Bu safar 2018 yilgi Superligada maydonga tushgan eng faxriy futbolchilar haqida gaplashamiz.
Anvar Berdiev (11.05.1978)
Klubi: "Neftchi"
Ampluasi: Hujumchi
Statistikasi: 12 ta o'yin, 1 ta gol
Bu yil maydonga tushgan eng faxriy futbolchi "Neftchi" hujumchisi Anvar Berdiev bo'ldi. 1978 yilda tug'ilgan to'purar 40 yosh, 202 kunligida Superligada to'p tepdi. Murabbiylar tajribali futbolchini asosan zaxiradan maydonga tushirishdi. Mavsum davomida 12 ta o'yinda qatnashgan Berdiev Farg'onada "Paxtakor"ga qarshi kechgan bahsda gol urishning uddasidan chiqdi va bu yil gol urgan eng faxriy futbolchi nomiga ham sazovor bo'ldi. Berdiev bu yil O'zbekiston chempionatida o'zining 500-uchrashuvini o'tkazdi.
Anvar G'ofurov (14.05.1982)
Klubi: "Bunyodkor"
Ampluasi: Himoyachi
Statistikasi: 17 ta o'yin, 1 ta gol
"Bunyodkor" himoyachisi Anvar G'ofurov bu reytingda ikkinchi o'rinni egalladi. 36 yoshli futbolchi yakuniga etgan mavsumda 17 bor maydonga tushdi va shundan 15tasida to'liq o'ynadi. "So'g'diyona" bilan bahsda raqib darvozasiga to'p kiritishning ham uddasida chiqqan G'ofurov negadir Superliganing ikkinchi bosqichida umuman maydonga tushgani yo'q. Katta ehtimol bilan G'ofurov keyingi mavsum "Bunyodkor"da o'ynamaydi.
Mamur Ikromov (12.06.1982)
Klubi: "Lokomotiv"
Ampluasi: Darvozabon
Statistikasi: 2 ta o'yin, -1 ta gol
Bir necha yildan buyon "Lokomotiv"ning zaxira darvozaboni degan nomni hech kimga bermayotgan Mamur Ikromov 2018 yilgi Superligada o'ynagan eng yoshi katta posbon bo'ldi. 36 yoshli darvozabon bu yil ikkitagina o'yinda maydonga tushdi va bitta gol o'tkazib yubordi.
Murodjon Zuhurov (23.02.1983)
Klubi: "Bunyodkor"
Ampluasi: Darvozabon
Statistikasi: 14 ta o'yin, -14 ta gol
Reytingimizdagi yana bir darvozabon - Murodjon Zuhurov. "Bunyodkor"ning 35 yoshli posboni yakuniga etayotgan yilda 14 ta o'yinda ishtirok etdi va o'z darvozasidan xuddi shuncha to'p olib chiqdi.
Kamoliddin Tojiev (03.05.1983)
Klubi: "Paxtakor"
Ampluasi: Himoyachi
Statistikasi: 7 ta o'yin
Bir necha yildan buyon "Paxtakor" tarkibida o'ynab kelayotgan Kamoliddin Tojiev ham endilikda faxriylar qatoriga kirib bo'ldi. 35 yoshli himoyachi uchun 2018 yil u qadar omadli o'tgani yo'q. SHota Arveladze boshqa himoyachilarga ko'proq ishonch bildirdi. Tojiev 7 ta o'yinda maydonga tushdi va atiga 3tasida to'liq harakat qildi. Mavsum so'nggida Tojievlarning o'rtanchasiga "Paxtakor" rahbariyati tomonidan to'n kiydirildi. SHu bois himoyachi yangi mavsumni boshqa klubda o'tkazishi mumkin deb taxmin qilamiz.
Ignatiy Nesterov (20.06.1983)
Klubi: "Lokomotiv"
Ampluasi: Darvozabon
Statistikasi: 30 ta o'yin, -27ta gol
"Lokomotiv"ning asosiy posboni Ignatiy Nesterov ham reytingimizdan joy oldi. 1983 yilda tavallud topgan darvozabon bu yil O'zbekiston chempionatida o'zining 400-uchrashuvini o'tkazdi. 2018 yilgi mavsumda Nesterov 30 ta uchrashuvda maydonga tushib, 27 ta gol o'tkazdi.
Jasur Hasanov (02.08.1983)
Klubi: "Nasaf"/AGMK
Ampluasi: Yarim himoyachi
Statistikasi: 28 ta o'yin, 3 ta gol
2003 yil Nesterov bilan birga yoshlar o'rtasidagi Jahon chempionatida ishtirok etgan Jasur Hasanov ham faxriy fubolchiga aylandi. 35 yoshli yarim himoyachi bu yilgi mavsumni "Nasaf" safida boshladi va yozda AGMK safiga ko'chib o'tdi. Jami 28 ta o'yinda maydonga tushgan Hasanov 3 ta gol urdi va 12 marta sheriklariga golli pas oshirdi.
Igor Taran (29.12.1983)
Klubi: "Qo'qon-1912"/"Neftchi"
Ampluasi: Hujumchi
Statistikasi: 15 ta o'yin, 1 ta gol
"SHo'rtan"dagi o'yinlari orqali tanilgan Igor Taran 2018 yilgi mavsum ikkita klubda o'tkazdi. Dastlab "Qo'qon-1912"da harakat qilgan hujumchi transferlar oynasi paytida vodiyning boshqa bir klubi "Neftchi"ga o'tdi. 15 ta uchrashuvda maydonga tushgan Taran bitta gol urdi. Biroq 29 dekabr kuni 35 yoshga to'ladigan hujumchi faqat bitta uchrashuvda to'liq o'ynaganini ham qo'shib qo'yish lozim.
Nosirbek Otaqo'ziev (30.01.1984)
Klubi: "Qo'qon-1912"
Ampluasi: Hujumchi
Statistikasi: 25 ta o'yin, 2 ta gol
So'nggi yillarni "Qo'qon-1912"da o'tkazgan Nosirbek Otaqo'ziev bu mavsum 25 marta maydonga tushib, raqiblar darvozasini ikki bor ishg'ol qildi. 34 yoshli hujumchi hozirga qadar O'zbekiston chempionatida jami 351 ta o'yin o'tkazdi.
Nemanya Yovanovich (03.03.1984)
Klubi: "Qizilqum"
Ampluasi: Hujumchi
Statistikasi: 28 ta o'yin, 6 ta gol
Reytingimizdagi yakkayu-yagona legioner Nemanya Yovanovich bo'ldi. "Qizilqum" hujumchisi 34 yoshida 28 ta bahsda maydonga tushdi va 6 marta raqiblar darvozasiga gol urishga muvaffaq bo'ldi. Serbiyalik futbolchi keyingi yil ham yurtimizda o'ynaydimi yoki yo'qmi buni vaqt ko'rsatadi.
Narzulla Saydullaev
Bosh sahifaga
131