Uchrashuvdan so'ng g'uzorliklar ustozi Asror Aliqulovning fikrlari bilan qiziqdik.
- Avvalo chempionatni g'alaba bilan boshlaganimiz va bu orqali G'uzor xalqiga xursandchilik ulashganimizdan xursandman. Mavsumning ilk rasmiy o'yini bo'lgani uchun ham yigitlarda birmuncha hayajon bo'lgani sezilib turdi. Qishki yig'inlar chog'ida sinov-nazorat o'yinlarini etarlicha tashkil eta olmaganimiz ham bugungi o'yinda bilindi. Hisobni birinchi bo'lib ochganimizdan so'ng raqib jamoa tenglashtirishga erishdi. SHundan keyin jamoamiz o'yinida biroz pala-partishlik yuzaga keldi. Yigitlar g'alaba ilinjida xarakat qildi. Ularda g'alabaga bo'lgan ishonch bor edi. Xudoga shukur, keyinchalik ketma-ket gollar kiritib ijobiy natija qayd eta oldik.Aniq eslay olmayman, “SHo'rtan”ning o'z uyida oxirgi marta bu kabi yirik hisobda g'alaba qozonganini. SHu bois G'uzor xalqi yirik hisobdagi g'alabani sog'inib qolgandi.
- Bosh murabbiy sifatida ilk rasmiy uchrashuvimni o'tkazdim. Yashirmayman, o'yin oldidan biroz hayajon bo'ldi. Lekin keyinchalik hammasi ortda qoldi. Raqibni xurmat qilgan xolda shuni aytishim mumkinki, bugun qanday hisobda bo'lmasin g'alaba qozonishimizga ishongandim. CHunki bilasiz, “SHo'rtan” o'tgan yili elitada ishtirok etgan. O'tgan mavsumdagi yigitlarning aksariyatini tarkibimizda saqlab qolganmiz. “Xorazm” esa bir necha yillardan buyon asosan quyi ligada ishtirok etib kelmoqda. Agarda o'z o'yinimizni namoyish eta olsak, raqibga hech qanday imkoniyat qoldirmasligimizni sezgandim. Lekin yana qaytaraman, qishki o'quv-yig'in chog'ida nazorat o'yinlarini kam tashkil etganimiz tasirini o'tkazmoqda.
- Futbolchilar haqida nima deyishim mumkin? Rejaga ko'ra yigitlar berilgan ko'rsatma bo'yicha avvaliga o'ynay olmadi. Ko'p vaziyatlarda sovuqqonlik etishmadi. Biroz shoshib qoldi. Ayniqsa yoshlarning hali to'la tayyor emasligi bilinib qolmoqda. PRO-Ligada ikkita yosh futbolchini maydonda o'ynashi shartligi bois, menimcha ko'p jamoalarda yoshlar o'zlarini u qadar ko'rsata olmayapti. Bu borada boshqalarda ham muammo bor nazarimda. Lekin o'yinning ikkinchi taymida yoshlarimiz o'zlarini ko'rsatdi. Gollarda ularning hissasi katta bo'ldi. Bir so'z bilan aytganda futbolchilar berilgan ko'rsatmalarni 50x50 bajardi.
- Oldin ham aytganman, biz ko'p narsa yo'qotdik. Qishki yig'in chog'ida kamchiliklarni to'liq ko'rib olmadik. Rasmiy o'yinlar barini ko'rsatib beradi. Endi jamoamiz faqat o'yindan-o'yinga kuchayishi mumkin. SHuning uchun ham raqibga qarab tayyorgarlik ko'rib boramiz. O'zimizga kerakli bo'lgan o'yinchilarni olib qoldik. Keyingi o'yinga ertadan yana tayyorgarlikni boshlaymiz.
Islombek Rustambekov suhbatlashdi.
Bosh sahifaga
184