Osiyo Kubogining amaldagi sohibi Avstraliya ertaga dastlabki turni Iordaniyaga qarshi o'tkazadi. Mazkur uchrashuv oldidan har ikki jamoa bosh murabbiylari ishtirokida matbuot anjumani tashkil qilindi.
Malumot uchun, Avstraliya - Iordaniya bahsi Al Ayndagi "Hazza bin Zayed" stadionida bo'lib o'tadi. O'yin bizning vaqt bilan 16:00da boshlanadi.
Matbuot anjumanida Avstraliya terma jamoasi bosh murabbiyi Grexem Arnoldning fikrlari quyidagicha bo'ldi: "Biz to'rt yil oldin chempion bo'lgandik. O'shanda musobaqa o'z maydonimizda o'tganini ham unutmasligimiz kerak. Lekin bu natijaga ham to'rt yil bo'ldi. Endi esa tarixni boshqatdan yozishning vaqti keldi. Hozir o'tmish bilan yashashning mavridi emas va kelajakka boqish lozim. Buyog'iga hammasini boshidan boshlamoqchimiz. Navbatdagi Osiyo Kubogiga uzoq vaqt tayyorgarlik ko'rdik, buning mevasini chempionat davomida olishga harakat qilamiz".
Avstraliya bosh murabbiyining aytishicha, Metyu Leki hozircha o'yinga tayyor emas, chunki "Gerta" yarim himoyachisi jarohatini davolayapti.
"U tez orada sog'ayib safga qaytadi. Osiyo Kubogi faqat bitta o'yindan iborat emas va bu o'rinda shoshilmagan maqul. Metyu Leki professional futbolchi, u har bir mashg'ulotda astoydil ter to'kadi. O'ylaymanki, Falasti bilan o'yingacha yarim himoyachimiz tayyor bo'ladi".
Matbuot anjumanining ikkinchi qismida Iordaniya terma jamoasi bosh murabbiyi Vital Borkelmans savollarga javob qaytardi.
"Avstraliya - juda kuchli jamoa, bunga shubha yo'q. Bu jamoa jahon chempionatida ham o'zini ko'rsata oldi. O'ylaymanki, navbatdagi Osiyo Kubogi ham Avstraliya uchun omadli kechadi. Biz uchun esa nafaqat bu jamoaga qarshi bahs, balki har bir o'yin muhim ahamiyat kasb etadi. Bizni shuningdek, Suriya bilan Falastinga qarshi bahslar ham kutib turibdi. Umuman olganda juda qiziq guruhdan joy olganmiz. Jamoam ham jismoniy, ham ruhiy tomondan bellashuvga tayyor. Biz Xitoy, Qirg'iziston va Qatarga qarshi yaxshi o'yin ko'rsatdik. Endi Avstraliya bilan ham tengma-teng kurashishga harakat qilib ko'ramiz", - deydi belgiyalik mutaxassis.
Avstraliya - Iordaniya: o'zaro o'yinlar
29 mart, 2016
Avstraliya - Iordaniya 5:1 (JCH saralash)
8 oktyabr, 2015
Iordaniya - Avstraliya 2:0 (JCH saralash)
11 iyun, 2013
Avstraliya - Iordaniya 4:0 (JCH saralash)
11 sentyabr, 2012
Iordaniya - Avstraliya 2:1 (JCH saralash)
Bosh sahifaga
177