Farg‘ona shahrida tennis bo‘yicha sovrin jamg‘armasi 50 ming AQSh dollarini tashkil qiluvchi “Chellenjer” turkumidagi turnirning asosiy to‘r bahslari start oldi. Asosiy to‘rda 5 nafar tennischimizning ishtirok etishi haqida xabar bergan edik.

Ulardan Humoyun Sultonov va Shonig‘matjon Shofayziyev ilk davradayoq o‘z ishtiroklarini yakunlashdi. Asosiy to‘rga imtiyozli ravishda qo‘yilgan Sultonov serbiyalik Nikola Milojevichga 4:6, 2:6 hisobida imkoniyatni boy berdi. Shofayziyev esa fransiyalik Sadio Doumbioga 7:6, 4:6, 2:6 hisobida yutqazdi.

Bugun hamyurtlarimizdan Temur Ismoilov belgiyalik Julen Dubailga, Jo‘rabek Karimov turnirning uchinchi raketkasi rossiyalik Aleksandr Kudryavsevga qarshi kortga chiqadi. Ertaga esa Sanjar Fayziyev turnirning 4-raketkasi qozog‘istonlik Dmitriy Popko bilan to‘qnash keladi. 

Farg‘ona “Chellenjer”ining birinchi raketkasi sifatida rossiyalik Konstantin Kravchuk qayd etilgan. U dunyo reytingida 109-o‘rinni egallab turibdi. Moldovalik Radu Albot ikkinchi raketka bo‘lib, ATP reytingida 113-pog‘onadan joy olgan.

Musobaqa g‘olibi 7,200 dollar mukofot puli hamda 90 reyting ochkosiga ega bo‘ladi. Finalchi 4,240 dollar hamda 55 dollarni qo‘lga kiritadi. Birinchi davrada kortga chiqqan barcha tennischilar o‘z hamyonlarini 520 dollarga boyitib olishadi. 

Manba. olamsport.com