“B” guruhidagi 12-tur o'yinlari ham qiziqarli tarzda kechdi. O'z maydonida “Yozyovon”ni qabul qilgan “Zomin” nursiz durang qayd etdi. Vaholanki, zominliklar ushbu turda o'z hisobiga 3 ochko yozdirib qo'yishlari ham mumkin edi. Biroq jamoaning to'purar hujumchisi Doston Toshmatov 11 metrlik nuqtadan aniq zarba yo'llay olmadi. Bu esa yakunda durangga olib keldi.
“Iftixor” jamoasi nihoyat uzoq muddatdan so'ng yana g'alaba qozondi. Oltiariq jamoasida so'nggi paytlarda yuz bergan salbiy xolatlar ichki muhitga unchalik ham o'z tasirini o'tkazmadi. Aksincha irodali g'alabaga erishdi. Garchi “Labsa” jamoasi birinchi bo'limda hisobni ochgan bo'lsada, bahsning so'nggi 20 daqiqasida mezbonlar uchta to'p kiritib, g'alabani o'z tomoniga og'dirib yubordi.
Toshkent viloyatining “Nurafshon” jamoasi bu turda “Xotira-79”ni qabul qilib, kutilganidek g'alabaga erishdi. SHuni aytish lozimki, uychiliklar bosh murabbiyi Nozim Mullaoxunov yaqinda istefoga chiqib, uning o'rnini Naufal Boboev egallagandi. Kuni-kecha bosh murabbiy yana o'zgardi. Mullaoxunov qaytdi. Boboev ketdi. Samarqandning “SHerdor” jamoasi bu safar o'z maydonida turnir autsayderi “Lokomotiv-BFK”ni qabul qildi. Kutilganidek mazkur uchrashuvda sensaciya yuz bermadi va mezbonlar ishonchli g'alabaga erishdi.
“Zomin” – “Yozyovon” - 0:0.
“Iftixor” – “Labsa” - 3:1 (0:1).
“Nurafshon” – “Xotira-79” - 3:1 (2:0).
“SHerdor” – “Lokomotiv-BFK” - 3:1 (1:1)
Eng tezkor gol va boshqalar haqida
12-turning 4ta o'yinida jami 12ta gol qayd etildi. Bu har bir uchrashuvga o'rtacha 3tadan gol demakdir.
Mezbon jamoalar kiritgan gollar soni 9tani tashkil etdi. Mehmonlar esa 3ta gol urgan.
Uchrashuvlarning birinchi bo'limida 5ta gol qayd etilgan bo'lsa, qolgan 7ta to'p ikkinchi taymda kiritildi.
Ushbu turda faqatgina “Zomin” bilan “Yozyovon” jamoalari o'z darvozasi dahlsizligini saqlab qolgan.
12-turning ikkita o'yinida bittadan penalti qayd etildi. “Zomin” hujumchisi Doston Toshmatov penaltidan unumli foydalana olmagan bo'lsa, “Iftixor” o'yinchisi Farrux Oxunov “Labsa” darvozasini aniq nishonga oldi.
SHuningdek mazkur turda bitta avtogol ham qayd etildi. “Xotira-79” himoyachisi Sanjar Toshpo'latov jamoasining safarda “Nurafshon”ga qarshi o'tkazgan o'yinida kutilmaganda o'z darvozasiga to'p kiritib yubordi. Etiborlisi uning jamoasi safarda mag'lub bo'ldi.
Ahamiyatlisi bu turda dubl va xet-trik qayd etgan o'yinchilar yuz bermadi.
12-turda kimlar gol urdi?
1. Farrux Oxunov – “Iftixor”.
2. Akmal Xolmatov – “Iftixor”.
3. Dilmuhammad Xudoyberdiev – “Iftixor”.
4. Feruz Mo'yinov – “Labsa”.
5. Murod Rajabov – “Nurafshon”.
6. Oripxo'ja Abduxoliqov – “Nurafshon”.
7. Sanjar Toshpo'latov (avtogol)– “Xotira-79”.
8. Baxtiyor Qosimov – “Xotira-79”.
9. Fahriddin Alimov – “SHerdor”.
10. Abdulla Nabiev – “SHerdor”.
11. Otabek Hamroqulov – “SHerdor”.
12. Timur Ergashev – “Lokomotiv-BFK”.
Ogohlantirish va chetlatish
12-turning 4ta o'yinida jami 15ta sariq va 2ta qizil kartochka qayd etildi. Har bir uchrashuvga o'rtacha 4tadan sariq kartochka demakdir. Etiborlisi “Zomin” jamoasi futbolchilari bu turda birorta ham sariq kartochka olmasdan tartib-intizom bo'yicha boshqalarga o'rnak bo'ldi. Aksincha ushbu turni safarda o'tkazgan “Yozyovon” jamoasining futbolchilaridan beshtasi sariq kartochka ishlab olib, bu borada “peshqadamlik” qildi. SHuningdek safarda mag'lub bo'lgan “Labsa” futbolchilari ham sariq kartochka olmadi. Faqatgina 1ta o'yinchisiga ikkinchi taymda qizil kartochka ko'rsatildi.
Uchrashuvlarning birinchi taymida 3ta sariq kartochka qayd etildi. Ikkinchi bo'limda esa keskinlik nisbatan ortdi. Boisi o'yinlarni boshqarib borgan hakamlar yana 13ta futbolchini sariq bilan siyladi.
Tomoshabinlar tashrifi kimda qanday?
PRO-Ligada tomoshabinlarning stadionga tashrifi og'riqli nuqtalardan biri bo'lib turibdi. Ayniqsa “B” guruhidagi uchrashuvlarga muxlislar u qadar ko'p tashrif buyurayotgani yo'q. Xususan 12-turning jami 4ta o'yinida 2967 nafar ishqiboz kuzatildi. Bu esa har bir bahsga o'rtacha 741 ta tomoshabin demakdir.
Ushbu turda eng ko'p tomoshabin “Zomin” – “Yozyovon” bahsida kuzatildi. Zomindagi uchrashuvga 1446ta ishqiboz qadam ranjida qilgan.
Liga debyutanti “Nurafshon” jamoasi esa garchi musobaqada peshqadamlik qilayotgan bo'lsada hamon o'z muxlislarini topa olmayapti.
“Zomin” – “Yozyovon” - 0:0.
Zomin shahri. “Zomin” stadioni. 1446 tomoshabin.
“Iftixor” – “Labsa” - 3:1 (0:1).
Oltiariq shahri. “Markaziy” stadion. 786 tomoshabin.
“Nurafshon” – “Xotira-79” - 3:1 (2:0).
Yuqori CHirchiq tumani. “Do'stlik” stadioni. 175 tomoshabin.
“SHerdor” – “Lokomotiv-BFK” - 3:1 (1:1)
Samarqand shahri. “Dinamo” stadioni. 560 tomoshabin.
Bosh sahifaga
182