Futbol — bu haqiqiy jangchilar, aniq maqsaddan chekinmaydigan jasur sportchilar o'yini. Gohida jahon darajasidagi yulduzlarga qarasangiz, shunday taassurot uyg'onadiki, ular hayotga faqat maydonga tushib, tomoshabop xatti-harakatlari bilan muxlislarni xushnud etish uchun kelishgandek. Lekin aslida hammasi boshqacha. Futbolchilar avvalo, sizu bizga o'xshagan insonlardir. Ular ham dam olishni, hazillashishni, sevib-sevilishni va kimlar bilandir do'st tutinishni istashadi. Qo'yidagi maqolamiz aynan oxirgi band — do'stlik rishtalari haqida. Aniqrog'i, jahon futbolidagi eng mashhur sadoqatli do'stlar juftligi xususida gap boradi.

Roberto Karlos va Ronaldo

Bir qarashda, ushbu do'stlar duetida hech qanday g'ayrioddiy jihat yo'qdek. Axir gap Braziliya terma jamoasi va «Real» klubida elkama-elka turib, to'p surgan ikki futbolchi haqida ketyapti. Faqat shunisi borki, Roberto Karlos ham, Ronaldo ham o'z intervyularida o'zaro munosabatlari oddiy do'stlikdan ancha mustahkam ekanligini ko'p bora ta'kidlashgan. Ya'ni tug'ishgan aka-ukalardek bo'lib ketishganini hech qachon yashirishmagan. Buni tushunish mumkin. Zero, ular mudom birga edilar. Hattoki, o'z oilalariga nisbatan olganda ham, bir-birlari bilan ko'p vaqt o'tkazishgan. Bir safar Ronaldo o'z do'stlaridan ramziy jamoa tuzib, ro'yxatning birinchi qatorida aynan Roberto Karlosni qayd etgandi. Oddiy aytganda, ular o'rtasidagi do'stlik etarlicha sinovlardan muvaffaqiyatli o'tgan va har ikki futbolchi bunday aloqa bilan g'ururlanishga haqli.

Joze Mourino va Aleks Fergyuson

Nafaqat futbolchilar, balki murabbiylar o'rtasida ham qalin do'stlik shakllanishi mumkin. Ko'pchilik murosasiz va «Benazir» Joze Mourino do'st tushunchasidan ancha yiroq, deb o'ylaydi. Lekin bu xato fikr! Ma'lum bo'lishicha, «Chelsi» ustozi anchadan buyon «MYu»ning sobiq bosh murabbiyi ser Aleks Fergyuson bilan kuchli do'stlik rishtalariga ega. Portugaliyalik mutaxassis «Chelsi»ni ilk marta qo'lga olgan vaqtdayoq ular o'rtasida birodarlik tuyg'ulari nish urgan. Fergining qaysi sababdan ko'ra, Jozeni yoqtirib qolgani noma'lum. Ehtimol, shotlandiyalik murabbiy uning timsolida munosib raqobatchini ko'rgandir. Balki Mouning murakkab xarakteri ma'qul tushgandir. Harqalay, fakt shuki, ikki buyuk murabbiy hozircha do'stlik aloqalarini uzmagan.

Serxio Aguero va Lionel Messi

Shubha yo'qki, ushbu do'stlar dueti haqida ko'pchilik biladi. Shunchaki, argentinalik ikki yulduzning matbuot orqali bir-biri haqida aytadigan gaplarini diqqat bilan kuzatish kifoya qiladi. Deylik, o'tgan yili ularning jamoalari ChLda o'zaro to'qnash kelishganida ham, har ikkisining so'zlarida bir misqolgina bo'lsin, tajovuzkorlik yoki dushmanlik alomati sezilmadi. Qo'shimchasiga, Messi hamyurti va ampluadoshining o'g'liga cho'qintirgan ota hisoblanadi. Lionel o'g'ilchali bo'lganida esa, Serxio Argentina termasining kichik o'lchamdagi futbolkasini maxsus buyurtma asosida tayyorlatib, uni chaqaloqqa sovg'a tariqasida yuborgandi. Umuman, Messi va Agueroni tez-tez birga ko'rish mumkin. Ya'ni ular bo'sh vaqtlarida birga hordiq chiqarish imkoniyatini sira qo'ldan chiqarishmaydi.

