Farg'onada bo'lib o'tgan Oliy liga 5-tur doirasidagi “Neftchi”  – “So'g'diyona” (0:1) bahsidan so'ng mehmonlar ustozi Davron Fayziev o'yin haqida fikr bildirdi. “Qiziqarli uchrashuv bo'ldi. Yigitlarga rahmat aytaman. Bergan ko'rsatmalarimni to'g'ri bajarishdi. “Neftchi”ni jiddiy o'rgandik. Raqib o'yinlari yozilgan videolar ko'rib chiqdik va shunga yarasha tayyorlandik. O'yin kuni ertalab matbuotda “Neftchi” – “So'g'diyona” bahsi prevyusini o'qib chiqdim va futbolchilarga ham ko'rsatdim. Farg'onadagi statistikalarimiz yaxshi emasligini saytda oynadek ko'rsatib qo'yishgandi. O'ylab qarasam, haqiqatdan ham “Neftchi” uyida faqat bir marta g'alaba qozongan ekanmiz. Mana shu bitti g'alaba va bitta durang o'zim boshchiligimda qo'lga kiritilgan ekan. Orzuga ayb yo'q deya Farg'onaga g'alaba qozonish uchun kelgandik. Hayriyat, o'yin yakuni biz uchun omadli keldi va g'alabani ilib ketdik. Bugungi uchrashuv shunday zaylda o'tdiki, bitta gol hammasini hal qilardi yoki duranga tortadigan bellashuv bo'ldi. Lekin Farg'onada xech bir raqib osonlikcha ochko olib ketmasligini ta'kidlab o'tmoqchiman. Bugun bizga ham og'ir bo'ldi. Faqat o'yin yakuni Jizzax klubiga omadli bo'ldi, – dedi jizzaxliklar ustozi. Shundan so'ng, “So'g'diyona” ustozi jurnalistlarni bir qator savollariga javob qaytari.   - Davron aka, “Neftchi” haqida qanday fikrdasiz? - Raqib o'yinini taxlil qilmayman. Bu savolni ochiq qoldiraman. Xozir xar qanday klub bilan o'ynasa, natija uchun harakat qilsa bo'ladi. “Neftchi”ga esa faqat omad tilab qolaman. - Savolni boshqacha bermoqchiman. Agar xozir siz raqib bosh murabbiyi bo'lganingizda nimalarga e'tibor qilganlar bo'lardingiz? - “Neftchi” bosh murabbiyi bo'lish haqida xatto o'ylab ham ko'rmaganman. Bu savolga tez javob berish qiyin. Fikrimcha, “Neftchi”ning hujum chizig'iga e'tibor qilish lozim. Qachonki, hujumda ishlaring yaxshi bo'lsa, himoya ham shunga yarasha ishonchli o'ynay boshlaydi. To'g'ri “So'g'diyona” o'yin oxirida to'liq himoyalandi. Chunki hisob bizni qoniqtirardi. Oxirdagi gol ham bo'lmaganda, durang ham rozi edik. Futbol muxlislar uchun o'ynaladi. Kimlardir aytadi “futbolda natija muhim”. Yo'q, muxlislar stadionga kelganga yarasha chiroyli futbol ham ko'rishi lozim, - dedi Fayziev. “Neftchi” matbuot xizmati
— deya xabar beradi uff.uz nashri.