Musobaqani har ikkala jamoa turli natijalar bilan boshlashdi. O'zbekiston Ummon ustidan qiyin g'alaba qozongan bo'lsa, Turkmaniston Yaponiyaga qarshi munosib o'ynadi, lekin samuraylar raqibni 3:2 hisobida taslim etishdi.
Bu uchrashuvdagi g'alaba O'zbekistonga muddatidan avval nimchorak final chiptasini taqdim etsa, Turkmaniston esa oxirgi tur oldidan keyingi bosqichga chiqish imkoniyatlarini yaxshilab olish uchun harakat qilishdi.
Ektor Kuper o'tgan uchrashuvga qaraganda asosiy tarkibda uchta o'zgarishni amalga oshirdi. Birinchisida chetlatilgan Egor Krimec o'rniga Islom To'xtaxo'jaev varianti tanlandi. Ikkinchi o'zgarishda esa qanot vingerini almashtirish to'g'ri keldi. O'tgan bahsda kutilgan o'yinni ko'rsatmagan Rashidov Hamdamovga almashtirildi. Uchinchi o'zgarish o'tgan bellashuvda kutilganidek o'yini chiqmagan Marat Bikmaev o'rniga Eldor SHomurodovni tushirish bilan tugadi. Kuper odatdagidek 4-2-3-1 sxemani tanladi. Bu taktik joylashuvda jamoa vaziyatga qarab 4-3-3ga ham o'tish imkoniyatiga ega bo'ladi.
Turkmaniston ustozi esa Yaponiyaga qarshi o'yinda chiqqan tarkibga hech qanday o'zgartirish kiritmadi. Jamoa Yaponiya bilan bo'lgani kabi uchrashuvni 5 himoyachi, 4 yarim himoyachi va 1 hujumchi bilan boshladi.
O'yin kutilmaganda Turkmaniston terma jamoasining tezkor hujumga o'tishi bilan boshlandi. Oleg Zoteev markazda to'pni qabul qilishda xato o'ynadi va natijada to'pni raqibga oldirdi. Turkmaniston esa startni hujum bilan boshlab, o'ng qanotdan jarima maydonchasi ichiga yorib kirishga urindi. Ruslan Mingazov tomonidan uyushtirilgan reyd jarima maydonchasi oldida fol bilan to'xtatildi. Turkmaniston belgilangan jarima zarbasidan unumli foydalan olmadi. Ahmed Ataev o'ylagan kombinacion hiylani vakillarimiz o'z paytida payqashdi va Arslonmurot Amanovga zarba berishga imkon qoldirishmadi.
O'zbekiston terma jamoasining ilk hujumi anchagina xavfli tus oldi. Zoteev-Masharipov-Hamdamov uchligi tashkil etgan hujumni Doston bosh bilan bergan zarbasi orqali muvaffaqiyatli yakunlashi mumkin edi. Biroq bu vaziyatda to'p avval erga tegib darvoza to'sini ustidan o'tib ketdi.
Keyingi vaziyat uchrashuvning 9-daqiqasida sodir etildi. Burchak zarbasidan kelgan oshirmadan so'ng Anzur Ismoilov o'z uslubida foydalanishga urinib ko'rdi. Lekin yo'llangan zarba mo'ljalga aniq bormadi.
Oradan 8 daqiqa o'tgach esa katta sahnaga SHarjada "sehrli tayoqcha"mizga aylangan Eldor SHomurodov chiqdi. Aynan u tomonidan raqibga uyushtirilgan bosim natijasida to'pni raqibdan olib qo'ydik. SHomurodov-Sidiqov-Ahmedov-Hamdamov-SHomurodov to'rtligi davom ettirgan hujumga "nuqta" qo'yish Sidiqovga nasib etdi - 0:1.
O'tkazib yuborilgan goldan ranjigan Turkmaniston terma jamoasi uchrashuvning 19-daqiqasida javob golini urish uchun oldinga o'tdi. Arslonmurot Amanov markazdan jarima maydonchasi atrofiga yaqinlashdi va darvozani "o'qqa" tutdi. Ammo yo'llangan zarbaga aniqlik etishmadi.
