Daniyaning “Norshelland” klubi va Turkiya terma jamoasining hujumchisi Emre Mo'r “Borussiya” Dortmund klubi bilan 5 yillik shartnoma imzoladi.

Mo'r Daniyada tug'ilgan bo'lib, ushbu mamlakat o'smirlar terma jamoasida o'ynagan. Biroq Turkiya terma jamoasidan taklif olgach, o'z tarixiy Vatani sha'nini himoya qilishga rozi bo'lgan. O'tgan mavsumda Emre Daniya chempionatida 13 o'yinda maydonga tushib, 2 gol urgan. 

«Borussiya» klubining sport direktori Mixael Tsorkning gapiga qaraganda, Mo'r juda qobiliyatli va yuksak salohiyatga ega futbolchi. 

Eslatib o'tamiz, Emre Mo'r yaqinda e'lon qilingan Evro-2016 ning eng arzon futbolchilari ro'yxatida 1-o'rinni egallagandi. Uning narxi 100 ming evro deb belgilangan.