Farg'onada bo'lib o'tgan Oliy Liga 5-tur doirasidagi “Neftchi” – “So'g'diyona” (0:1) o'yinidan so'ng farg'onaliklar ustozi Andrey Fyodorov o'z fikrlari bilan o'rtoqlashdi. “O'yinni o'ylagan rejalarimiz asosida boshladik. Lekin bugungi uchrashuvda omadimiz kelmadi. Yigitlarda o'ziga bo'lgan ishonch etishmayapti. Oxirgi o'yinlarga qaraganda, bugungi o'yinda gol kiritish mumkin bo'lgan vaziyatlar ko'proq bo'ldi. Biroq vaziyatlarni yakunlash borasida oqsadik. O'yin duranga mos edi. “Neftchi” futbolchilari tushkun holatdan endigina tiklanyapti. Sekin-asta o'yinimiz topib boramiz deb o'ylayman. Natija uchun esa muxlislardan uzr so'rayman. O'yindan so'ng muxlislar mendan iste'fo talab qilib xayqirishdi. Agar meni ketishim jamoani ayni paytdagi holatini yaxshilasa, men ketishga tayyorman. Biroq iste'foni rahbariyat hal etadi. Agar menga ishonch bildirishda davom etishsa, oxirgacha ishlashga tayyorman. Ochig'i, bu mavsum omad bizdan ochiqchasiga yuz ugirmoqda. Mavsum avvalida jamoaga kuchli futbolchilarni jalb qilishga harakat qildik. Biroq ularning bizga qo'ygan talablari to'g'ri kelmadi. Selektsiya masalasida hammasi ham murabbiylar shtabiga bog'liq emas. O'zimiz taklif qilgan futbolchilar esa jamoada kuchli raqobatni yuzaga keltira olishmayapti. Bizga jamoani o'z ortidan etaklay oladigan futbolchilar zarur. Albatta davralar oralig'ida o'zgarishlar bo'ladi. Xozirdanoq xar bir chiziqqa saviyali futbolchini taklif qilishni reja qilyapmiz. Evgeniy Cheremesinni ortga qaytarish? Ha, u bilan aloqada bo'lib turibmiz. Biroq u ham ortga qaytsa, faqat OChLda o'ynaydigan klubga kelishini ma'lum qilyapti. Hammasini vaqt ko'rsatadi. Endi “Mash'al”ga qarshi bahsga tayyorgarlikni boshlaymiz”, - dedi Fyodorov. “Neftchi” matbuot xizmati
— deya xabar beradi uff.uz nashri.