Yo'lga chiqish OFK taqdim etgan rasmiy dastur bo'yicha rejalashtirilganidek emas, balki yo'l-yo'lakay amalga oshdi. Kechagi kundaliklarda aytilganidek, BAAda Osiyo Kubogi harorati u qadar sezilmayotgani, tashkiliy ishlardagi no'noqlikni qayd etmasdan iloj yo'q.
SHunga qaramasdan ijodiy guruhimiz bilan O'zbekiston - Ummon uchrashuvi bo'ladigan "SHarja" stadioniga keldik va birinchi navbatda xodimlarimiz uchun ajratilgan akkreditaciyalarni qo'lga oldik. Rasmiy hujjatlar rasmiylashtirilganidan so'ng bemalol jurnalistlar maydonchasi bo'lgan media-markazga o'tdik. Ayni paytda butun ijodiy guruhimiz Otabek SHukurov faoliyat ko'rsatadigan "SHarja" klubiga qarashli stadionda joylashgan media-markazdan ishga kirishishgan. Media-markazda hozirda Ummondan bir nafar jurnalist va O'zbekistondan saytimiz xodimlaridan tashkil topgan katta ahil jamoa ishlamoqda.
Xayrulla Xoliqov esa ayni pallalarda ummonlik hamkasbimiz bilan ertangi o'yin oldidan qizg'in suhbat qurmoqda. Tez orada Xayrulla Xoliqov ushbu suhbatni muxlislar hukmiga havola etadi.
Qayd etish kerakki, stadion hududiga kiraverishda "SHarja" klubi xodimlari bilan muloqot bo'lib o'tdi. Klub xodimlari Otabek SHukurov haqida juda ko'p iliq fikrlarni bildirishdi. Otabek allaqachon jamoa muxlislari va klub xodimlarining ham yoqimtoy futbolchisiga aylanib ulgurganini sezish qiyin emas. Umid qilamizki, ertangi bahsda Otabek SHukurov o'zi uchun begona bo'lmagan stadionda kim "xo'jayin" ekanligini ko'rsatib qo'yadi :-)
Yaqin soatlar ichida ertangi uchrashuv oldidan rejalashtirilgan rasmiy tadbirlar bo'lib o'tadi.
Rasmiy tadbirlar tartibi:
O'zbekiston terma jamoasi bosh murabbiyi Ektor Kuper va yarim himoyachi Odil Ahmedov ishtirokidagi matbuot anjumani - 15:15 (Toshkent vaqti - 16:15)
O'zbekiston terma jamoasi rasmiy mashg'uloti - 16:00 (Toshkent vaqti - 17:00)
Ummon terma jamoasi bosh murabbiyi va futbolchisi ishtirokidagi matbuot anjumani - 17:15 (Toshkent vaqti - 18:15)
Ummon terma jamoasi rasmiy mashg'uloti - 18:00 (Toshkent vaqti - 19:00)
"CA" ijodiy jamoasi: Narzulla Saydullaev, Xayrulla Xoliqov, Tolibjon Qosimov, G'ayrat Xasbiulin, Jasur Aslanov, Zoir Tursunboev, SHahboz Beg'amov
SHarja, 8 yanvar
Bosh sahifaga
218