yo'qmi, maydonga chiqqach baribir qiynalib qolishiz turgan gap.

- Yakuniga etgan mavsum xususida fikringiz qanday?
- “Metallurg” uchun mavsum o'rtacha yakun topdi deyish mumkin. Avvaliga qayd etayotgan natijamiz chakki bo'lmayotgandi. Ammo Toshkentda “Paxtakor”ga qarshi kechgan uchrashuvdan so'nggi turli gap-so'zlar va bosh murabbiyimizning yil oxiriga qadar licenziyasi olib qo'yilgani salbiy tasirini o'tkazmasdan qolmadi. Bu holat futbolchilarni ruhiy jihatdan “sindirib” qo'ydi. Keyinchalik safarda “Qo'qon-1912”ga qarshi uchrashuvda tayyor g'alabani qo'ldan chiqardik. So'ngra o'z maydonimizda “Buxoro”ga imkoniyatni boy berdik. Agarda ushbu o'yinlarda ochko yo'qotganimizda, yanada yuqoriroq o'rinni band etgan bo'lardik. O'zimga keladigan bo'lsak, 30ta uchrashuvni almashtirishlarsiz o'tkazdim. SHunday ekan qanday qilib qoniqish xosil qilmasligim mumkin?!

- Tengdoshlaringizdan ayrimlari bu yil butsalarini mixga ilishga qaror qilmoqda. Xususan Anvar Soliev va Asror Aliqulov. Siz ham bu haqda o'ylab ko'rmadingizmi?
- Yoshingiz ulg'ayib borgach, xohlaysizmi yo'qmi baribir miyangizni ushbu xolat yuzasidan fikrlar chulg'ab oladi. Qachondir futbol o'ynashni bas qilish va keyinchalik murabbiy sifatida faoliyat yuritish borasida men ham ko'p o'ylayman. Ammo bu qachon amalga oshishini yolg'iz Yaratganning o'zi biladi. Quch-quvvatim bor ekan, o'ynashda davom etaman. Nasib qilsa kelasi yil ham maydonda javlon urmoqchiman. Buning uchun hozirdan o'zimni qishki yig'inlarga tayyorlab bormoqdaman.

- O'z vaqtida siz bilan birga “Metallurg”da o'ynagan Odil Isaboev ayni damda yoshlar jamoasini boshqarmoqda. Saidkomil Akbarov bilan Mamur Ikromov esa mavsum avvalida boshqa klublarga o'tib ketishdi. Aytingchi ularsiz bu yil sizga qiyin bo'lmadimi?
- Juda qiynaldim. Bu haqda o'sha futbolchilar bilan uchrashib qolganimizda ham aytib berganman. Ilgari Isaboev, Akbarov, Ikromov, Fayzullo Ahmedov, Ilyos Qurbonov va G'ulom Halimtoev singari o'z tengdoshlarim bilan birga o'ynaganimda, maydonda menga ham engilroq bo'lardi. O'sha paytlari yoshlardan uchta – Doniyor Odilov, Dilmurod Ikromov va Sardor Rasulov bo'lgan. Bu yil “Metallurg”da yoshlar bilan o'zim qoldim. Hozirgi yigitlarni kamsitmoqchi emasman. Ammo ilgari baribir oson bo'lgan. Futbolda o'zi shunaqa. Buni oddiy qabul qilish kerak.   

- Bu yil jamoangiz tarkibida kimni kashfiyot bo'ldi deya olasiz?
- Saidjon Abdujabborovni ko'rsatgan bo'lardim. SHu yigit bir necha yildan buyon yoshlar jamoasida o'ynab kelayotgandi. Nihoyat joriy mavsumdan boshlab asosiy tarkibda barqaror o'ynadi. O'z hisobiga 7ta gol yozdirib qo'ydi. Ko'z tegmasin unga bugungi kunda bir qator klublardan takliflar kelib tushmoqda. Lekin Abdujabborov “Metallurg”da o'ynay boshlaganini va bu erda yana ko'p yillar davomida faoliyat yuritishini aytib, o'zini professionallarga xos tarzda tutmoqda. Jamoamizda bundan tashqari yana ko'plab iqtidorli o'yinlar bor. Nasib qilsa kelgusi mavsumda ham yangi nomlarni uchratasizlar.  

