O'zbekiston milliy terma jamoasi JCh-2018 saralashida Yaman va Filippinga qarshi kechgan bahslarda ishonchli g'alabalarni qo'lga kiritgach, engil tin oldik. Endi musobaqa jadvalidagi holat u qadar tashvishli emas va hammasi yaxshi kechgan taqdirda, termamiz bamaylixotir keyingi bosqichga chiqib oladi. Bu biz uchun juda muhim. Chunki hali hech qachon O'zbekiston terma jamoasi JCh saralashining ikkinchi bosqichida qolib ketmagan.

Baxtimizga KXDRdan uchralgan mag'lubiyatdan so'ng vaziyat ancha o'nglandi. Bu esa O'FF tomonidan amalga oshirilgan o'zgarishlar samarasi, deb ayta olamiz. Vaziyat ancha jiddiy edi va federatsiya rahbariyati darhol chora ko'rdi. Ahvolimiz qay darajada jiddiyligini JCh saralashining ikkinchi bosqichidayoq terma jamoa bosh murabbiyining iste'foga chiqishi bilan izohlash mumkin. Bu bilan O'FF katta tavakkalga qo'l urdi. Ammo hozircha o'sha tavakkal o'zini oqlamoqda. Yangi qon quyilgan jamoaning shijoati boshqacha, g'alabalar qo'lga kiritilmoqda. Biroq O'FF chiqargan qarorlarning hammasi ham to'g'rimikan? Keling, hozir shu haqida gaplashsak.

Iyun oyida O'zbekiston milliy terma jamoasi bosh murabbiyi Mirjalol Qosimov iste'foga chiqarildi va uning o'rniga Samvel Babayan tayinlandi. Shuningdek, O'zbekiston olimpiya terma jamoasi boshqaruvida ham katta o'zgarishlar amalga oshirildi — Baxtiyor Ashurmatovning o'rnini Viktor Jalilov egalladi. Jalilovga yordamchi sifatida Dilshod Nuraliev tayinlandi. Keyinchalik bilishimizcha, olimpiya terma jamoasiga nafaqat bosh murabbiy, balki uning yordamchisini ham O'FF tayinlashida o'ziga yarasha hikmat bor ekan. Hammasi milliy terma jamoa uchun rasmiy o'yinlar, olimpiyachilar uchun esa Slovakiyadagi yig'in boshlangach ma'lum bo'ldi.

Olimpiya terma jamoasi uchun Evropadagi yig'inning ahamiyati katta edi. Terma jamoa yanvarda Osiyo chempionatida ishtirok etadi va muvaffaqiyat qozongan taqdirda 2016 yilgi Olimpiada yo'llanmasini qo'lga kiritadi. Hali futbol tarixida o'zbekistonlik futbolchilar Olimpiadada ishtirok etishmagan. Shunday ekan, bu musobaqaga jiddiy tayyorgarlik ko'rish talab qilinadi. Slovakiyadagi yig'in buning uchun ayni muddao bo'ldi. Boisi u erda BAA va Saudiya Arabistoni kabi qit'aning etakchi terma jamoalariga qarshi o'yin o'tkazish imkoni bor edi.

Bu vaqtda O'zbekiston milliy terma jamoasi JCh saralash bahslariga tayyorgarlik ko'rayotgandi. Bu o'yinlarning ahamiyati haqida ko'p gapirish shart emas, Qiziq tomoni, shunday vaqt­da O'FF g'alati qarorga keldi. Olimpiya terma jamoasi tarixida ilk marta uning bosh murabbiyi o'z ishi qolib, milliy terma jamoaga jalb qilindi, olimpiyachilar esa Dilshod Nuraliev boshchiligida Slovakiyaga yo'l olishdi. Samvel Babayan Yaman va Filippinga qarshi kechadigan bahslarda Viktor Jalilovning yordamiga ehtiyoj sezdi, O'FFga iltimos qilib, murabbiyni olib qoldi. Olimpiya terma jamoasi bilan bog'liq barcha mas'uliyat esa Dilshod Nuraliev zimmasiga yuklatildi.

Hozir bu borada fikr bildirishdan oldin bu o'zgarishlarning nafaqat salbiy, balki ijobiy tomonlarini ham albatta, aytib o'tish kerak. Aslida aytish ham shart emas, chunki biz uni ko'rib bo'lganmiz. Zero, O'zbekiston milliy terma jamoasining Yaman (1:0) va Filippin (5:1) ustidan qozongan g'alabalarida Viktor Jalilovning ham hissasi bor. Yaqinda Samvel Babayanning o'zi aytdiki, uning ish tizimida har bir mutaxassisning o'rni bor. Viktor Jalilov esa yaxshi bilamiz, xuddi Samvel Babayan kabi «Paxtakor»dan chiqqan. Ular uzoq yillar davomida bir klubda ishlashdi va endi terma jamoada ham hamkorlik qilishmoqda. Biz bu hamkorlik uzoq va davomiy bo'lishiga tilakdoshmiz. Ammo olimpiya terma jamoasi bosh murabbiyi bir vaqtning o'zida milliy terma jamoada ham faoliyat olib borishi qay darajada muvaffaqiyatli chiqarkin? Milliy terma jamoaga yordam berayotgan Jalilovning o'z ishi qolib ketmasmikan?

Bu ham hali hammasi emas. Viktor Romanovich shuningdek, «Paxtakor»dagi ishini ham davom ettirmoqda. Shunchaki mutasaddilikda emas, balki bevosita o'yinlarni boshqarishda ham qatnashmoqda. Klubdan Samvel Babayan ketgach, uning yumushi ham Viktor Jalilovga qolgan ko'rinadi. «Paxtakor»ning rasmiy bosh murabbiyi No''mon Hasanov esa o'zi aytganidek, Babayan va Jalilov bilan bamaslahat ish olib bormoqda. Kattalar bilan maslahatlashgan yaxshi albatta, ammo bu holat terma jamoaga qanday ta'sir o'tkazar ekan?

O'FF prezidenti Mirabror Usmonov bu borada tutgan pozitsiyasini aniq-tiniq aytib berdi. O'zbekis­ton milliy terma jamoasi bosh murabbiyi Samvel Babayan bir vaqtning o'zida olimpiya terma jamoasini ham nazorat qilib boradi va lozim bo'lgan taqdirda yordamga etib keladi. Bundan esa shunday xulosa chiqarish mumkinki, Qatarda bo'lib o'tadigan olimpiyachilar o'rtasidagi Osiyo chempionatida ham Samvel Babayan va Viktor Jalilov tandemi birga ishlaydi. Ularning ishidan qanday natija chiqishini vaqt ko'rsatadi. Balki yaxshi bo'lar, balki yomon. Bunisidan endi yanvarda xabar topamiz.

Bir narsa aniq, agarda O'zbekiston olimpiya terma jamoasi oldiga qo'yilgan vazifa bajarilmasa, bunda nafaqat murabbiylar shtabi, balki O'FF rahbariyati ham aybdor bo'ladi. Chunki hali hech qachon bir murabbiy ham Olimpiya, ham milliy terma jamoada birdek muvaffaqiyat qozona olmagan. Shunday ekan, ishlar chappa ketgan taqdirda, mas'uliyatni kim o'z zimmasiga oladi? O'FFmi? Babayanmi?

Manba: «InterFUTBOL» gazetasi