Bahsning 24-daqiqasida yana katta sahnaga Eldor SHomurodov chiqdi. Hamdamov-SHukurov-SHomurodov kombinaciyasini Eldor sovuqqonlik bilan yakunladi - 0:2. Bu gol ham pressing natijasida raqibdan to'pni olib qo'yilganidan so'ng kiritdi. Bunda esa Dostonbek Hamdamov jonbozlik ko'rsatdi.
O'yin nazorati va to'liq ustunlik vakillarimiz tomonida bo'lgan taymda yana ko'plab vaziyatlar yaratildi. Otabek SHukurov, Javohir Sidiqov tomonidan berilgan zarbalar mo'ljalga aniq bormadi. Aks holda hisob allaqachon yana O'zbekiston foydasiga yiriklashishi mumkin edi.
Bu orada esa Turkmaniston terma jamoasi bosh murabbiyi birinchi bo'limning o'zidayoq o'zgartirishga qo'l urdi. Zaxiradan ikkinchi hujumchi Murot Annaev ikkinchi golda ko'pol xatoga yo'l qo'ygan Ahmet Ataev o'rniga tushirildi. SHundan so'ng himoya markazida o'ynagan "Ahal" azosi Vezirgeldi Ilyasov tayanch zonasida Ataev o'rnini egalladi. Bu taktik o'zgarishdan so'ng 5 himoyachi bilan o'ynayotgan raqibimiz 4-4-2 sxemasiga ko'chdi.
Ammo bu o'zgarish raqiblarga hech qanday naf keltirgani yo'q. Aksincha tanaffusga qadar vakillarimiz tablodagi hisobni baribir yiriklashtirishdi. O'ng qanotdan chapga ko'chgan hujumni Masharipov ajoyib harakati orqali to'pni o'ziga bo'ysundirib markaz orqali hujumga keskinlik taqdim etdi. Jarima maydonchasiga oshirilgan to'p raqibdan qaytayotganda hujumga bezag bergan Masharipov birinchi bo'lib voqea joyiga etib keldi va aniq zarbasi orqali tablodagi hisobni yiriklashtirdi - 0:3.
Ammo bu hisob tanaffusga qadar yana o'zgardi. Jaloliddin Masharipov sherigi Eldor SHomurodovni oldinga chorladi. O'z navbatida SHomurodov bir himoyachidan ustalik bilan o'tib ketib, darvozabonni ham zararsizlantirib, ochiq qolgan darvozaga to'pni yo'lladi - 0:4.
Tanaffusga qadar terma jamoamiz barcha masalani uzil-kesil hal etib qo'ydi.
Ikkinchi bo'limda o'yin tizgini bizning qo'limizda bo'ldi. Ammo terma jamoamiz hisobdan kelib chiqqan holda nisbatan ancha xotirjam o'ynadi. Kuper ikkinchi bo'lim boshida SHorahmedovni Hoshimovga almashtirdi, bo'lim o'rtasiga kelib Ikrom Aliboevni nihoyat markazga Sidiqov o'rniga tushirdi. Uchrashuv yakunlanishiga yaqin esa Ahmedov o'rniga Fozil Musaev maydonga tushirildi. Turkmaniston ham ikkinchi bo'limda hech bo'lmasa prestij golini urish uchun ancha ter to'kdi. Lekin vaziyatni golga qadar olib borishda ularga himoya chizig'imiz yo'l bermadi.
 Turkmenistan | Asian Cup Grp. F . 2-tur 13/01/2019, 21:00 4 : 0 Tugadi |  Uzbekistan Javokhir Sidikov - 17', Eldor Shomurodov - 24', Jaloliddin Masharipov - 40', Eldor Shomurodov - 42' |
Stadion: Rashid Stadium
Bosh hakam: Ammar Al-Jeneibi
Teglar: osiyo, kubogi, shomurodovning, benifisiga, aylanayotgan, musobaqadagi, ketma-ket, ikkinchi, galaba, oyin, sharhi,
← OldingaOrqaga →
Bosh sahifaga
196