Joriy yil transferlar oynasida bir qancha olamshumul voqeliklar kuzatildi. Jumladan, 80 mln. funt sterlingga 19 yoshli Antonii Martialning «Monako»dan «MYu» safiga qo'shilishi hech qaysi futbol muxlisining tushiga ham kirmagandi. Shu o'rinda, frantsiyalik o'smir kabi bir qancha futbolchilar joriy mavsumda etakchi klublarda qo'nim topishganini ta'kidlash lozim. Mazkur maqolada aynan shundaylar bilan tanishtirib o'tamiz.
11. Kevin Trapp — 6,6 mln. funt
Qaerdan: «Ayntraxt» (Germaniya)
Qaerga: «PSJ» (Frantsiya)
Yoshi: 25
Unchalik mashhur bo'lmagan germaniyalik posbon Kevin Trapp faoliyatini «Kayzerslautern»da boshlagandi. Keyinchalik, o'rtacha mavqega ega «Ayntraxt» darvozasini 3 yil mustahkam qo'riqladi va bu mavsum «PSJ»ning asosiy kiperiga aylandi. Yangi darvozabonning parijliklar safiga qo'shilishi boshqa bir kiper Salvatore Siriguning joriy mavsumdagi vaqtini ko'proq zaxira o'rinig'ida o'tkazishidan darak bermoqda.
10. Fabian Delf - 8 mln. funt
Qaerdan: «Aston Villa» (Angliya)
Qaerga: «Manchester Siti» (Angliya)
Yoshi: 25
«Aston Villa» va Angliya terma jamoasi yarim himoyachisini bu mavsum «Liverpul»ni tark etgan jamoa sardori Stiven Jerrard o'rnini bosishi kutilayotgandi, biroq u «Manchester Siti»ni tanladi. «Shaharliklar» Delf transferi uchun bor-yo'g'i 8 million funt sarflashdi. Sterlingga 40 million, De Bryuynega sarflangan 70 mln. evro oldida bu summa unchalik ko'zga tashlanmasligi mumkin. Lekin, shunga qaramay, Pellegrini Delfning xizmatlaridan foydalanishini aytib o'tdi.
9. Nataniel Klayn –
12 mln. funt
Qaerdan: «Sautgempton» (Angliya)
Qaerga: «Liverpul» (Angliya)
Yoshi: 24
APLning eng ilg'or o'ng qanot himoyachilaridan biri o'tgan mavsum «Sautgempton»da boshqalardan ajralib turdi va birdaniga Angliya termasi hamda «Liverpul»dan kutilmagan taklifni qabul qildi. Klaynga ajratilgan 12 million funt «Liverpul»ning boshqa xaridlari oldida deyarli e'tiborga tashlanmaydigan narx bo'ldi.
8. Matteo Darmian –
12,6 mln. funt
Qaerdan: «Torino» (Italiya)
Qaerga: «Manchester Yunayted» (Angliya)
Yoshi: 25
Darmian transferining narzi Shvaynshtayger, Shnayderlin, Depay va Martialdan keyingi o'rinni band etdi. Matteo Darmian — hamma o'ylagan kabi yulduz futbolchi emas, shuningdek, u «MYu»da etakchi ham emas, lekin klubning sodiq muxlislari italiyalik himoyachini chinakam qahramon deb o'ylashmoqda. Italiya terma jamoasi himoyachisi sotib olinganidan so'ng endilikda «qizil iblislar» chap qanot himoyasida Antonio Valensiya emas, Matteo Darmian harakatlanadi.
7. Abdul Rahman Baba -
14 mln. funt
Qaerdan: «Augsburg» (Germaniya)
Qaerga: «Chelsi» (Angliya)
Yoshi: 21
«Augsburg»ning ganalik himoyachisi «Chelsi»ga 14 million funtga tushdi. Transfer summasi nisbatan u qadar katta emas. Bilamizki, «Chelsi» himoyasi kuchli futbolchilardan tashkil topgan, APL va jahon miqyosida ham o'z o'rniga ega boshqalardan mustahkamligi bilan ajralib turadi. Shu sababli ganalik himoyachi joriy mavsumni zaxira o'rindig'ida kutish bilan o'tkazishi yoki boshqa bir klubdan ijara futbolchisi sifatida vaqtincha qo'nim topishi mumkin.