Xavi va Iker Kasilyas

Yana bir mashhur do'stlar juftligi. Vaholanki, ularning maydonda tez-tez o'zaro ashaddiy raqiblarga aylanishlariga to'g'ri kelardi. «Real»ni Joze Mourino boshqargan payt bitta holat yuzaga kelganki, aytishlaricha, Iker shu tufayli «blankos»ning asosiy tarkibidagi joyini yo'qotgan. Xullas, «Real» va «Barsa» o'rtasidagi navbatdagi to'qnashuvlardan biridan so'ng Kasilyas o'z odatiga ko'ra, qadrdon do'sti bilan gurunglashadi. Bu narsa Mouga yoqmaydi va u o'z shogirdlariga kataloniyalik futbolchilar bilan aloqaga chiqishni taqiqlab qo'yadi. Iker esa bunday talabga e'tibor qaratmaydi va jazoga tortiladi. To'g'ri, bu voqea qanchalik rost yoki yolg'onligini bilmaymiz. Bordiyu, bu to'qima bo'lsa ham, faqat bitta narsadan dalolat beradi: ikki afsonaviy futbolchining bemisl do'stligidan. Aytgancha, 2011 yili OAVda Xavi va Kasilyas o'rtasidagi munosabatlar ancha buzilgani haqida yozilgandi. O'shanda futbolchilar darhol o'zaro uchrashib, bunday xabarlar asossiz ekanligini bildirishgandi. Xususun, Kasilyas maxsus bayonot ham bergandi: «Xavi — mening eng yaxshi do'stim».

Marselo va Krishtianu Ronaldu

Portugaliya terma jamoasida birga o'ynay boshlashgan bu futbolchilar o'rtasida do'stlik rishtalari keyinroq ildiz otgan. Ya'ni Ronaldu 2009 yili «Real» safiga qo'shilganidan so'ng. O'sha vaqt Marselo Madrid klubida o'ynardi va hamyurtining yangi qo'nimgohga msolashishiga katta yordam bergan ekan. Shu-shu ularni ayro tasavvur qilish qiyin. Ha, Krishtianu og'ir xarakter sohibi. Shunday bo'lsada, Marselo uning tilini topishda sira qiynalmaydi. Har holda, CR7 hech kimning oldida Marselo hamrohligidagi kabi xursand  va betashvish ko'rinmaydi. Ular o'zaro ko'p hazillashadilar. Muhimi, gollarni doimo birga nishonlashni xush ko'radilar.

Zlatan Ibragimovich va Maksvell

Zlatan Ibragimovichdek kibrli yigit xuddi Joze Mourino kabi faqat o'zini sevadigandek. Ya'ni uning kim bilandir do'st tutinishini tasavvurga sig'dirish mushkul. Biroq bu ham xato tushuncha. Zlatan va Maksvell o'rtasidagi birodarlashuv ancha oldin yuzaga kelgan: ular yoshlik yillariyoq o'zaro do'st tutinishgan. Boz ustiga, bu futbolchilar avvaliga «Ayaks», keyin «Barselona» va «Inter»da birga o'ynashdi. Endi esa «PSJ»da to'p surishmoqda. Aslida ularning dunyoqarashlari, xarakterlari turlicha. Shunga qaramay, hamon do'stlik rishtalarini mustahkam ushlab kelmoqdalar. Aytaylik, Ibragimovich o'zining avtobiografik asari: «Men — Zlatan»da Maksvell, u bilan do'stligi haqida ko'p yozgan va munosabatlari abadiy davom etishiga ishonch bildirgan.

Manba: interfutbol.uz