- CHempionat boshida tajribali posbon Mamur Ikromov “Lokomotiv”dan tushgan taklifni qabul qilgach, darvozabonlar muammosi yuzaga kelgandek tuyulgandi. Ammo keyinchalik murabbiylar shtabi Zafar Safoev bilan Suhrob Sultonovga ishonch bildira boshladi. Natijada 24 yoshli Safoev oliy ligada debyut mavsumini o'tkazish bilan bir qatorda, o'zidan ijobiy taassurot qoldirdi. Fikrimizga siz ham qo'shilsangiz kerak?
- Albatta. Safoev iqtidorli darvozabon ekanligini bu yil ko'rsatib qo'ydi. Zafar o'z ustida ishlashni istaydi va unday futbolga o'ynashga bo'lgan ishtiyoq yuqori. Eng muhimi ham shu aslida. Uning oliy ligadagi debyut mavsumini ijobiy baholash mumkin. Umid qilamizki Safoevning yorqin o'yinlari hali oldinda. Sultonovni ham etirof etgan bo'lardim.

- Bu yil qaysi futbolchidan yorqin o'yin kutgandiz-u lekin bunday bo'lib chiqmadi?
- Yo'q, men bu borada alohida bir nomga to'xtalib o'tirmoqchi emasman. Etibor bergan bo'lsangiz joriy mavsum tarkibimiz anchagina yoshartirildi. Aslida ularni yosh deb ham bo'lmaydi. Men yigitlarning o'ziga kamchiliklari xususida doim aytaman va kerakli ko'rsatmalarni berib boraman. Futbolchilar ham o'z vaqtida buni to'g'ri qabul qiladi va mashg'ulotlarda ishlaydi. 

- Bu yil qaysi futbolchilar bilan xayrlashasizlar?
- Yaqin kunlarda murabbiylar shtabi yig'ilib, mavsum sarhisobi va kelgusi rejalar borasida mashatlashib oladi. Menimcha shunda ko'p narsaga oydinlik kiritiladi.   

- Lekin tarkibda o'zgarishlar bo'ladi. To'g'rimi?
- Bo'lishi kerak. Ammo u qadar jiddiy o'zgarish qilinmaydi. Bilasiz “Metallurg” transfer oynasida yulduz darajasidagi o'yinchilarni xarid qilishga qiziqmaydi. Bizga mexnatkash va futbol o'ynashga ishtiyoqi yuqori bo'lgan o'yinchilar kerak. SHunday futbolchilar bilan ishlash osonroq. SHu bois biror o'yinchini taklif etishdan oldin, har tomonlama obdon o'rganamiz. Eng avvalo insoniyligi va mexnatkashligiga qaraladi. Sizga bir gap aytaman, nomini oshkor etmoqchi emasman-u, lekin o'tgan yillar davomida safimizga bitta futbolchi kelib qo'shilgandi. U ko'pincha mashg'ulotinglar yoqmayapti, o'yin uslubinglar yaxshi emas ekan deya gapirib yurardi. SHunda undan so'radim, bungacha o'ynagan klubing nechanchi o'rinni olganu, “Metallurg” qaysi o'rinni band etganiga etibor qildingmi deb. Biz mazkur o'yin uslub va mashg'ulot bilan shu o'rinni egalladik. Seni jamoangchi deya aytganimda jim bo'lib qolgandi. Keyin u futbolchi mavsum boshida 2ta va chempionat so'nggida yana 2ta o'yinda maydonga tushib, jamoamizni tark etgandi. Demoqchimanki, bizga mos tushadigan yigit bo'lsa shundagina chaqiramiz. Qolaversa jamoada ayrim pallalarda pul bo'lmay qolishi ham mumkin. Ilgari 5 oy maosh olmasdan o'ynaganmiz. SHunda ham yigitlar bu haqda hech qachon nolib, o'z ustida ishlashni susaytirib yubormagan. Agarda tarkibda birorta bulg'aydigan o'yinchi bo'lganida shunda ko'pchilik o'ynagisi kelmay qolardi. Bu yil Xudoga shukur moliyaviy muammoga duch kelmadik. Yigitlar vaqtida maosh oldi. Buni o'yinchilarimizdan so'rasangiz ham tasdiqlaydi. Yaqinda klub rahbariyatiga shaxsan o'zim murojaat qilib, mukofot pullarini oyma-oy berib borishini sababi, yanagi chempionat boshlangunga qadar o'yinchilarning qo'lida pul uzilmasligini so'radim. Qishki yig'in paytida ham futbolchilarimizda pul bo'lsin deb shunday qarorga kelindi.

Islombek Rustambekov suhbatlashdi.