«Barselona» bosh murabbiyi Luis Enrike «Bavariya» himoyachisi Rafinyaga qiziqish bildirmoqda, deya xabar tarqatdi Mundo Deportivo.

Kataloniya klubi murabbiylar shtabi jamoa mudofaa chizig'ini kuchaytirishni istamoqda va bunda braziliyalik futbolchi klubga yordam beradi deb hisoblamoqda. "Ko'k-anorranglilar" faqat Rafinya nomzodi bilan cheklanib qolmoqchi emas.

Rafinya myunxenliklar safida etarli o'yin amaliyotiga ega bo'lmayapti. Boisi, u jamoa sardori Filipp Lam bilan raqobatlashishiga to'g'ri kelmoqda. Rafinyaning o'zi yaqinda bayonot berib, «Bavariya» bilan shartnomani uzaytirish haqida o'ylamayotganini ma'lum qilgandi. Futbolchining klub bilan amaldagi shartnomasi 2017 yilning yoziga qadar tuzilgan.

Germaniya chempionatining 8 turi yakuni bo'yicha Rafinya 5ta o'yinda maydonga tushgan bo'lsa, ulardan 3tasini asosiy tarkibda boshlagan. Bu bahslarda u bitta gol urdi va bitta golga uzatma berdi.