2015 yilning 17-18 oktyabr kunlari Angliyaning Manchester shahrida Taekvondoning WTF yo'nalishi bo'yicha jahon Gran-Prisining uchinchi bosqichi o'tkazildi.
2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari uchun reyting ochkolari o'ynalgan mazkur nufuzli musobaqada hamyurtimiz, amaldagi jahon chempioni Dmitriy Shokin (+80 kg) oltin medalga sazovor bo'lib, 40 reyting ochkosiga ega bo'ldi.
Ushbu muvaffaqiyat Dmitriyga eng og'ir vazndagi taekvondo ustalarining dunyo reyting tasnifida birinchi o'riniga ko'tarilib olishiga zamin yaratdi.
Dmitriy Shokin saralash bahslarida Koreya va Eron kabi sharq yakkakurashining ushbu turi taraqqiy etgan davlat vakillarini yirik hisoblarda mag'lub etdi. Hal qiluvchi final jangida esa kubalik Rafael Kastiloga hech qanday imkoniyat qoldirmadi va dunyoda tengsiz ekanligini yana bir bora amalda isbotladi.
Og'ir vazndagi sportchilarning dunyo reytingida Dmitriy Shokindan keyin ikkinchi o'rinni egallab turgan yana bir hamyurtimiz, jahon chempionati kumush medali sovrindori Jasur Boyqo'ziev garchi Manchester Gran-Prisida sovrindorlar safidan joy ololmagan bo'lsada, dunyo reyting jadvalidagi mavqeini yo'qotgani yo'q.
Manchester Gran-Prisida ishtirok etgan yana ikki nafar yurtdoshimiz Maksim va Nikita Rafalovichlar ham sovrindorlar safidan joy olishmadi.
Ma'lumot uchun. Jahon Gran-Prisi yil davomida o'tkaziladigan to'rtta yirik musobaqadan iborat bo'lib, birinchi turnir Moskva shahrida, ikkinchi musobaqa Turkiyaning Samsun shahrida o'tkazildi. Jahon Gran-Prisining yakuniy final musobaqasi dekabr oyida Meksikada bo'lib o'tadi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.