Shubhasiz, Joze Mourino ustakor murabbiylardan biridir. U buni ko'p bora isbotlagan. Faqat shunisi borki, portugaliyalik mutaxassis evrofutboldagi eng serxarajat murabbiy hisoblanadi. Yo'q, bunda «Benazir»ning shaxsiy maoshi nazarda tutilmayapti. Albatta, u bu masalada ham etakchilar qatorida. O'z klubiga yangi futbolchilarni olib kelish yo'lida ko'p pul sarflash bo'yicha esa Joze Mourinoga tenglashadigani yo'q. E'tibor bering, u so'nggi 10 yilda klublar rahbariyatini naq 619 mln. funt sarflashga majbur etgan. Harqalay, «Chelsi», «Inter» va «Real» klublari Mourino bosh murabbiy bo'lgan davrda umumiy hisobda aynan shuncha summaga futbolchi xarid qilishgan. To'g'ri, o'z o'rnida aniqlashtirib o'tish lozimki, ayrim transferlar «Benazir»­ning tashabbusisiz amalga oshirilgan. Deylik, murabbiyning o'z so'zlariga ishonadigan bo'lsak, «Chelsi» Andrey Shevchenkoni uning roziligisiz sotib olgan ekan. Lekin fakt shuki, 3ta klub Mou boshqargan davrda yangi futbolchilar uchun aynan 619 million funt sarflagan.

Sovsport.ru saytining oxirgi 10 yillik bo'yicha tuzgan reytingiga tushgan boshqa mutaxassislar haqida ham xuddi shunday deyish mumkin. Ya'ni ular ham o'z nomlariga yozilgan transferlarning barchasida asosiy tashabbuskor bo'lishmagan. Lekin Aleks Fergyuson, Arsen Venger va Lui van Gal barcha transferlarda bevosita rol o'ynashgan. Umuman, reytingdan o'rin olgan o'sha Mourino, shuningdek, Rafael Benites va Xosep Gvardiola ham o'z hisoblaridagi xarajatlarning katta qismida tashabbus ko'rsatishgan. Ammo misol uchun aytsak, «Real» Danilo transferini Benites kelishigacha rasmiylashtirgandi. «Barselona» esa Zlatan Ibragimovichni Gvardiola xohishiga zid tarzda sotib olgan. Brendan Rojers nomiga yozilgan xarajatlar ham to'liq unga tegishli emas. Qolaversa, Roberto Manchini, Karlo Anchelotti va Manuel Pellegrinining transferlar bobidagi «erkalik»larini tushunish mumkin. Ular shunchaki, kerakli vaqt kerakli joyda ish boshlashgan - «Manchester Siti», «Real» va «PSJ» kabi serhimmat klublarda. Xullas, serxarajat murabbiylar reytingi rasmiy emas, lekin baribir, juda qiziqarli.

so'nggi 10 yilda transferlar uchun eng ko'p pul sarflagan murabbiylar

 

10-o'rin. Aleks FERGYuSON

Klubi: «Manchester Yunayted»

Umumiy xarajati: 281 mln. funt

Eng qimmatbaho 3ta xaridi: Dimitar Berbatov (30 mln.), Xuan Sebastyan Veron (28 mln.), Rio Ferdinand (27 mln.)

 

9-o'rin. Brendan ROJERS

Klublari: «Uotford», «Reding», «Suonsi», «Liverpul»

Umumiy xarajati: 287 mln. funt

Eng qimmatbaho 3ta xaridi: Kristian Benteke (32,5 mln.), Roberto Firmino (29 mln.), Adam Lallana (25 mln.)

 

8-o'rin. Arsen VENGER

Klubi: «Arsenal»

Umumiy xarajati: 333 mln. funt

Eng qimmatbaho 3ta xaridi: Mesut Ozil (42,5 mln.), Aleksis Sanches (35 mln.), Santi Kasorla (16 mln.)

7-o'rin. Lui van GAL

Klublari: AZ, «Bavariya», «Manchester Yunayted»

Umumiy xarajati: 337 mln. funt

Eng qimmatbaho 3ta xaridi: Anxel di Mariya (59,7 mln.), Antoni Martial (57,8 mln.), Lyuk Shou (31, 5 mln.)

 

6-o'rin. Rafael BENITES

Klublari: «Liverpul», «Inter», «Chelsi», «Napoli», «Real»

Umumiy xarajati: 376 mln. funt

Eng qimmatbaho 3ta xaridi: Gonsalo Iguain (34,5 mln.), Danilo (22,6 mln.), Mateo Kovachich (22,5 mln.)

 

5-o'rin. Xosep GVARDIOLA

Klublari: «Barselona», «Bavariya»

Umumiy xarajati: 382 mln. funt

Eng qimmatbaho 3ta xaridi: Zlatan Ibragimovich (40 mln.), Fransesk Fabregas (35 mln.), Davil Vilya (34,2 mln.)

 

4-o'rin. Roberto MANChINI

Klublari: «Inter», «Manchester Siti», «Galatasaroy»

Umumiy xarajati: 441 mln. funt

Eng qimmatbaho 3ta xaridi: Serxio Aguero (40 mln.), Edin Jeko (27 mln.), Samir Nasri (25 mln.)

 

3-o'rin. Karlo ANChELOTTI

Klublari: «Milan», «Chelsi», «PSJ», «Real»

Umumiy xarajati: 466 mln. funt

Eng qimmatbaho 3ta xaridi: Garet Beyl (85 mln.), Xames Rodriges (63 mln.), Fernando Torres (50 mln.)

 

2-o'rin. Manuel PELLEGRINI

Klublari: «Vilyarreal», «Real», «Malaga», «Manchester Siti»

Umumiy xarajati: 597 mln. funt

Eng qimmatbaho 3ta xaridi: Krishtianu Ronaldu (80 mln.), Kevin de Bryuyne (54 mln.), Rahim Sterling (49 mln.)

 

1-o'rin. Joze MOURIN'O

Klublari: «Chelsi», «Inter», «Real»

Umumiy xarajati: 619 mln. funt

Eng qimmatbaho 3ta xaridi: Diego Kosta (32 mln.), Andrey Shevchenko (30 mln.), Villian (30 mln.)

H. ZIYoEV tayyorladi