O'tgan yili APLdagi eng yaxshi transferlardan biriga aylangan Paye «Vest Xem» ishqibozlari ko'nglidan joy olishga ulgurdi. Xo'sh, Angliya chempionatiga moslashish uning uchun oson bo'ldimi? Yangi klubida o'zini qanday his etmoqda? Evro-2016da milliy termasi safidan o'rin egallashga umid qilyaptimi? Dimitri FourFourTwo nashriga intervyu berish chog'ida ushbu savollarga javob qaytardi.
Qoyilmaqom dribling, raqib himoyasini yorib o'tadigan aniq uzatmalar, jarima zarbalaridan darvozaning yuqori burchagini ajoyib tarzda ishg'ol qilish - endilikda Payening sifatlaridan hamma xabardor. Vaholanki, iyunda premer-ligaga tashrif buyurarkan, Dimitri unchalik mashhur futbolchi emasdi. Aynan shu omil unga qo'l keldi.
- Inkor etmayman: tumanli o'lkadagilarning meni tanimasligi ushbu chempionatga moslashishimda muhim omil bo'ldi, - deydi Paye. - Transferga katta pul (10,7 mln. funt) sarflanganiga qaramay, ortiqcha bosimni his qilmadim, shunchaki, o'z ishim bilan shug'ullanaverdim. Go'yoki, yana yosh va notanish futbolchiga aylanib qolgandek edim. Biroq keyinchalik hamma aslida qanday o'yinchi ekanimni tushunib bordi.
Paye har doim ham yangi jamoasiga bunchalik oson kirishib ketmagan. Ayniqsa, Frantsiyada barqarorlikka erishishi qiyin kechgan. Har gal moslashish uchun vaqt kerak bo'lardi - bitta uchrashuvda ko'p jihatdan mukammal o'yin namoyish etsa, keyingi safar maydonda yo'qolib qolardi. Mazkur holat 12 oydan so'ng o'zgara boshladi. «Sent-Etenn», «Lill» va «Marsel»dagi ilk mavsumning 100ta bahsida Paye 14ta gol urib, 12 marta golli uzatma muallifiga aylangan. Ko'rsatkichlar vaziyatdan dalolat berib turibdi.
«Vest Xem»da esa u go'yoki «bolg'achilar» libosida maydonga tushishni butun umr orzu qilgan futbolchidek to'p surmoqda.
- O'ylashimcha, shunchaki, ulg'aydim, - deydi Dimitri. - Yosh o'tgani sari tajriba to'planib, o'zingni turli vaziyatlarda qanday tutishni o'rganasan. «Marsel»da o'tkazgan ikki mavsumim (2013-2015) faoliyatimda hal qiluvchi ahamiyat kasb etdi. Ushbu klubdagi o'yinchilarga nisbatan bosim shu qadar kuchliki, o'z vaqtida muvozanatni saqlab, har bir bahsda o'zingning eng yaxshi o'yiningni ko'rsatishing talab qilinadi. Bir soniyaga bo'lsada bo'shashishga haqqing yo'q. Xullas, «Marsel»dagi chig'iriqlardan muvaffaqiyatli o'tdingmi, demak boshqa klubda yo'qolib qolmasliging kafolatlanadi.
- «Marsel»dagi ikkinchi mavsumim men uchun omadli kechdi (16ta samarali to'p uzatishni amalga oshirgan Paye Liga 1ning eng yaxshi assistentiga aylandi). Slaven Bilich Frantsiyada qanday o'ynagan bo'lsam, «Vest Xem»da ham shunday harakat qilishimni xohladi - jamoa o'yinini tashkil etish, maydondagi erkinlikni yo'qotmay, raqib darvozasi yaqinida aql bilan ish tutish. Qisqasi, mendan «Marsel»dagi ishimni davom ettirishim so'ralayotgandi. O'ylashimcha, ushbu omil londonliklar o'yiniga tezda moslashishimda asqotdi.
Lekin baribir, uning o'yiniga ayrim o'zgartirishlar kiritishga to'g'ri keldi - premer-liga Evropadagi boshqa chempionatlardan farqli o'laroq, jismoniy holat bo'yicha talabchanroq.
- Angliyada jismoniy tayyorgarlik, shiddat va tezlik Liga 1dagiga nisbatan yuqori, - deydi Paye. - Qisqa muddat ichida moslashishga to'g'ri keldi. Texnikaning bo'lgani yaxshi, ammo jismoniy tayyorgarliksiz tumanli o'lka maydonlarida natija ko'rsatish qiyin. Milliy terma yig'in o'tkazayotgan kezlari APLda to'p suradigan futbolchilar Angliyada oddiy o'yinlarning yo'qligi, har bir jamoada darajasi yuqori o'yinchilar borligi, qishda tanaffus berilmasligi tufayli katta kuch sarflanishi haqida ko'p gapirishardi. Xullas, meni nima kutayotganini tushunib turardim.
Davomi InterFUTBOL gazetasi blogida.
— deya xabar beradi uff.uz nashri.