Gretsiya futbol federatsiyasi FIFA va UEFAga a'zolikdan mahrum qilinishi mumkin.
Bunga sabab sifatida mamlakat futbol federatsiyasi ishiga hukumat tomonidan aralashish bo'layotgani ko'rsatilmoqda. Gretsiya Kubogi doirasida PAOK va «Olimpiakos» o'rtasida kechgan bahs davomida muxlislar o'rtasida janjal kelib chiqqani tufayli hukumat qaroriga ko'ra Kubok bahslari to'xtatib qo'yilgan edi.
Uchrashuvda 1:2 hisobi qayd etilib turgan vaqtda hakam «Olimpiakos» darvozasiga penalti belgilamagan va buning o'rniga PAOK futbolchisini maydondan chetlatishga qaror qilgan. Oqibatda muxlislar avval maydonga petarda otganlar, so'ngra politsiya bilan mushtlashuv boshlaganlar.
Gretsiya hukumati Kubok o'yinlari qayta o'tkazilmasligini ma'lum qilgach, UEFA va FIFA bu qarordan voz kechishga chaqirdi. Hozircha bu qaror bajarilmagan va Gretsiya a'zolik huquqidan mahrum etilishi mumkin.
— deya xabar beradi uff.uz nashri.