O'zbekiston terma jamoasi hujumidagi muammolar haqida gapirish juda urf bo'lgan. Hatto, Maksim Shatskixdek hujumchi asosiy tarkibda o'ynagan vaqtlarda ham ayni odat bor edi. Ammo ba'zan shunday tuyuladiki, bu kabi muammolarni ba'zan o'zimiz kuchaytirib olayotgandekmiz.
Yuqoridagi gap bilan muammo aslida mavjud emas, demoqchi emasmiz. U mavjud. Darhaqiqat, mavjud. Bo'lganda ham nafaqat hujum, balki himoya, yarim himoya va kerak bo'lsa, darvoza chizig'ida ham bor. Shunchaki, terma jamoa shu kunga qadar faqat o'zidan kuchsiz jamoalar bilan o'ynab kelgani tufayli ham hozircha bor bo'yi bilan ko'zga tashlangani yo'q. Ammo hatto shunday kuchsiz raqiblar bilan bo'lgan o'yinlarda ham hujumdagi muammolar ko'rinib qoldi. Shu sababli ham ular haqida gapirish urf bo'lgan. Asl muammolar ko'lami qay darajada chuqurligi esa JCh saralashining uchinchi bosqichida namoyon bo'ladi. Mana 25 yildirki, bu tarix takrorlanib keladi.
Xo'p, bu safar voqealar rivoji qanday bo'larkin? Magarki, muammolar davom etayotgan ekan, uni o'nglash yo'li ham bormi? Bor, albatta. Hozir shu haqda bir-ikki mulohazani e'tiboringizga havola etsak.
Yuqorida muammolar nafaqat hujum, balki darvoza, himoya va yarim himoyada ham borligini bildirdik. Qisqa qilib aytganda - butun jamoada kamchilik etarli. Qiziq tomoni esa shundaki, bu kamchiliklar futbolchilar bilan bog'liq emas. Ya'ni, bizda Osiyo darajasida raqobatbardosh jamoa yaratish uchun etarli bo'lgan kadrlar bor. Shunchaki, ulardan to'g'ri foydalanish kerak. Hozir yana bir bor Samvel Babayan termaga jalb etayotgan futbolchilarni shubha ostiga qo'yishni istamaymiz. Shusiz ham bu haqda ko'p gapirdik va Lobanov yoki Andreevdan kuchliroq futbolchilar O'zbekistonda etarlicha topilishiga hamon ishonamiz. Ammo biz ishonganimiz bilan boshqalar, ya'ni murabbiylar shtabi ishonmagach, bundan hech qanday naf yo'q.
Ikkinchi muammo, bu - o'rtoqlik o'yinlarining kamligi. Jamoani jamoa qiladigan narsa bu - kuchli raqiblarga qarshi o'tkaziladigan o'rtoqlik o'yinlari. Buni ham tushunib turibmiz, ammo Terma jamoalar markazi tushunmagani uchun bizning urinishlarimiz besamar. Avstraliya yoki Janubiy Koreyaga duch kelishdan oldin imkoniyatimiz qay darajadaligini faqat saviya jihatidan ularga teng keladigan raqiblar bilan bo'ladigan nazorat bahslarida bilib olishimiz mumkin. Shunda ham bir shart - bunday o'yinlar Toshkentda o'tkazilishi lozim. Chunki yaxshi bilamiz, futbolchilarimiz oyog'i o'z muxlislari qarshisida kechadigan muhim bahslarda ancha qaltiraydigan bo'lib qolgan. Bu esa tajribasizlikdan dalolat. Takrorlaymiz - O'zbekiston milliy terma jamoasiga o'z muxlislari qarshisida to'p surish tajribasi etishmaydi. Chunki futbolchilar Toshkentda faqat rasmiy bahslarda maydonga tushganlari boisidan ba'zan hayajon bosilishi uchun 90 daqiqa ham etmay qolganiga guvoh bo'lganmiz. Shunday ekan, JCh saralashi uchinchi bosqichi oldidan umumjamoaviy muammolarni hal qilishning yagona yo'li - Toshkentda kuchli raqiblar bilan o'rtoqlik o'yinlari o'tkazish. Shunda tarkib masalasidagi muammolar ham o'z-o'zidan barham topishiga ishonamiz. Boisi, Lobanov va Andreevning asl saviyasi Evropa yoki Afrikaning o'rtamiyona jamoalariga qarshi kechadigan o'yinlarda yaqqolroq ko'rinib qoladi. Bu esa, nihoyat, hamma ko'rayotgan narsani Babayan ham ilg'ab olishiga umid uyg'otadi.
