Oliy liganing 24-tur uchrashuvlari ham o'z nihoyasiga etdi. Furkat.uz sayti o'z an'anasiga sodiq qolgan holda ushbu turda o'zini ko'rsatganlarga o'zimizning milliy “E'tirof” mukofotini taqdim etadi. Albatta norasmiy tarzda. Demak boshladik…
“Eng yaxshi stsenariy”
“Mash'al” – “Bunyodkor” (2:3). Muborakda namoyish etilgan mazkur “kartina” muxlislarni ancha hayajonga sola oldi. “Mash'al” shu kuni o'z maydonida “Bunyodkor”ga ilk golini urdi. Shuningdek ilk ochko va ilk g'alabani ham qo'lga kiritdi. Hammasi kutilganidek ketayotgan edi. Ya'ni favorit hisoblangan “Bunyodkor” 2:1 hisobida oldinda borayotgandi. Biroq keyinchalik voqealar rivoji o'zgarib ketdi va bu eng yaxshi stsenariy g'olibligi uchun munosib deb topildi.
“Eng yaxshi serial”
“Kelishilgan o'yinlar” nomli “serial” yana avjiga chiqdi. O'tgan turda “Paxtakor” – “Metallurg” o'yinidan keyin ushbu “serial”ning davomi yanada qiziqarli tus oldi. Natijada shaxsan O'FF prezidentining o'zi bu “serial” voqealarini kuzatib, jim tura olmadi va zudlik bilan yig'ilish o'tkazdi. Ko'ramiz yig'ilish “serial”ning keyingi qismlari uchun qanday ta'sir ko'rsatar ekan.
“Eng yaxshi film”
Farg'ona “kinoteatr”larida namoyish etilgan “Neftchi” – “Paxtakor” (3:2) “filmi” bu nominatsiya g'olibi bo'ldi. Sal bo'lmasa hammasi avvalgi seriyadagi singari “Paxtakor” foydasiga hal bo'lishi mumkin edi. Biroq mezbon muxlislar baxtiga “Neftchi” futbolchilari “Metallurg”dan farq qilishini ko'rsatib bera olishdi.
“Eng kassabop film”
“Neftchi” – “Paxtakor” (3:2) “film”ini tomosha qilish uchun Farg'onadagi “kinoteatr”ga 12815 ta tomoshabin tashrif buyurdi. Bu klubga yaxshigina foyda ham olib keldi. Eng muhimi “kartina” 12 mingdan ortiq tomoshabinga ham birdek yoqdi. Axir ularning “qahramonlari” “film”ni hind kinolaridagidek yakunlashdida.
Maxsus sovrin
“Lokomotiv” yarim himoyachisi Temur Kopadze maxsus sovrin bilan taqdirlanadi. U “Olmaliq”qa qarshi uchrashuvda o'z nomini tabloga yozdirib qo'ydi va “temiryo'lchilar”ning Oliy ligadagi 450-yubiley goliga ham mualliflik qildi.
“Eng yaxshi salbiy roli uchun”
“Metallurg” ustozi Rustam Mirsodiqovni mazkur nominatsiya g'olibi sifatida e'lon qilsak, hech kim ajablanmasa kerak. Zero u o'z rolini qoyilmaqom tarzda ijro etib berdi. Bechora murabbiy hamma uchun bitta o'zi javob berdi. Mirsodiqov ushbu sovrinni yil yakunida yana bir bor qo'lga kiritishiga ham shubha yo'q.
“Eng yaxshi xorijlik aktyor”
So'nggi ikki turda legionerlar o'zlarini yaxshi tomonlama ko'rsatishmoqda. Ushbu yo'nalish bo'yicha “Nasaf”ning turkmanistonlik “aktyor”i Artur Gevorkyan eng yaxshisi bo'ldi. U “Metallurg”ga qarshi bahsda jamoasining yagona goliga mualliflik qilib, muhim 3 ochkoni taqdim etdi.
"Eng yaxshi rejissyor"
Bu nominatsiya bo'yicha “Mash'al” murabbiyi Aleksandr Xomyakov va “Neftchi” ustozi Aleksandr Fyodorov davogarlik qilishdi. Natijada biroz ustunlik bilan Farg'onalik “rejissyor” g'oliblikni qo'lga kiritdi. Zero uning shogirdlari 18-seriyadan buyon hech kimga bo'yin egmay kelayotgan “sherlar”ni taslim qilishga muvaffaq bo'ldi.
"Eng yaxshi aktyor"
“Neftchi” futbolchisi Otabek Isroilov tur qahramoniga aylandi. U “Paxtakor”ga qarshi bahsda 71-daqiqada zaxiradan maydonga tushib, oradan 6 daqiqa o'tgach jamoasining uchinchi goliga mualliflik qildi va farg'onaliklarning g'alabasiga munosib hissa qo'shdi. Shu bois unga mazkur nominatsiya g'olibligini taqdim etdik. Furqat Yusupov
— deya xabar beradi uff.uz nashri.