Kechagi o'yinni ko'rdingiz. Mayli, hozir kichik hisob, kamchiliklar yoki taktik xatolar haqida gapirmaymiz. Shunchaki, keyingi imkoniyatlarni va oldimizga g'ov bo'lishi mumkin bo'lgan vaziyat haqida ikki og'iz so'z yuritib o'tsak.

Kecha g'alaba qozondik. Uch ochkomiz cho'ntagimizda. Go'yoki, har qanday tanqidni ortga surib tursak bo'ladi. Ammo, 1:0 hisobidagi g'alaba bizga deyarli hech narsa bermadi. Yirikroq hisob kerak edi bizga. Sababini tushintiramiz.

Yaxshi bilasiz, 2-saralashda sakkizta guruh bor. 3-saralashga kimlar chiqishini eslatib ketsak… JCh-2018ning 3-saralash bosqichiga sakkizta guruhdan 12ta terma chiqadi, 16ta emas.

Demak, guruhda ikkinchi o'rinni olgan terma ham o'z guruhida qolib ketishi mumkin. Ya'ni, 3-saralash bosqichiga guruh g'oliblari va eng yaxshi ko'rsatkichga ega bo'lgan to'rtta terma yo'l oladi.

«A» guruhida BAA va Saudiya Arabistoni yakunda taxminan bir xil ochkoga ega bo'lishadi. «S» guruhida Gonkong, Xitoy va Qatarlar ham deyarli bir xil ochkoga yig'ishadi. Har holda, hozir vaziyat shunaqa.

«D» guruhida Eron va Ummon yaxshigina ochko yig'adi. «E» guruhidagi Yaponiya va Suriyalarning imkoniyatlari haqida gapirmasak ham bo'ladi. Bundan tashqari, «G» guruhida Quvayt va Janubiy Koreya ham shular jumlasidan.

Xullas, bizning guruhda ikkinchi o'rin egasi 3-saralashga chiqa olmasligi mumkin. To'g'ri, bu bir taxmin. Lekin judayam qaltis taxmin. Hozirgi vaziyatimiz shuni taqoza etmoqda.

Kechagi o'yin bilan O'zbekiston termasi Filippinni safarda yutish ehtimoli 50/50. Keling, endi tan olaylik. Kecha ham tan olmayotgandik. Bugun majburmiz bunga.

Demak, agar 8 sentyabr kuni Manilada ochko yo'qotsak va KXDR termasi ketma-ket o'z uyida ikki marta yutsa, biz 3-saralashga chiqa olmasligimiz mumkin. Har halda shunaqa ehtimollik bor.

Ya'ni, KXDR kecha Bahraynni safarda yutib keldi. Demak, O'zbekistonni yutgani ham bejiz emas ekan. Guruhimiz favoriti — shabhasiz KXDR. Qizig'i shundaki, mazkur terma jamoa navbatdagi ikki o'yinni o'z uyida Filippin (8 oktyabr) va Yamanga (13 oktyabr) qarshi o'tkazadi. Olti ochko ola bilmaydi, deb o'ylaysizmi? Bemalol oladi! Ulardagi tartib va intizom haqida ortiqcha gapirmasak ham bo'ladi.

Ana shundan keyin O'zbekiston amalda KXDRga etishi qiyin bo'ladi, garchi nazariy imkoniyat bo'lsada. Boz ustiga O'zbekiston ochko yo'qotsa, Filippinda ham ochko ko'payib ketadi. Uyog'i endi arifmetika. Qanaqa arifmetika ekanligini o'zbekistonlik ishqibozlar yaxshi bilishadi.

Avvallari 4-saralash bosqichi va pley-offgacha bemalol etib borar edik. Endi bo'lsa, 3-bosqichga ham chiqa olmasligi mumkin.

Bu bilan biz kayfiyatni tushirmoqchi yomon niyatni ilgari surmoqchi emasmiz. Shunchaki, buni futbolchilar va murabbiylar shtabi his qilishi kerak. Juda og'ir vaziyat oldida turibmiz. Bugun xulosa qilmasak kech bo'ladi.

Filippinni albatta yutishimiz kerak!

Manba: uff.uz