Forbes jurnali dunyoning eng yuqori haq to'lanadigan futbolchilarning ro'yxatini tuzib chiqdi. Futbolchilar daromadining asosiy qismini maosh, bonuslar, mukofot pullari tashkil qiladi. Qolgan qismini esa reklama shartnomalari tashkil etadi. Quyida dunyoning 10 ta eng yuqori haq to'lanadigan futbolchilar bilan tanishishingiz mumkin.

10. Luis Suares (“Barselona”) – 19.9 mln dollar

2014-yilda Suares “Barselona”ga o'tgandan so'ng yaxshigina daromadga ega bo'ladigan bo'ldi. U klubda yiliga 17 mln dollar miqdorida daromad oladi. Undan tashqari futbolchining adidas bilan shaxsiy shartnomasi bor.

9. Serxio Aguero (“Manchester Siti”) – 25.3 mln dollar

“Manchester Siti” eng ko'p maosh to'laydigan klublardan biridir. “Shaxarliklar” safida eng ko'p haq oluvchi futbolchi Aguerodir. U klub bilan shartnomasini 2019-yilgacha uzaytirgandan so'ng, klubdagi daromadi 18 mln dollarni tashkil qiladigan bo'ldi. Qolgan qismi reklamadan.

8. Xames Rodriges (“Real”) — 25.4 mln dollar

Xames Rodriges Forbes ro'yxatiga brinchi marta kirdi, lekin shu zaxoti 8-o'ringa ko'tarilib oldi. U Jahon chempionatidagi muvaffaqiyatli ishtirokidan so'ng “Real” safiga kelib qo'shildi. U klub bilan 100 million dollarlik 6 yilga mo'ljallangan shartnoma tuzdi. Marketing sohasida ham Xamesni omadi yurishmoqda. Adidas bilan shaxsiy shartnomasi bor. Undan tashqari Rodrigesning Bronzin Black bilan birgalikda J10 deb nomlanuvchi ichki kiyimlar  ishlab chiqaruvchi shaxsiy tarmog'i bor.

7. Ueyn Runi (“Manchester Yunayted”) – 25.8 mln dollar

O'tgan yili Runi “MYu” bilan yangi shartnoma imzolagach, o'zining yillik daromadini ancha yaxshilab oldi. Undan tashqari Runining Nike, Samsung va EA Sports bilan shartnomalari bor.

6. Radamel Falkao (“Chelsi”) – 31 mln dollar

O'tgan mavsumni Falkao “MYu”da ijara asosida o'tkazdi. Shunga qaramasdan u klubda mo'maygina pul ishlab oldi. Lekin u o'ziga sarflangan pullarni oqladi deb bo'lmaydi. Omadsiz mavsumdan so'ng Falkao “Chelsi”ga o'tib ketdi.

5. Neymar (“Barselona”) – 31.7 mln dollar

Neymar “Barselona”da yaxshigina daromad oladi, u klubda eng yuqori haq oluvchi futbolchilardan biridir. Undan tashqari Neymarning  Nike, Volkswagen, Tenys Pé Baruel, Lupo, Ambev, Claro, Unilever, Santander kabi kompaniyalar bilan shaxsiy shartnomasi bor. O'tgan yili u Beats kompaniyasi bilan hamkorlikni yo'lga qo'ydi.

4. Garet Beyl (“Real”) – 34.9 mln dollar

Beyl “Real”dagi faoliyati orqali yiliga 24 mln dollar ishlab oladi. Yana Garetning EA Sports, Lucozade, BT Sport va adidas kabi brendlar bilan kelishuvi bor. O'tgan yili yangi uslubda chiqarilgan F50 butsalaridan foydalangan birinchi futbolchi bo'ldi.

3. Zlatan Ibragimovich (“PSJ”) – 41.8 mln dollar

Ibragimovich “PSJ” klubida yaxshigina daromad oladi va daromadining ko'p qismini hayriya ishlariga sarflaydi. U ko'proq ovqat va kosmetika maxsulotlarini keng miqyosda reklama qiladi. Shvetsiyaga kuchli muxabbati tufayli uning mahalliy kompaniyalar bilan kelishuvlari bor. Undan tashqari Zlatan Nike brendining yuzi hisoblanadi.

2. Lionel Messi (“Barselona”) – 70.5 mln dollar

Messining 2018-yilgacha mo'ljallangan yangi shartnomasidan so'ng uning klubdagi daromadi ancha oshdi. Undan tashqari argentinalikning butsilar ishlab chiqaruvchi shaxsiy tarmog'i ham bor. Yana uning Samsung, Gillette, Turkish Airlines kabi mashxur kompaniyalar bilan shartnomalari bor.

1. Krishtianu Ronaldu (“Real”) – 79 mln dollar

Dunyoning eng mashxur sportchisi Ronadu “Real” klubida eng yuqori haq oluvchi futbolchi hisoblanadi. Homiylik shartnomalarining o'zidan Krishtianu deyarli 30 million dollar ishlab oladi. Undan tashqari Nike bilan hamkorlikda CR7 nomli kiyimlar ishlab chiqaruvchi shaxsiy tarmog'i bor. Yana uning Coca-Cola, Castrol, Konami, Banco Espirito Santo, Motorola, Jacob & Co., KFC, Tag Heuer, Fly Emirates, Samsung, Sacoor Brother kabi mashxur kompaniyalar bilan ko'plab shartnomalari bor.

Manba: koptok.uz