Futbolchilarni arzon narxda qo'lga kiritib, keyinchalik ularning narxini keskin oshirishda Germaniya klublari peshqadamlar qatorida yurishadi. FootballHD.ru bu gal «Borussiya» Dort­mundning transfer bozoridagi muvaffaqiyatlari haqida so'z yuritadi.
Hozirda ushbu klub futbolchilar sotib olishga katta pul sarflay oladi. Vaholanki, yaqin o'tmishda dortmundliklarda yuzaga kelgan qarzdorlik har bir jabhada iqtisod qilishni taqozo etgandi. Ammo «Borussiya» futbolchilarga katta pul sarflash muvaffaqiyatning asosiy omili emasligini isbotlab berdi.
Robert Levandovski - 2010|2011 yillar mavsumi
Bahosi: 4,7 million evro
Avvalgi klubi: «Lex»
Statistikasi: bundesligada 131ta o'yin (74ta gol)
Levandovskining «Bavariya»ga o'tishi haqida ko'p gapirilgan, ammo ushbu futbolchini bugungi ro'yxatga kiritmasak adolatdan bo'lmasdi. «Borussiya»ning yuksalish davridagi ramzlardan biriga aylangan polshalik hujumchini qaysidir ma'noda Dortmundning Gerd Myulleriga qiyoslash mumkin. 22 yoshida bundesligaga kirib kelgan Levandovski uchun ushbu chempionatga moslashish uchun bir mavsum kifoya qildi. Keyinchalik aynan Robert­ning bevosita yordami evaziga «qovog'arilar» 2011|2012 yillar mavsumida qatorasiga ikkinchi chempionlikni nishonlashdi, mamlakat kubogi finalida «Bavariya» 5:2 hisobida mag'lub etilgach, bosh sovrinni qo'lga kiritishdi. O'sha o'yinda polshalik forvard «xet-trik» muallifiga aylandi. Levandovski rivojlanishda davom etaverdi, «Borussiya» esa kelgusi mavsum EChL finaligacha etib bordi. Robert o'sha yili mazkur turnirning yarim finalida «poker» qayd etdi. Jabrdiyda - «Real».
Keyinchalik dortmundliklar yangilanishga ehtiyoj sezishdi, go'yoki, Klopp jamosi o'zining eng yuksak cho'qqisini zabt etib bo'lgandek edi. Gyottse Myunxenga ketgach, dortmundliklar undan xafa bo'lishdi. 2014 yilning yanvariga kelib esa Levandovski ham «Bavariya» libosini kiydi. Mazkur transferdan «Borussiya»­ga hech nima tegmadi, zero polshalik futbolchi klubni erkin agent sifatida tark etgandi. Shunga qaramay, Robertga sarflangan 4,7 million evro Dortmund jamoasi tarixidagi eng omadli xarajatlardan biriga aylangani aniq.
Mats Xummels - 2008|2009 yillar mavsumi
Bahosi: 4,2 million evro
Avvalgi klubi: «Bavariya»
Statistikasi: bundesligada 215ta o'yin (19ta gol)
Bunga ishonish qiyindir, ammo «Bavariya» bir vaqtlari Brenoni sotib olish maqsadida o'z tarbiyalanuvchisi - Mats Xummelsdan voz kechgan. Yashash xonadoniga o't qo'yganlikda ayblanib, qamoqqa olingan braziliyalik himoyachi yaqinda ozodlikka chiqdi. Xummels esa hozirda Dortmundning «Borussiya» klubi sardori hisoblanadi.
Matsning salohiyatini o'z vaqtida payqagan Yurgen Klopp uni himoya markazida Subotich bilan yonma-yon o'ynatishga qaror qildi. Hozir «Liverpul»ni boshqarayotgan mutaxassis adashmabdi - ushbu juftlik hozirgi kunda dortmundlik ishqibozlar ishonchini oqlamoqda. Qishda Tuxel bilan chiqisha olmayotgani tufayli Xummelsning tez orada transferga qo'yilishi haqida gap-so'zlar urchidi. Ammo Mats o'z klubiga sodiq, hech qaerga ketmasa kerak. Har holda, u jarohatlar tufayli himoyachilaridan ayrilgan «Bavariya»ning taklifini rad etdi.
Sebastyan Kel - 2001|2002 yillar mavsumi
Bahosi: 3,2 million evro
Avvalgi klubi: «Frayburg»
Statistikasi: bundesligada 274ta o'yin (20ta gol)
Sebastyan Kel - «Borussiya» uchun alohida ahamiyat kasb etuvchi shaxs. Mubolag'aga yo'ymang-u, klubning haqiqiy afsonasiga aylangan, uning obro'siga manaman degan tanqidchilar ham shubha qilishmasligi ta­yin. O'z vaqtida Kelni Daysler singari nemis futbolining asosiy iqtidorlari sifatida e'tirof etishgan, biroq ularning har ikkisiga rivojlanish yo'lida jarohatlar pand bergan. Umuman olganda esa, Kelning faoliyati adashinikiga nisbatan muvaffaqiyatliroq kechgan.
U «Borussiya»ga kelishi hamono mojarolarga to'qnash kelgan. «Frayburg»dagi bir yarim mavsumida 40ta o'yinda ishtirok etgan futbolchiga «Bavariya» jiddiy qiziqish bildirib, hattoki, u bilan boshlang'ich shart­nomani tuzishga ham ulgurgandi. Ammo keyinchalik Kelning fikri o'zgarib, Dortmundga yo'l olishga qaror qildi va shu tariqa, Uli Xyonessning g'azabiga uchradi. Sebastyan bu qaroridan mutlaqo afsuslanmagan bo'lsa, ajabmas, zero dastlabki mavsumning o'zidayoq «Borussiya» safida Germaniya chempionligini qo'lga kiritdi.
Keyinchalik unga ketma-ket olingan jarohatlar xalal berdi, lekin baribir, Kelning aqlli o'ynashi, har qaysi yarim himoyachilar yo'lini o'z vaqtida to'sa olish qobiliyatiga hech kim shubha qilmasdi. 2008 yili Yurgen Klinsmann yana bir bor Kelni «Bavariya»ga olishga urinib ko'rdi. Futbolchining shartnomasi yakunlanganini inobatga olsak, mazkur kelishuv myunxenliklar uchun tekinga tushishi mumkin edi. Biroq Sebastyan yana rad javobini berdi va oxirigacha «Borussiya»ga sodiq qoldi. Kel 2015 yili 35 yoshida professional faoliyatiga yakun yasadi.
Davomi InterFUTBOL gazetasi blogida.
— deya xabar beradi uff.uz nashri.