Qishki transfer oynasi ham yopildi. Xitoy klublari esa shov-shuv ko'tarishda davom etishmoqda. Xitoyliklar transfer rekordini yangilay olarmikan? Biz so'ngi 30 yildagi transfer rekordlari haqida to'xtalib o'tamiz. 

8,0 mln.evro. Roberto Donadoni (Italiya) «Atalanta» - «Milan» 1986 yil 
1986 yilda «Milan» klubi «Atalanta»dan Roberto Donadonini 8 mln.evroga harid qilib, transfer rekordini o'rnatgan edi. 

9,0 mln.evro. Aldair (Braziliya) «Benfika» - «Roma» 1990 yil 
Rekord 4 yildan keyin quladi. Bu safar Italiyaning boshqa bir klubi «Roma» yangi rekordchi jamoaga aylandi. Braziliyalik Aldair «Benfika»dan rimliklar safiga 9 mln.evro evaziga yo'l olgan edi. 

16,5 mln.evro. Janluka Vialli (Italiya) «Sampdoriya» - «Yuventus» 1992 yil 
Oradan ikki yil o'tgach, rekord transfer deyarli ikki barobarga ko'paydi. «Yuventus» «Sampdoriya»dan Janluka Viallini 16,5 mln.evroga sotib oldi. Bu Turin klubi uchun foydali harid bo'lgan edi. 

17,5 mln.evro. Dennis Bergkamp (Gollandiya) «Ayaks» - «Inter» 1993 yil 
Katta sahnada yana italyan klublari. Milanning «Inter» klubi «Ayaks»dan «uchmas golland» Dennis Bergkampni olish uchun, Amsterdamliklar hisob raqamiga 17,5 mln.evro o'tkazib berdi. Natijada Bergkamp eng qimmatbaho futbolchiga aylanadi. 

21,0 mnl.evro. Alan Shirer (Angliya) «Blekbern» - «Nyukasl» 1996 yil 
Alan Shirer Angliya chempionligini qo'lga kiritgach, «MYu»ning emas, «Nyukasl»ning taklifini qabul qilganligi ko'pchilikni ajablantirgan edi. «Qarg'alar» futbolchi uchun 21 mln.evroning bahridan kechishdi. Shirer bu pullarni to'laligicha oqladi.  

28,0 mln.evro. Ronaldo (Braziliya) «Barselona» - «Inter» 1997 yil 
1996 yilda «Oltin to'p»ni qo'lga kiritgan braziliyalik Ronaldo «Barselona»ni «Inter»ga alamshtirdi. Milanliklar Kataloniyaliklarga «fenomen» uchun 28 mln.evro to'lashdi. Ronaldo Italiyada 5 mavsum harakat qildi va jarohatlardan «boshi» chiqmadi. 

31,5 mln.evro. Denilson (Braziliya) «San-Paulu» - «Betis» 1998 yil 
Bir yildan so'ng Ispaniyaning kamtarona «Betis» jamoasi butun futbol jamoatchiligining diqqat e'tiborini o'ziga qaratib, «San Paulu»dan Denilsonni sotib oldi. Yana qanday narxga deng. 31,5 mln.evroga. Bunaqa mablag'ga futbolchi sotib olishni o'sha paytda grandlar eplay olmayotgan bir pallada, Andalusiyaliklar buning uddasidan chqiishadi. 

45,0 mln.evro. Kristian Veri (Italiya) «Latsio» - «Inter» 1999 yil 
1999 yilda Kristian Veri «Latsio»dan «Inter»ga yo'l oldi. Milan klubi hujumchi uchun 45 mln.evro to'ladi. Ta'kidlash joizki, Kristian o'zi uchun sarflangan pullarni oqlay oldi.  

60,0 mln.evro. Luish Figo (Portugaliya) «Barselona» - «Real» 2000 yil 
2000 yilda ispan nashrlari katta sensatsiya haqida bong urushdi. «Barselona» etakchisi Luish Figo «Real»ga 60 mln.evroga sotib yuborildi. Kataloniyalik muxlislar shokda. Portugaliyalik futbolchi «Real»da 5 mavsum to'p surib, 60 mln.ni tsentlarigacha oqlab ketdi. 

73,5 mln.evro. Zayniddin Zidan (Frantsiya) «Yuventus» - «Real» 2001 yil 
So'nggi 50 yillikning eng kuchli futbolchisi, futbol dahosi Zayniddin Zidan 2001 yilda Turinni Madridga almashtirdi. Albatta rekord summadagi transfer evaziga. «Real» «Yuventus»ga yarim himoyachi uchun 73,5 mln.evro mablag' to'ladi va bu to'lovi uchun hech qachon afsuslanmadi. 

94,0 mln.evro. Krishtianu Ronaldu (Portugaliya) «Manchester Yunayted» - «Real» 2009 yil 
Zidanning rekordi 8 yildan keyingina quladi. Peres «Real»ga qaytganidan so'ng, zudlik bilan «MYu»dan Krishtianu Ronalduni 94 mln.evroga xarid qildi. Ronni ham yuqoridagi futbolchilar singari o'zi uchun sarflangan harajatlarni to'laligicha oqladi va oqlashda davom ham etmoqda. 

Yusupov Furqat