Angliya premer-ligasining yaqinda bo'lib o'tgan «Liverpul» va «Kristal Pelas» jamoalari bahsda juda qiziq holat kuzatildi. Ya'ni, «Selxerst Park»dagi o'yinning so'nggi soniyalari o'tib borayotgan bir paytda hisob 2:2 bo'lib turgandi.
Shunda «qizillar» hujumchisi Kristian Benteke «Kristal» jarima maydonchasiga to'p bilan yorib kirdi-da, himoyachi Dileyniga «urilib»,  erga quladi. Tan olish lozim, mazkur vaziyatda belgiyalik forvard juda «o'xshatib» yiqilgandi. Natijada, Andre Marriner 11 metrlik nuqtaga ishora qildi. Takroriy vaziyat namoyish etilganidan so'ng esa ko'pchilik hayratda qoldi. Zero, bu vaziyatda Benteke «artistlik»ni rosa qiyomiga etkazib ijro etgandi.
 Penalti tufayli «Liverpul»ning g'alabasi bilan yakunlangan o'yindan so'ng tumanli o'lka tahlilchilari va futbol muxlislari ikki guruhga bo'linib qolishdi. Ya'ni, ularning ba'zilari «Liverpul» hujumchisi simulyatsiya ishlatdi, degan fikrda, qolganlar esa Dileyni chindan ham Bentekeni yiqitgan, deb hisoblashmoqda. Ehtimol, himoyachi Bentekega salgina tegib ketgandir. Lekin vazni 90 kilogrammlik hujumchining yiqilishiga bu sabab bo'lolmasdi, bizningcha. Xullas, mazkur voqea sabab FootballHD.ru sayti zamonamizning «artistlik mahorati»dan benasib bo'lmagan futbolchilari ro'yxatini tuzib chiqdi. Albatta, bu hamma uchun qiziqarli tuyulsa kerak...
Oskar
Aslini olganda, «Chelsi» yarim himoyachisi - o'z avlodining eng kuchli vakillaridan biri. Lekin eng yaxshilarda ham kamchiliklar uchrab turadi. Masalan, Oskar haliyam maydonda «o'xshatib» yiqilishlar va haqiqiydek tuyuladigan «dod-voy»lar shaydosi. O'zi bunday odat deyarli har bir braziliyalik futbolchida uchraydi va Oskar ham bundan mustasno emas. Hattoki, shogirdlari uchun har doim «qalqon» vazifasini o'tovchi Joze Mourinodek inson ham o'z vaqtida Oskarni «Sautgempton»ga qarshi o'yin vaqtida ishlatgan simulyatsiyasi uchun qattiq tanqid qilgandi. Shundan so'ng futbolchi ancha o'zini tutib oldi, lekin oradan biroz vaqt o'tgach, yana «eski hunar»ini boshladi. Avvaliga u APL doirasidagi «Stok Siti»ga qarshi bahsda penalti ishlab olishga urindi. Keyin esa JCh-2014ning Gollandiya termasiga qarshi o'yinida ham hakamlarni aldashga harakat qildi.
Aren Robben
«Bavariya»ning tajribali vingeri penalti yoxud jarima zarbasi ishlab olishga juda ko'p urinib ko'rgan. Boz ustiga, Robben simulyatsiya bo'yicha alohida «iqtidor»ga ega: u yiqilish chog'ida boshqalarga o'xshab shunchaki yumalamaydi. Aksincha, u avval erga urilib, keyin havoda «parvoz» qiladi. Robbenning simulyatsiya vaqtidagi «uchishi» shunchalik mashhurki, ulardan qiziqarli fotomaqola tayyorlash unchalik qiyin emas. Muammo shundaki, uning g'ayritabiiy yiqilishi tufayli aksariyat hakamlar jarima zarbasini belgilashmaydi. Robben, tushunsang-chi axir, insonlar juda xohlashgan taqdirlarida ham ucha olmaydilar!
Frank Riberi
«Bavariya»dagi bu ajoyib juftlikni umuman bir-biridan ayro qo'yib bo'lmaydi. Ehtimol, siz Frank Riberi qanchalik iqtidorga ega ekanini unutib ham qo'ygandirsiz. Chunonchi, Frank doim jarohatlar girdobida yuradi. Lekin shunisi qiziqki, u soppa-sog' paytlarida ham o'zini jabrdiydadek ko'rsatishga ustasi farang. To'g'ri, uning yuziga qarab, shunday hiyla ishlatishiga ishonish qiyin, ammo fakt faktligicha qolaveradi: Riberi ham do'sti Robben singari birinchi imkoniyatdayoq maydonga «jon deb» qulaydigan futbolchilar toifasidan.
