Kirish | A'zo bo'lish

Futbol bo'yicha O'zbekiston Superkubogi uchun o'yin bo'lmaydi. Bu haqda mamlakat Professional Futbol Ligasi rahbari Farhod Magomedov 2017 yilgi mavsum uchun qur'a tashlash marosimida aytib o'tdi.

«2017 yil Superkubok o'yini o'tkazilmaydi. Chunki ‘Lokomotiv’ ham chempion bo'ldi, ham kubokni oldi. Shu boisdan o'yinga qiziqish bo'lmasa kerak», — deb aytib o'tgan Farhod Magomedov.

O'zbekiston chempioni bo'lgan futbol klubiga Mirabror Usmonov yordamida olib kelingan qimmatbaho metalli kubok topshiriladi

PFL rahbari Oliy Liga yoki O'zbekiston Kubogining qiziqish katta bo'lmagan o'yinlari o'tkazilishi yoki yo'qligi borasida fikr bildirmagan. O'zbekiston Superkubogiga qiziqish bo'lmaydi deb o'ylashga nima sabab bo'lgani ham ochiqlanmagan.

Qayd etish kerak, 2016 yilgi O'zbekiston Superkubogi O'zbekiston futzal termasining Jahon Chempionatiga yo'l olishi masalasini hal qiladigan Iroqqa qarshi o'yini kuni, aniqrog'i, 2016 yilning 17 fevral sanasida bo'lib o'tgandi. O'sha kuni O'zbekiston — Iroq o'yini uchun chiqarilgan barcha chiptalar sotilib, «O'zbekiston» majmuasiga kira olmay qolgan muxlislar ham topilgan. «Bunyodkor» stadionida bo'lib o'tgan Superkubok o'yinida esa stadionning o'ndan biri ham to'lmagan.

Ma'lumot uchun, O'zbekiston Professional Futbol Ligasi 2017 yilgi mavsum uchun reglament tuzib chiqmagan. Shunga qaramay, chempionat uchun qur'a tashlash marosimini o'tkazib ulgurdi. Tashkilot rahbari esa Superkubokni reglamentga asoslanmasdan yo'q qildi. Aniqrog'i, reglament katta ehtimol bilan shu qaror asosida o'zgartiriladi.

PFLning 2016 yilgi mavsum uchun tuzilgan reglamentida mamlakat chempionligi va kubogi 1 ta jamoaga nasib qilsa, u holda Superkubok uchun oltin va kumush medalni qo'lga kiritgan jamoalar kurash olib borishi ko'rsatilgan.

2016 yilgi mavsum avvalida O'zbekiston Superkubogi uchun bellashuv o'tkazilib, unda mamlakat chempioni «Paxtakor» O'zbekiston Kubogi g'olibi «Nasaf»ga qarshi maydonga tushgandi. Bellashuvda Artur Gevorkyan tomonidan urilgan yagona gol «Nasaf»ga g'alaba keltirgandi. Undan oldingi mavsum esa «Lokomotiv» Superkubok o'yinida «Paxtakor» darvozasiga 4 ta gol urgandi.

Reglament bo'yicha 2017 yilgi mavsumda ham Superkubok o'yini o'tkazilganida, unda «Lokomotiv» va «Bunyodkor» klublari o'zaro to'qnash kelishi kerak edi.

— deya xabar beradi Tribuna nashri.

Do`stlarbilan baxam ko`rish: