Hujum chizig'ini kuchaytirish maqsadida, Frantsiyaning “Lion” jamoasi belgiyalik Adnan Yanuzayni diqqat bilan kuzatib bormoqda. Ushbu mavsumda “Manchester Yunayted”dan “Sanderlend”ga ijaraga berilgan futbolchining “Lion”ga ko'chib o'tishi yaxshi fikrmi? Unchalik emas…

Asosiy tarkib o'yinchilaridan biri Rashid Gezzalning Afrika Millatlar Kubogidagi ishtiroki bois, “Lion” jamoasi uning o'rnini to'ldiradigan hujumchi yoki hujumni xush ko'ruvchi yarim himoyachi olishni ko'zlagan. Shu maqsadda frantsuz klubi Adnan Yanuzayni keyinchalik sotib olish huquqi bilan ijaraga olishni mo'ljallamoqda. 21 yoshli iqtidor egasi universal futbolchi hisoblanadi, hujumlarda qatnashish bilan birga, hujumchilarni qo'llab-quvvatlay olishi mumkin. Ajoyib texnika, tezlikka ega chapaqay futbolchi kelajagi porloq yosh futbolchilar qatoridan doimiy ravishda joy olib kelmoqda. Shu qobiliyatlari tufayli ham “Manchester Yunayted” klubi 2011 yilda 16 yoshli Adnan Yanuzayni “Anderlext”ning o'rinbosalar jamoasidan o'z safiga qo'shib olgandi. Ko'rinishidan hammasi yaxshidek ko'rinadi.

Ammo uning sport formasini ham esdan chiqarmaslik kerak. “Qizil iblislar” safidagi shov-shuvli debyutiga qaramasdan, u keyinchalik jamoa safida yo'qolib qoldi. Esingizda bo'lsa, 2013-yil 5-oktyabrda Premer Ligada asosiy tarkibda tushirilgan ilk o'yinidayoq, belgiyalik futbolchi dubl qayd etgan edi. Bu gollarni esa hozirgi klubi “Sanderlend”ga urgan! Mavsum oxiridagi ko'rsatkichi qanday edi? Chempionatda 27 uchrashuv o'tkazgan yosh iqtidor egasi 4ta gol urdi yoki boshqacha aytganda, o'sha dublga qo'shib yana ikkita gol kirita oldi, xolos. Keyingi mavsumda esa butunlay nursiz o'yin namoyish etdi. Mavsum yakunida uning hisobida hech qanday gol yo'q. Umumiy hisobda, “Manchester Yunayted” safida 63 uchrashuv o'tkazgan Adnan Yanuzay hisobida beshta gol va 4 golli uzatma bor. O'yin amaliyotiga va tajriba to'plashi uchun “Manchester Yunayted” 2015-yil yozida belgiyalik futbolchini “Borussiya” Dortmundga bir yilga ijaraga berdi. Adnan Yanuzay qadrdon klubiga to'rt oy o'tar-o'tmas qaytib keldi. Bundesligada asosiy tarkibdan joy ololmagan futbolchi 6 marta zahiradan tushirildi. Umumiy hisobda, 159 daqiqa o'ynadi va birorta gol ura olmadi. Keyingi olti oyni esa «qizil iblislar» o'rinbosarlar tarkibida o'tkazdi va asosiy jamoada 3 marta zahiradan o'yinga tushirilgan Yanuzay Premer Ligada bor-yo'g'i 17 daqiqa ishtirok etdi.

Ushbu mavsum boshida esa «Sandrlend»ga ijaraga ko'chib o'tdi. Hozircha uning yangi jamoasidagi ishlari ancha barqaror deyishimiz mumkin. Hozirgacha 13 ta o'yin o'tkazgan futbolchi shulardan 9 tasini asosiy tarkibda boshlagan va umumiy hisobda 877 daqiqa o'ynagan. Ammo u statistik ko'rsatkichlarini yaxshilay olgani yo'q. Uning hisobida na gol, na golli uzatma mavjud. Tabiiy savol tug'iladi, Yanuzay “noyob topilma”mi yoki shunchaki kelajagi porloq futbolchimi? Buni vaqt ko'rsatadi, albatta. Terma jamoadagi ishlari ham ko'ngildagidek emas. 2014-yildan buyon biror marta ham terma jamoa libosida o'ynagani yo'q. Frantsiya 1 Ligasida 4-o'rinda borayotgan «Lion» esa peshqadamdan bor-yo'g'i besh ochkoga ortda qolmoqda. Bunday paytda «Lion»ga kelajagi porloq, iqtidorli futbolchidan ko'ra tajribali, ishonchni oqlagan hujumchi olib kelingani ma'qulroq. Valbuena, Fekir yo bo'lmasam Korne ham bir oy mobaynida Gezzalning yo'qligini bildirmasliklari mumkin.