6. Memfis Depay — 19,25 mln. funt
Qaerdan: «PSV» (Niderlandiya)
Qaerga: «Manchester Yunayted» (Angliya)
Yoshi: 21
Memfis Depay 2014 yilda Braziliyada o'tgan jahon chempionatida yaqqol ko'zga tashlangandi. Memfis «PSV» tarkibida ham o'tgan mavsum o'zini ajoyib tomondan ko'rsatdi, 30ta o'yinda maydonga tushib 22ta gol kiritdi. Gollandiyalik hujumchi o'tgan mavsumning o'zidayoq «MYu» taklifini qabul qildi va klubning 7-raqamli libosida harakatlanmoqda.
5. Duglas Kosta – 21 mln. funt
Qaerdan: «Shaxtyor» (Ukraina)
Qaerga: «Bavariya» (Germaniya)
Yoshi: 24
Ochig'ini aytganda, bu yozning eng tushunarsiz transferlaridan biri. «Bavariya» skautlari braziliyalik yarim himoyachining «Shaxtyor»dagi statistikasiga nazar tashlashganmidi? Duglas ko'rsatgan natija juda ham maqtanarli darajada emasdi-ku. Lekin, endilikda Pepe Gvardiola qo'lida «Bavariya»ga tez orada katta foydasi tegadigan noyob iqtidor sohibi mavjud.
4. Paulo Dibala – 22,4 mln. funt
Qaerdan: «Palermo» (Italiya)
Qaerga: «Yuventus» (Italiya)
Yoshi: 21
«Palermo»ning argentinalik hujumchisi vatandoshi Karlos Tevesning o'rnini bosish uchun «Yuventus»dan taklif oldi. Mutaxassislar Dibaladagi yuqori iqtidor haqida avvaldan gapirib kelishardi. 21 yoshli hujumchi joriy mavsum yangi klubi safida gol urishni ham uddasidan chiqdi. To'g'ri, bu gol «Yuve»ga katta yordam bermagan bo'lishi mumkin. Turinliklar «A» seriyada 3-turdan keyin 1 ochko jamlagan holda 16-o'rinni band etib turishibdi.
3. Morgan Shnayderlin –
24,5 mln. funt
Qaerdan: «Sautgempton» (Angliya)
Qaerga: «Manchester Yunayted» (Angliya)
Yoshi: 26
Morgan Shnayderlin — APLning o'tgan mavsumdagi ajoyib kashfiyotlaridan biri. Frantsiyalik tayanch yarim himoyachi «Sautgempton»dagi fantastik harakatlari bilan Lui Van Gaalning e'tiborini qozondi va joriy mavsum «Old Trafford»ga yo'l oldi. Morganning Bastian Shvaynshtayger bilan maydon markazida olib boradigan tashviqotlari yanada qiziqarliroq ko'rinishi tabiiy.
2. Kristian Benteke - 32,5 mln. funt
Qaerdan: «Aston Villa» (Angliya)
Qaerga: «Liverpul» (Angliya)
Yoshi: 24
Belgiyalik forvard ikki yil avvalroq «Aston Villa»ni tark etib, etakchi jamoaning zaxira o'yinchisiga aylanishi mumkin edi. Lekin, u klub tanlashda shoshilmadi. Mazkur mavsum Bentekening «Liverpul»ga o'tishi hujumchi hayotida katta bir qadam bo'ldi. «Liverpul» o'ziga to'purarlik mahorati etarli hujumchi izlab ko'rishi kerak edi va uni topdi. Bentekega 30 million funtdan ortiqroq mablag' sarflagan holda sotib oldi. Hatto, «qizillar» o'z vaqtida Luis Suares uchun ham shuncha pul to'lashmagandi.
1. Antoni Martial – 40 (Q40) mln. funt
Qaerdan: «Monako» (Frantsiya)
Qaerga: «Manchester Yunayted» (Angliya)
Yoshi: 19
Transfer mavsumi oxirgi kunlarida «Manchester Yunayted» klubi vakillari chuqur o'ylanishdi. Klubga sovuqqon hujumchini topish klub skautlaridan anchagina mehnat talab etdi. «Qizil iblislar» «Monako» tarkibida 40ta o'yinda ishtirok etib, bor-yo'g'i 11ta gol urgan 19 yoshli o'smirni 50 million funtga sotib olishdi. Tanqidlarga uchragan Lui Van Gaal «Liverpul» bilan o'yinda unga imkoniyat yaratib berdi va frantsiyalik hujumchining debyuti omadli chiqib, maydondan kiyinish honasiga boshini baland ko'targan holda yo'l oldi.
A.Eshonxonov tayyorladi, «InterSPORT» gazetasi
Manba: interfutbol.uz
Bosh sahifaga
348