Har yili Shveytsariyaning Bazel shahrida o'tkaziladigan Baseworld deb nomlanuvchi soatlar va zargarlik buyumlari ko'rgazmasida bu yil xronometrlarning ko'plab yangi modellari namoyish etildi. Rolex, Tag Heuer, Patek Philippe, Casio kabi mashhur va mashhur bo'lmagan yana ko'plab kompaniyalar ommaga minglab soatlarni taqdim etishdi.

 

“Ulysse Nardin Grand Deck Marine Tourbillon”

Soat xuddi yog'och shxunaning palubasini eslatadi.

Soat milini soch tolasidan ham ingichka, lekin bir kilogramm yukni ko'tara oladigan nanosim tolasi nazorat qiladi.

“Christophe Claret” kompaniyasi tomonidan ishlangan bu modelning zaxira yurishi 52 soatga etadi, korpusi 18 qirotli oltindan ishlangan. Sotuvga atigi 18 dona soat chiqariladi va ularning har biri 280 ming dollar turadi.

 

“Bulgari Octo Finnissimo Minute Repeater”

Bu soat chiroyli, qulay bo'lib, kishiga viqor bag'ishlaydi.

“Octo Finnissimo” titandan ishlangan, og'irligi 43 gramm va judayam yoqimli tovush chiqaradi. Sotuvga bor-yo'g'i 50 dona chiqariladi va narxi 155 ming dollarga teng bo'ladi.

 

“Bulova CURV”

Ro'yxatdagi hamma soatlar ham o'ta qimmat va mexanik emas. Kvartsdan arzon soatlar tayyorlaydigan kompaniyalar ham mijozlarni hayratlantirishlari mumkin.

Masalan, “Bulova” mutaxassislari dunyodagi birinchi bukilgan xronografni yaratishdi.

Soat bejirim, dizayni o'ziga xos – nafaqat tayanch paneli, balki barcha harakatlanuvchi detallar ham bukilgan. Soat bilakka ixcham joylashadi va ko'ylak engi ichidan ajoyib ko'rinib turadi. Zanglamaydigan po'latdan ishlangan soat 799, o'ta engil titandan ishlangan modeli esa 899 dollar turadi.

 

“Jacob & Co. Astronomia Sky”

Bu soatga qarab, o'zingizga: «bilagimda nima turibdi? Men koinotda yashayapmanmi?» deb savol berishingiz tayin.  

Kompozitsiya markazida shar joylashgan bo'lib, u kun va tunni ko'rsatib turadi, tayanch paneliga joylashtirilgan halqa esa yulduzlar davriyligini ko'rsatadi. Ingichka pushti-tillarang halqacha shimoliy yarimsharda qaysi yulduzlar turkumi joylashganligini ko'rsatadi.

Kompaniya yiliga 25 donadan soat ishlab chiqarishni rejalashtirgan bo'lib, narxi tayyorlangan xomashyosiga qarab 540 mingdan 800 ming dollargacha bo'ladi.

 

“Citizen Eco-Drive One”

“Citizen” quyosh batareyalarida ishlovchi kvarts soatlari bilan tanilgan. “Eco-Drive” e'tiborga molik, chunki u quyosh batareyasida ishlaydigan dunyodagi eng yupqa soat: uning qalinligi atigi 2,98 mm.

Soatning bilagingizda ekanligi umuman sezilmaydi. Bundan tashqari, quyosh mexanizmi qorong'ulikda batareya quvvatini sakkiz soat davomida ushlab turadi. Kompaniya atigi 800 dona soat ishlab chiqaradi. Ularning narxi 6 ming dollar turadi.

 

“Hublot MP-07”

“MP-07”da vertikallashgan yurish mexanizmidan foydalanilgan va bu model mashina haydab ketayotganda  ko'rish qulay bo'lishiga moslashtirilgan.

Daqiqa va soat indikatori ostki chap burchakda, soniyalar yuqori o'ng burchakda, yurish zaxirasi pastki o'ng burchakda joylashgan. Ushbu modelning yurish zaxirasi 42 kunni tashkil etadi, bahosi esa 276 ming dollar turadi.