Kuni kecha jamoa o'zining sodiq futbolchilaridan biri Bahodir Akramov bilan xayrlashdi.
Mahoratli yarim himoyachining jamoadan ketishiga “Qo'qon-1912” bosh murabbiyi No'mon Hasanov quyidagicha izoh berdi.
- Bahodir Akramov – biz uni Borya deb chaqiramiz. Bahodir yaxshi inson, jamoamizning yoqimtoy futbolchilaridan biri. Kam gapiradigan, o'yin paytida yoshlarga dalda beradigan, Qo'qon futboli uchun jonini beradigan futbolchi. Haqiqiy Qo'qon farzandi. Aytgan ko'rsatmalarimni so'zsiz bajaradigan futbolchi. Qo'qonlik muxlislar va jamoamiz azolari bu futbolchini hali ko'p sog'inamiz. Uning raqibdan to'pni olib qo'yishlari, uzoq masofadan yo'llaydigan aniq va kuchli zarbalari, to'xtagan o'yinni tezda boshlab yuborish kabi xislatlarini unutib bo'lmaydi. Stadiondagi muxlislarning “Boryani qo'y” deb hayqirishlari...
Menga hozir juda qiyin bunday futbolchilar bilan xayrlashish. CHunki bizning jamoada futbolchining nafaqat mahorati, balki insoniylik xislatlarini birinchi o'ringa qo'yamiz. Bu futbol shunaqa ekan. Vaqt o'tgan sari ancha ko'p futbolchilar bilan xayrlashishga to'g'ri keldi. Bahodir meni ukamdek, farzandimdek bo'lib qolgan. Ochig'i ko'zimga yosh keldi.... Bahodir senga omad tilayman ! “Qo'qon-1912” jamoasining va mening eshiklarim sen uchun doim ochiq – deydi No'mon Hasanov.
“Qo'qon-1912” futbol klubi rahbariyati , murabbiylar shtabi hamda ko'p sonli muxlislarimiz nomidan Bahodir Akramovga jamoamiz uchun qilgan xizmatlariga kattadan – katta minnatdorchilik bildiramiz. Akramovning kelgusi faoliyatida omad yor bo'lishini tilab qolamiz.
Bosh sahifaga
284