«Tyantszin Tsyuantszyan» yozgi transfer davrida Dortmundning «Borussiya» klubi hujumchisi Per-Emerik Obameyangni qo'lga kiritishga harakat qilmoqda.

Xitoy klubi 28 yoshli gabonlik futbolchining transferi uchun nemis jamoasiga 60 million evro bermoqchi bo'lsa, futbolchining o'ziga 20 million evro yillik maosh bilan 3 yillik shartnoma taklif qildi.

Avvalroq «Borussiya» Obameyangni 70 million evro evaziga qo'yib yuborishga tayyor ekani haqida xabar tarqalgandi. Futbolchiga APLning ayrim klublari va «PSJ» da'vogarlik qilmoqda.

Obameyang Germaniya chempionatining o'tgan mavsumida 30ta o'yinda maydonga tushib, o'z hisobiga 29ta gol yozdi.