Sports.ru saytining «Uzbekskaya kuxnya» blogi futbolimizni imkon
qadar yoritib bormoqda. Xususan, Evdokim Raimov ushbu bo'lim orqali Toshkentning «Bunyodkor» klubidagi bugungi holatni tahlil qilib, «qaldirg'ochlar»ni kelgusida boshqarishga loyiq mutaxassis borasidagi fikrlari bilan o'rtoqlashdi. Quyida ana shu maqolani e'tiboringizga havola etamiz.
Toshkentning «Bunyodkor» klubi o'ziga o'xshamayapti. Bu butun mavsum davomida yaqqol sezildi. Bir vaqtlari Toshkentga o'zgacha futbol havosini olib kirgan lotin amerikaliklar endi yo'q. «Qaldirg'ochlar» esa sekin-asta «badavlat klub»dan oddiy jamoaga aylanib borishmoqda. Natijalar yildan-yilga yomonlashib borayotgan bo'lsa-da, yangi va muhtasham stadionning qurib berilishi klubga o'zgacha ishtiyoq berishi kerakdek edi. Ammo…
Lekin tez orada vaziyat ijobiy tus olishi aniq. Chunki jamoa tarkibida iste'dodli yoshlar shunchalik ko'pki, ularning iqtidori natijalarda ham o'z aksini ko'rsatmay qolmaydi.
Sergey Lushanning qisqa fursatlarda iste'foga chiqarilishi shaxsan meni juda hayron qoldirdi. Hattoki, mavsum klubga omadli kelmagani yaqqol ko'rinib turgan bo'lsa ham. Garchi muhim ochkolar boy berilsada, Lushan davridagi «Bunyodkor»ning o'yini chakki emasdi. Nazarimda, u jamoaga boshqa murabbiylardan farqli ravishda, ko'p narsa bera oldi. Ya'ni, Lushan o'yinlarda taktik sxemalardan oqilona foydalandi, qimmatli bilimlarini shogirdlari bilan baham ko'rdi. Kechirasizlar-u, ammo Lushanning «Bunyodkor»i — Qosimov davridagi klubdan keskin farq qiladi. Kuchli futbolchilar yo'q, o'zgarmas 4-5-1dan voz kechilgan. Shuningdek, kreativlikka boy Skolarining «Bunyodkor»i ham boshqacha. Aniqrog'i, «qaldirg'ochlar» Lushan boshchiligida so'nggi yillardagi eng kuchsiz jamoa bo'lib ko'rinsalarda, bir mavsumning boy berilishi orqali iste'dodli yoshlarga to'g'ri yo'nalish ko'rsatildi. Kelgusida faqat chempionlikni ko'zlaydigan klub barpo etilayotgandi.
Lushanning iste'fosidan keyin muxlislar klub bosh murabbiyi lavozimiga yana Mirjalol Qosimovning qaytishini kutishmoqda. Aksariyat jurnalistlarning fikrlari ham shunga hamohang. Baxtiyor Boboev esa jamoaga vaqtincha ustozlik qilmoqda. Albatta, Mirjalol Qosimovning qaytishi va klubni yana yuqori saviyaga olib chiqishini kuzatish yoqimli. Lekin uning nomzodiga qarshilik ko'rsatuvchi jihatlar ham yo'q emas. Masalan, Qosimovning uslubida ehtiyotkorlik yaqqol ko'zga tashlanadi. Albatta, uning murabbiylik salohiyati yuqori. Lekin ochig'ini tan olish kerak, o'yinning borishiga keskin ta'sir o'tkaza oladigan murabbiylar sirasiga kirmaydi (JCh-2018 saralashida KXDR, Osiyo kubogida Janubiy Koreyaga qarshi o'tgan o'yinlar bunga misol). Boshqacha aytganda, Qosimovning jamoalari raqibni yanchib tashlash emas, balki hisobni ushlab qolishga intilishadi. Shubhasiz, Qosimov — pragmatik, lekin u xuddi shu pragmatizm evaziga ko'plab g'alabalarga erishganini ham unutmaslik lozim.
Xullas, mening nazarimda, «Bunyodkor»ga boshqacharoq murabbiy kerak. Masalan, Igor Shkvirin.
Bunga sabablar:
- Igor Shkvirin yoshlar bilan ishlashni biladi;
- Uning jamoasidagi yoshlar ijaraga ham ketmay, «Olmaliq»da tajriba to'plashyapti;
- Shkviringa yosh futbolchilar hamisha sodiq qolishadi. Aks holda, Zohir Pirimov va Diyor Turopov kabilar allaqachon boshqa klubga o'tib ketishardi;
- Uning yordamchilari ham kuchli mutaxassislar;
- Igor Shkvirin hujumkor futbol tarafdori;
- So'nggi to'rt yillikda faqat Shkvirin qo'l ostidagi «Olmaliq» barqaror o'yin ko'rsatmoqda;
- Igor Shkvirin — maksimalist. «Nasaf»ga qarshi o'yindan keyin u jamoa OChLni maqsad qilayotganini ochiq-oydin aytdi;
- «Olmaliq» chempionatning chorak qismida 22ta gol urdi. Qizig'i, «Barselona»ning ko'rsatkichlari ham xuddi shuncha;
- «Olmaliq» joriy mavsumda «kuchli uchlik» klublaridan 5 ochko tortib oldi.
«Bunyodkor»ning keyingi murabbiyi kim bo'lishidan qat'iy nazar, mo'jiza yaratishi kerak. Ular muxlislarni maydonga qaytarishlari lozim. Ha, aynan muxlislarni. Fan-klubning baraban chaladigan kamsonli entuziastlarini emas. Ishqibozlarni esa faqatgina chiroyli o'yin evaziga jalb etish mumkin.
Jamoada foyda keltiradigan insonlar ko'pchilikni tashkil qiladi. Jamoaning Chempionlar Ligasida o'ynash-o'ynamasligi muhim emas. Asosiysi, kelgusi mavsum.
Ammo hozir «Bunyodkor»ni o'n yillik yubileyi bilan tabriklaymiz va albatta, Shotlandiyaning «Seltik» jamoasi bilan bo'ladigan o'yin-da omad tilab qolamiz.
Manba: interfutbol.uz
Bosh sahifaga
583