Diego Kosta
Asli kelib chiqishi Braziliyaga borib taqaluvchi ispaniyalik bu futbolchi Diego Simeonening eng yorqin «kashfiyot»laridan biri. Zero, Kosta aynan «Atletiko» libosida yaxshilik va yomonlik o'rtasidagi chegarani topib olgan. Uning turli xurmacha qiliqlarini ilgari faqat La-liga bahslarida ko'rgan bo'lsak, 2014|2015 yillar mavsumiga kelib Angliya ham hujumchi bilan yaxshigina tanishib oldi. E'tiborlisi, Diego «Atletiko»da qanday harakat qilgan bo'lsa, tumanli o'lkada ham xuddi shunday o'ynamoqda: tuhmatlar, hakamga sezdirmay raqiblarga zarba berishlar va shubhasiz, simulyatsiyalar...
Bu jihatdan olib qaralsa, Kosta va «Chelsi» bir-biriga juda mos tushgan. Chunonchi, o'tgan mavsumda «ko'klar» simulyatsiya uchun olingan ogohlantirishlar borasida etakchilik qilishdi. Tabiiyki, sariq kartochkalarning ko'pi Kostaga tegishli edi.
Dani Alves
Dunyodagi eng mohir qanot himoya­chilaridan biri «simulyatsiya san'ati»ni shu qadar yaxshi o'zlashtirganki, ba'zi holatlarda Alvesning dodlashini ko'rib, «o'pkasi bilan yuragi almashib qoldi-yov» deb xavotirga tushadi odam. Jumladan, «El Klasiko»larning birida braziliya-lik himoyachi Pepe bilan to'qnashuv chog'ida o'zini shunday tutgandiki, maydondagi hakam uning «og'riqdan bujmayib ketgan» basharasini ko'rib, Pepeni o'yindan chetlatgandi. Vaholanki, bu vaziyatda portugaliyalik futbolchi raqibiga hatto teginmagandi ham.
Xordi Alba
«Barselona» ishqibozlari bizni kechirsinlar-u, ammo chindan ham Kataloniya jamoasida «artistlar» ko'plab topiladi. Biz yana davrimizning eng mohir «aktyori» bo'lmish Serxio Buskets haqida so'z yuritmayapmiz. Bilganimiz shuki, Xordi Albani la-ligada Gollivuddagi familiyadoshi, mashhur aktrisa sharafiga «Jessika» deb atashadi. Mana, yaqinda ham Alba EChLning «Arsenal»ga qarshi kechgan 1|8 final o'yinida «hunar» ko'rsatdi. Londonlik muxlislar esa tabiiyki, uni «Jessika, Jessika» deya «olqishlab» qo'yishdi.
Eshli Yang
Bundan 5 yillar avval Eshli Yang APLdagi eng xaridorgir futbolchilardan biri edi. Uzoq davom etgan muzokaralardan so'ng u nihoyat, «Manchester Yunayted» klubiga nasib qildi. «Old Trafford»ga kelganidan keyin esa tezkor yarim himoyachi «bosh simulyant» «unvoni»ga ega chiqdi. To'g'ri, hozirga kelib, Yang ancha quyulib, avvalgidek ko'p yiqilmaslikni o'rganib oldi. Lekin bu asosan, van Galning ta'siri desak, to'g'ri bo'lardi. Avvallari esa Eshli deyarli har bir o'yinda «parvoz qilib», ishqibozlar tomonidan mazax qilinardi. Hattoki, ko'pgina futbolchilar unga «Eshli Simul YaNG» deb nom qo'yib olishgandi. Havas-da...
Garet Beyl
Uelslik futbolchining «sahna ko'rinishi» asosan ikki xil: qorinni changallab yiqilish va oyoqlarini ushlab yumalash. Bu harakat haqiqiydek tuyulmasa-da, ancha samarali hisoblanadi. Ta'kidlash lozim, Beyl «hiyla» ishlatishni «Tottenxem»dayoq boshlagan. Jumladan, u 2012|2013 yillar mavsumida APL­da  ettita kartochkani aynan «artist­lik mahorati» uchun ishlab olgan. Futbolchining o'zi esa bundan norozi.
- Men hech qachon «hiyla» ishlatmayman. Shunchaki, jarohatdan qochish uchun oyoqlarimni ehtiyot qilaman, xolos, - deydi Beyl.
Garet «Real»ga o'tganidan so'ng uning yiqilishlarida kishini ishonishga majbur qiladigan yangi jihatlar paydo bo'ldi. Ehtimol, u bularni asosiy hamkori -  Krishtianu Ronaldudan o'zlashtirgandir?...
Davomi InterFUTBOL gazetasi blogida.
— deya xabar beradi uff.uz nashri.