Endi esa bevosita hujumdagi muammoga to'xtalsak. Aslida, bu kamchilikni ham o'zimiz kuchaytirib bormoqdamiz. Boisi shundaki, O'zbekiston terma jamoasi hujumida mana uch yildirki, Igor Sergeev tinimsiz o'ynab kelmoqda. Yana u olimpiya terma jamoasi va «Paxtakor»da ham asosiy hujumchi. Shu o'rinda bir savol  - oshxonangizdagi pichoqni bir yilda necha marta o'tkirlatasiz? Uch yilda-chi? Sergeev esa mana uch yildirki, tinim bilmay o'ynab kelmoqda. U qishki ta'tilda ham ko'ngildagidek dam olishni bilmadi. Masalan, bu yil Qatarda o'tkazilgan yoshlar o'rtasidagi Osiyo chempionatida ishtirok etdi. Aslida esa, ishtirok etmagani ma'qul edi. Chunki baribir, hech narsani qoyillatmadi.
Murabbiylar bu holatni Sergeevning o'rnini bosadigan munosib nomzod yo'qligi bilan izohlashadi. Ammo aynan hozir shunday nomzod borligini ko'rmoqdamiz. Osiyo Chempionlar Ligasi doirasida o'tkazilgan o'yinlar shuni ko'rsatdiki, yurtimizda Igor Sergeev bilan bemalol raqobatlasha oladigan kamida bir hujumchi bor ekan - Temurxo'ja Abduxoliqov. Keling, shu o'rinda ularning statistikasini o'zaro solishtirib ko'rsak. Joriy mavsum ikkisi ham oliy ligada uchtadan gol urishgan. Chempionlar Ligasida esa Sergeev uchta, Abduxoliqov ikkita to'p kiritgan. Ammo hozirga qadar terma jamoa murabbiylar shtabidan Temurxo'jaga biror marta qiziqish bo'lmadi. Bu esa kishini ajablantirishi turgan gap. Ayniqsa, Abduxoliqov bilan bir klubda to'p suradigan Marat Bikmaevga muntazam ravishda ishonch bildirilayotganini inobatga olsak, hayratimiz ikki hissa oshishi turgan gap. Nahotki, Bikmaev o'ynagan jamoada Abduxoliqovga joy bo'lmasa?
Biz Abduxoliqov Sergeevdan kuchli, demoqchi emasmiz. Ammo rotatsiya va raqobat degan masalalarda termaga foydasi tegishiga ishonamiz. Biroq Babayan Temurxo'jaga nafaqat hozir, balki ilgari ham etarlicha e'tibor qaratmagan. Xo'sh, bunga sabab nimada?
Aynan mana shu savolning javobi bilan terma jamoa yo'liga g'ov bo'lib turgan navbatdagi to'siq ko'rinib qoladimi, deb qo'rqamiz. Keling, shu o'rinda Samvel Babayan tomonidan terma jamoaga chaqiriladigan futbolchilarga qo'yiladigan talab haqida biroz fikr bildirsak. Yaxshi bilamiz, ular to'rtta edi - futbolchining mahorati, ayni vaqtdagi sport formasi, jamoa g'oyasiga qay darajada munosib kelishi va insoniylik jihatlari. Chiroyli jaranglaydi, shunday emasmi? Ammo hamma gap shundaki, biz - oddiy muxlis bu kriteriyalarning faqat yarmiga, aniqrog'i, dastlabki ikkitasiga tushunamiz, xolos. Ya'ni, futbolchi qay darajada mahoratli va sport formasi yaxshiligini maydondagi harakatlari orqali ko'rib olish mumkin. Biroq qolgan ikkisi ancha mavhum tushunchalar va ularning mos kelish darajasini faqat Samvel Babayan anglamasa, qolganlar tushunishi qiyin. Aftidan, nafaqat Temurxo'ja Abduxoliqov, balki yana bir qator futbolchilar aynan mana shu so'nggi ikki kriteriyaga mos kelmayaptilar, shekilli.
Davomi InterFUTBOL gazetasi blogida.
— deya xabar beradi uff.uz nashri.