Superliga doirasidagi "Nasaf" - "Navbahor" uchrashuvida jarohat olib safdan chiqqan Aziz G'aniev Yaponiyada jarrohlik stolida yotqizilganidan xabaringiz bor. Kunchiqar yurtda salkam 3 oy muddat yashagan va tibbiy muolaja olgan futbolchi tiklanish jarayonlarini muvaffaqiyatli o'tkazdi.
Yaponiyada Aziz G'anievni kutib olib, unga jarohatini davolash jarayonida bevosita katta ko'mak ko'rsatgan Fozil Musaev o'tgan vaqt mobaynida sobiq jamoadoshiga hamroxlik qilgan. Aziz G'aniev bizga malum qilishicha, jarrohlik operaciyasiga ketgan barcha harajatlarni "Nasaf" klubi to'lab bergan.
"Barchasi yaxshi. Kecha Yaponiyadan qaytib keldim. O'tgan vaqt davomida Yaponiyada meni qo'llab-quvvatlagab, o'z xizmatini ayamagan Fozil aka Musaevga minnatdorchilik bildiraman. SHuningdek, "Nasaf" klubi va jamoa murabbiylar shtabi hamda futbolchilarga ham rahmat. Muxlislarga esa sog'inchli salomimni yo'llayman! Xudo xohlasa tez orada maydonga qaytib, ularni o'z o'yinlarim bilan xursand qilishga harakat qilaman", - dedi Aziz G'aniev.
Ayni paytda yurtimizga qaytib kelgan Aziz G'aniev hozirda oila davrasida. Tez orada futbolchi "Nasaf" qarorgohiga yo'l oladi.
Aziz G'aniev dekabrdan boshlab individual tarzda mashg'ulotlarga kirishishini takidladi. Futbolchi taxminan yana 1,5 oylardan so'ng jamoa bilan umumiy guruh mashg'ulotlariga qo'shilishi kutilmoqda. Aziz G'aniev katta ehtimol bilan fevral oyida yashil maydonga qaytishi mumkin.
Qayd etish joizki, Aziz G'aniev yanvarda bo'ladigan Osiyo Kubogini jarohati bois o'tkazib yuboradi.
Bosh sahifaga
124