EL chorak finalidagi muhim uchrashuv. Yurgen Kloppning hozirgi va avvalgi jamoasi o'zaro kuch sinashmoqda. O'yinning 9-daqiqasidayoq mehmonlar 2ta gol farqi bilan oldinga chiqib olishdi. Birinchi bo'lim shu hisobda yakunlandi. Hisob 0:2ga aylanganidan so'ng biz Yurgen Kloppning ruhiy holatini alohida kuzatib bordik. U aslo asabiylashmadi. Aksincha, nigohini maydonga qadab, goh-goh ko'zoynagini ushlagancha uzoq xayolga botdi. Nazarimizda, murabbiy tanaffusga qadar muvozanatni tiklash va g'alaba qozonish rejasini tuzib chiqdi. «Borussiya»ning shaxtu-shijoatini bilgan ancha-muncha muxlis o'yin davomini tomosha qilishdan voz kechdi. Holbuki, Yurgen Klopp «sensatsiya»­ga hozirlanayotgandi. O'sha holatda bunga faqat uning o'zigina ishonardi.
Tanaffus chog'i futbolchilar ham murabbiyni tushunib etishdi. Shunday qilib, hammasi o'zgarib ketdi. Futbolni o'yinchilardagi iroda sifati boshqardi. Mazkur mulohazalar qog'ozga tushirilayotgan pallada «Lester»-«Vest Xem» uchrashuvi boshlandi. Nimalar yuz bermadi bu bahsda?! Slaven Bilich shogirdlari dastlabki daqiqadayoq  gol urishlari mumkin edi, lekin... Yo'q, ular xato qilishmadi, kichik Shmeyxel ham aytarli mahorat ko'rsatmadi. Shunchaki, taqdir mo''jizalarining navbatdagisi bo'y rostladi, xolos o'sha lahzada.
Golli vaziyatdan foydalanolmaslik sifatida qaralmaydi bu kabi holatlarga. Hammasi - taqdirning ishi. Bundan boshqasi emas. Vardining maydondan chetlashtirilishi esa inson, ya'ni hakamning xizmati. U maydonni tark etgach, Klaudio Raneri indamay, Mahrezni ham almashtirib yubordi. O'ta muhim o'yin. Boz ustiga, jamoa bir kishi kam bo'lib o'ynamoqda. Murabbiy esa cho'chib o'tirmadi. U eng avvalo, «Vest Xem»ning ikkinchi golini olqishladi va ikki etakchi futbolchisiz qolgan jamoasini olg'a undadi. So'nggi daqiqada, asablar tortilgan chog' Uloa penaltini sovuqqonlik bilan amalga oshirdi. Murabbiylarimiz va futbolchilarimiz uchun ibratli voqealar bularning barchasi.
Luis Enrike kabi hamisha etakchilar kuchiga ishonib, eng muhim pallada pand eyish hech gap emas. Hattoki, «Barselona»dek buyuk jamoa ham bunday tig'izlik, ortiqcha bosimga ruhan va jismonan dosh berolmaydi. Zidan esa garchi Ronalduni har doim maydonga tushirayotgan bo'lsada, so'nggi o'yinlarda «Real» tarkibi keskin rotatsiya­ga uchradi. Bunday baralla qarorga kelish Zidan uchun oson kechmaydi, albatta. Futbolchilardagi norozilik kayfiyatini engish va yo'qotish uchun murabbiydan katta iroda kuchi talab etiladi. Klau­dio Raneri ham iroda bobida «Lester» futbolchilariga o'rnak. Agar u salgina asabiylashganida, jamoa­si «Vest Xem»ga yutqazishi aniq edi. Manuel Pellegrinini ham shunday murabbiylar qatoriga qo'shsak arziydi. U jamoadan ketish bosimini engib, chin prefessional sifatida hurmat qozonmoqda. Futbolchilar ham EChL yarim finalida aynan murabbiyni ulug'lash uchun to'p surishlarini aytmoqdalar. Ular shu ko'tarinki kayfiyatda safarda «Chelsi»ni tor-mor etishdi.
Biz albatta, bugun va ertaga OChL bahslarida maydonga tushadigan jamoalarimiz ko'tarinki kayfiyatda irodali futbol namoyish etishlarini istaymiz. Ishonchimiz komilki, vakillarimizda shunday kuch-qudrat mavjud. Umuman olganda, milliy futbolimizda ham irodali jamoalar nafasi sezilmoqda. Ana, «Buxoro» va «Qizilqum» klublari an'anaviy kuchli sanaladigan «Paxtakor» bilan durang o'ynashdi. Vodiy safaridan 4 ochko olib qaytgan «So'g'diyona» esa o'z maydonida potentsial imkoniyatlari yuqori «Lokomotiv» bilan «bitim» imzoladi. Jizzax futbolidagi moliyaviy buzilishlarning bartaraf etilishi Davron Fayziev shogirdlariga o'zgacha kuch-g'ayrat baxsh aylayapti, chog'i. Albatta, bu holni to'g'ri tushunish joiz. Adolatning oftobi porlab tursa, hayot ko'zingizga go'zal ko'rinadi, ko'ngilga futbol o'ynash sig'adi, miyangiz boshqacharoq fikrlaydi, oyoqlaringiz o'zgacharoq harakatlanadi.
Biz avvalgi maqolamizda Buxoro futboli yangi davr arafasida turgani, futbolimiz taraqqiyoti bilan bog'liq spralsimon harakat qadim shahar tomon yo'nalgani xususida yozgandik. «Buxoro» mazkur xulosani yana bir bor isbotladi. Ochig'i, 5:2 hisobidagi g'alaba Buxoro tomonlarda anchadan beri qayd etilmagan va mana endi jamoadan shu kabi natijalar kutilayotgandi. Bu Buxoro futbolida iroda o'z so'zini aytayotganining dalilidir. To'g'ri, yuksak natijalar birdan qo'lga kiritilmaydi. Muhimi, hammasiga ruhan tayyor bo'lmoqlikdir. «Paxtakor»ning asosiy raqiblaridan ancha ortda qolishi esa nazarimizda, bir qancha sabablar bilan bog'liq. Ma'lumki, 3-4 yil avval Samvel Babayan yosh va iste'dodli «paxtakorchilar» kamol topib, futbolimizga ko'p naf keltirishlarini bir necha bor ta'kidlagandi.
Mana, o'sha muddat ham ortda qoldi. Bugun Jamshid Iskanderov, Vladimir Kozak, Igor Sergeev, Jaloliddin Masharipov, Javohir Sohibov kabi futbolchilar kamolot yoshidalar. Murabbiy bashorati esa o'zini oqlamayapti. Iste'dodli yigitlardagi depsinishning sababi nima? Fikrimizcha, bu holni futbolchilar iste'dodi tabiati bilan izohlash mumkin. Bunday toifadagi iqtidorlar yuksak saviyali murabbiy ko'magiga ehtiyoj sezadilar. Ta'bir joiz bo'lsa, ular o'zlarini shug'ullantirayotgan murabbiy saviyasidan o'zib ketolmaydilar. Shu ma'noda hozirgi «Paxtakor» hamon Samvel Babayan olib chiqqan saviya bilan yashamoqda.
Davomi InterFUTBOL gazetasi blogida.
— deya xabar beradi uff.uz nashri.