"Barselona" jamoasi bosh murabbiyi Luis Enrike qishki transfer oynasi davomida yana bir hujumchini sotib olish niyati borligi haqida Sport.es internet-nashri xabar bermoqda.

Ispaniyalik mutaxassis "Barselona" rahbariyatiga "Selta" hujumchisi Nolito, "Vilyarreal" a'zosi Denis Suares yoki "Red Bull Zaltsburg" forvardi Jonatan Sorianodan birini sotib olish kerakligini ma'lum qilgan. Ammo, klub rahbariyati bo'lajak transfer oynasida hech qanday harajat qilmasligini aytib o'tgan.  

Enrikening fikricha, "kataloniyaliklar" hujumchilaridan biri - Messi, Neymar yoki Suares jarohat olgan taqdirda, ulardan birining o'rnini bosa oladigan futbolchi kerak. Klub safida harakat qilayotgan hujumchilar Munir El-Haddodiy va Sandro Ramires hozircha Enrikening ishonchini oqlagani yo'q. Shu sababdan, "ko'k-anorranglilar" bosh murabbiyi klubga yangi hujumchini jalb qilmoqchi.

Ta'kidlash kerakki, Luis Enrike sotib olmoqchi bo'lgan futbolchilarning barchasi "Barselona" klubi a'zolari bo'lishgan.