«Manchester Yunayted» hujumchisi Ueyn Runi «Everton» mashg'ulot bazasiga tashrif buyurdi. Bu haqda Sky Sports xabar tarqatdi. Liverpulliklar yaqin kunlarda 31 yoshli futbolchi bilan shartnoma imzolangani haqida ma'lumot tarqatishlari mumkin.

«MYu» avvalroq «Everton» hujumchisi Romelu Lukakuni xarid qilgani haqida rasmiy ma'lumot tarqatishdi. Angliya OAVga ko'ra, Runi mazkur transferning bir qismi sifatida sobiq jamoasiga qaytdi.

«MYu» tarixidagi eng yaxshi to'purar faoliyatini «Everton»da boshlagan va 2004 yilda «qizil iblislar» safiga qo'shilgan. Runining mankunianliklar bilan shartnomasi 2018 yilgacha tuzilgan edi.