JCHdagi ishtirok tarixi
Malilik o'smirlar 5 marotaba kichik mundialda ishtirok etib, eng yaxshi natijasini CHilida bo'lib o'tgan 2015 yilgi turnirda qayd etgan. O'shanda Afrika jamoasi finalga qadar etib borgan va Nigeriyaga imkoniyatni boy berib qo'ygan. Oxirgi musobaqada esa saralash bosqichidan o'ta olmagan. Umuman olganda, Mali ishtirok etgan beshta turnirning to'rttasida chorak finalga qadar etib borgan.
Saralash bosqichi
Mali U-17 Afrika millatlar kubogi guruh bosqichida Burkina-Faso (1:0) va Kamerun (2:0) jamoalarini mag'lub etib, guruh g'olibi sifatida pley-offga yo'l oldi. CHorak finalda esa ular Kongoni yirik 3:0 hisobida taslim etdi. Yarim finalda Marokashga qarshi bahsda esa hisob ochilmadi, biroq penaltilar seriyasida Mali 5:6 hisobida yutqazdi. 3-o'rin uchun bahsda ham Burkina-Fasoga 1:2 hisobida imkoniyatni boy berdi. SHunga qaramay, Mali jahon chempionatiga yo'l olgan Afrikaning to'rt jamoasidan biri bo'ldi.
Mundialga tayyorgarlik
Mali o'smirlar terma jamoasi jahon chempionatiga tayyorgarlikni dastlab o'z mamlakatida o'tkazdi, so'ngra 20 oktyabr kuni Saudiya Arabistoniga jo'nab ketdi. Malidagi tayyorgarlik davomida mahalliy jamoalar — "Joliba" (2:2), "Afrika Fut" (4:3), "ATS" (2:1) va "AFE" (2:0)ga qarshi o'rtoqlik uchrashuvlarini o'tkazdi.
Arab diyorida 6 noyabrga qadar davom etgan yig'inda raqibimiz ekvadorlik tengqurlariga qarshi o'rtoqlik o'yinida maydonga tushib, 4:1 hisobida zafar quchdi.
Tarkib
"Burgutlar" murabbiyi Sumayla Kulibali Indoneziyaga deyarli Afrika millatlar kubogida ishtirok etgan tarkibni olib ketdi. Faqatgina jarohatlangan futbolchilar o'rnini boshqalari bilan to'ldirdi.
Darvozabonlar
KONE Burama (Elleni Olimpik), SIDIBE Diagin (Bamako), DUMBIYA Seriba (Bamako).
Himoyachilar
TRAORE Mussa (Bamako), SANOGO Suleyman (Yilen), TRAORE Issa (Joliba), KONE Seku (Guidars), KONE Gaussu (Yilen), KULIBALI Bay (Etual Dyu Mande), DIOP Mussa Massir (Guidars).
Yarim himoyachilar
MAKALU Hamidu (Guidars), SISSOKO Modibo (Guidars), TIA Anj Marsyal (Afrika Fut Elit), TIERO Usmon (AS Bamako).
Hujumchilar
DIARRA Ibrohim (Afrika Fut), LEYNTU Salif Noy (Betesda), KANATE Ibrohim (Afrika Fut Elit), TRAORE Badra (Mec, Franciya), DUMBIYA Mamadu (Blek Stars), BERRI Mahmud (Etual Dyu Mande), DIARRA Usmon (Genereshn Fut).
Futbolchi va murabbiylar O'zbekistonga qarshi o'yin haqida qanday fikrda?
Sumayla Kulibali (Mali bosh murabbiyi):
"Birinchi o'yinda muvaffaqiyat qozonish hamisha qiyin, ayniqsa, jahon chempionati kabi musobaqada. Lekin shu paytgacha erishgan natijalarimizdan so'ng o'zimizga bo'lgan ishonch yuqori. Mali xalqini xursand qilish uchun qo'limizdan kelgan barcha ishni amalga oshiramiz".
Ibrohim Diarra (Mali sardori):
"Biz har qanday jamoa bilan to'qnash kelishga tayyormiz. Indoneziyaga shuning uchun kelganmiz. InshaAlloh, biz ushbu jahon chempionatida sharafli natija qayd etamiz".
Eslatib o'tamiz, "B" guruhidan o'rin olgan Mali — O'zbekiston uchrashuvi bugun Toshkent vaqti bilan soat 14:00da boshlanadi.
Bosh sahifaga
229