Mazkur majmua 16 ta zamonaviy uy-joy, futbol stadioni, yopiq suzish havzasi, boks va gimnastika zallari, yozgi amfiteatr hamda musiqa zalini o'zida mujassamlashtirgan. Maskanda 95 nafar tarbiyalanuvchi talim va tarbiya oladi.
Xalqaro bolalarni himoya qilish kuni oldidan Andijon viloyat futbol associaciyasi muassasada bayramona ruhdagi xayrli tadbir tashkil etdi. “Bolalar shaharchasi”ga o'z vaqtida “Andijon” klubi va O'zbekiston terma jamoasida to'p surgan futbolchi Baxtiyor Hamidullaev, faxriy futbolchi Rahim Qodirov va yana bir qator millionlar o'yini fidoyilari tashrif buyurishdi.
“Bolalar shaharchasi”dagi tarbiyalanuvchilardan tashkil topgan ikki jamoaga Baxtiyor Hamidullaev va Rahim Qodirovlar murabbiy sifatida bosh bo'lib, maydonga olib tushishdi. Yosh futbolchilar o'z muxlislarining olqishlariga sabab bo'ladigan darajadagi o'yin ko'rsatdilar.
Bahs yakuniga etgach, bayram davom etdi. Maskan badiiy havaskorlari yig'ilganlarga qo'shiq va raqslardan iborat o'z dasturini namoyish qildilar.
Futbol uchrashuvida ishtirok etgan har bir yosh futbolchiga viloyat futbol associaciasining diplomlari va turli sport anjomlaridan iborat sovg'alar topshirildi.
“Bolalarni futbolga bo'lgan qiziqishini ko'rib mazkur maskanda ushbu sport turi bo'yicha muntazam ish olib boruvchi to'garak tashkil qilganmiz”, - deydi viloyat futbol associaciyasi birinchi vice-prezidenti Bekzodbek Karimov. – Mazkur to'garakda talim muassasasining o'ttizdan ziyod tarbiyalanuvchilari futbol sirlarini o'rganmoqda. Umid qilamizki, kelajakda ular orasida mashhur futbolchilar chiqadi”.
Bosh sahifaga
192