Bahor klublarga bosim yuklashi tufayli alohida ahamiyatga ega faslga aylanadi. Xo'sh, dastlab imkoniyati past baholangan, ammo keyinchalik yuqori o'rinlarga da'vogarlik qilayotgan jamoa murabbiylari bosim muammosini qanday engishmoqda? Quyida ana shu mavzuga batafsil to'xtalamiz.
Bu galgi evromavsum Gollivud stsenariysi asosida kechayotgandek. «Barselona» ko'hna qit'aning klublar o'rtasidagi eng yirik musobaqasidan chiqib ketdi, «Lester» APLda etakchilik qilmoqda, «Atletiko» «oltin dubl»ga erishish imkoniyatini saqlab turibdi, «Rostov» esa yo inqiroz yoki chempion... Bunaqasi yana qachon takrorlanishi noma'lum, demak, imkoniyatdan unumli foydalanish darkor. Buning uchun esa hafta sayin, o'yindan-o'yinga ortib borayotgan bosimni engish lozim.
O'yinchilardagi bosimni bartaraf etish - murabbiylarning ishi, ular esa bu vazifani turlicha bajarishadi. Hozircha buning uddasidan chiqishyapti. Bugun jamoasini yuqori o'rinlarga olib chiqishni uddalagan mutaxassislarning uslublariga birma-bir to'xtalamiz.
Diego Simeone.Misoli jabrdiyda
Argentinalik murabbiy o'zini nochor qilib ko'rsatishni ajoyib tarzda uddalaydi. Ikki yil avval «Atletiko» mavsumni ko'tarinki kayfiyatda o'tkazib, Ispaniyada chempionlikni qo'lga kiritdi, Chempionlar Ligasi finalida o'ynadi. O'shanda Simeone jamoasining grandlar bilan raqobatlasha olmasligini ta'kidlab, barchani bunga ishontirishga urindi. Dastlab «Klubimizning chempion bo'lishiga ishonmayman», degan mutaxassis o'z navbatida EChLdagi raqibi «Milan»ni favorit sifatida ko'rsatdi, keyinchalik «Chelsi» haqida ham shunday fikr bildirdi. Shuningdek, argentinalik barcha turnirlarda hakamlar grandlarga yon bosib, kichik jamoalarga qarshi chiqishlarini qo'shib qo'ydi.
Joriy mavsum «Atletiko» bunday gap-so'zlarga matbuotni ishontirishda qiynaladi: klub ham, murabbiy ham so'nggi yillarda nimalarga qodirliklarini ko'rsatib ulgurishdi. Ammo engilishni xohlamayotgan Simeone raqiblarini maqtashdan to'xtamayapti: «Barselona»ga o'yin boy berilgach, Luis Suaresni mukammal futbolchiga qiyoslarkan, bunday mag'lubiyatdan faxrlanishini bildirdi. Fevralda barcha jamoalar o'zaro kuch sinashishi, kataloniyaliklarning esa boshqa darajada ekanliklarini ta'kidladi.
Hattoki, Chempionlar Ligasi doirasidagi «Galatasaroy» bilan o'yindan oldin turk klubini favorit sifatida ko'rsatdi: «Biz 55 ming kishiga qarshi to'p suramiz. Boz ustiga, ularning hujumi juda samarali, 90 daqiqa mobaynida sergaklikni yo'qotmasligimiz lozim». Raqibning hujumi haqidagi «sirli so'z» - Simeonening yana bir sevimli usullaridan biri. U «Barsa», «Sevilya», «Benfika» va «Las-Palmas»ning oldingi chizig'ini maqtadi. Bu jamoalarda bir o'zi o'yin taqdirini hal qila oladigan futbolchilar yig'ilganini ta'kidladi. Taqqoslash uchun argentinalik murabbiyning «Las-Palmas»ga qarshi kechgan bahsdan so'ng o'z shogirdi haqidagi fikrlarini keltirish mumkin: «Grizmann barqaror o'yin ko'rsatyapti. Agar ishlashda davom etsa, undan kuchli futbolchi etishib chiqadi». Biroz kamtarona, shunday emasmi?
Simeonening o'ziga xosligi ham shunda. Ehtimol, boshqa murabbiylar ixtiyorida samarali, to'kis va iqtidorli o'yinchilar bo'lishi mumkindir, biroq «Atletiko» vakillari maqtov o'rnida faqatgina «ishlashda davom etishimiz kerak» yoki «qilgan mehnatimiz bilan faxrlanaman» qabilidagi ta'kidlar bilan cheklanishadi. Go'yoki Simeone uchun yakuniy natijadan ko'ra, futbolchilarining maydonda borlarini berib o'ynashlari muhimroqdek. Darvoqe, martda u «Atletiko»ning mavsumiy maqsadlarini oshkor etdi: Ispaniyada kuchli uchlikdan joy olib, EChLda o'ziga ishonish. Klassika.
Diego so'nggi bir necha hafta mobaynida «biz hech nimaga erishmadik» deyavergach, jamoasi haqidagi iliq fikrlari quruq maqtanishdek tuyulyapti. «Real» taslim etilgach, Simeone shunday dedi: «Bu oddiy g'alaba, biz «Santyago Bernabeu»da muvaffaqiyat qozonishga qodirmiz». «Barselona» Chempionlar Ligasidan chiqarib yuborilgach, argentinalik yarim final yo'llanmasining qo'lga kiritilishi «Atletiko» uchun oddiy hol ekanini bildirdi. Bu nima? Muvozanatning yo'qolishimi yoki «Atletiko»ning imijini o'zgartirish bo'yicha ish boshlanganidan dalolatmi? Mazkur savolga shu yilning yozida - Grizmann, Godin va bevosita Simeonening taqdiri qanday tus olishiga qarab javob topamiz.
Klaudio Raneri.Turnirni tark etmaslik
Italiyalik mutaxassis dastlabki yarim yillikda «Premer-ligani tark etmasak bo'lgani» qabilida takror va takror fikr bildirib, ishqibozlar hamda matbuotni xursand qildi. So'ngra bu holat ko'pchilikni cho'chita boshladi. Ammo tajribali Klaudio ayni vaziyatda nima qilishni biladi: 2010 yili uning «Roma»si shov-shuvli tarzda yulduzli «Inter»ga skudettoni boy berdi. Aprelda rimliklar chempionat peshqadamligini saqlab turishgandi. Rimliklar g'oliblikka shu qadar ishonishgandiki, buni yashirish haqida zinhor o'ylashmagan.
«Maqsadimiz qat'iy - chempionlikni nishonlamoqchimiz», - degandi Raneri aprel oyi boshlarida. «Skudetto taqdiri bizning qo'limizda», - dedi u bir-ikki haftadan so'ng. Ammo ko'p o'tmay «Roma» o'z uyida «Sampdoriya»ga yutqazgach, «A» seriyada peshqadam o'zgardi va Raneri «Latsio»dan umidvor ekanini bildirdi («Roma»ning azaliy raqibi o'z maydonida «Inter»ni qabul qilardi). Biroq hammasi avvaldan rejalashtirilganidek, milanliklar Italiya chempionligini qo'lga kiritishdi, «Roma» esa marraga ikkinchi o'rinda etib keldi. Shundan so'ng Raneri anchagacha o'ziga kelolmay yurdi chog'i, matbuot bilan ishlashga o'zgacha tarzda yondosha boshladi. Italiyalik murabbiy «Lester»ni boshqararkan, oktyabr oyiga kelib - butun premer-ligani hayron qoldirishga ulgurgan pallada klubning asl maqsadini oshkor etdi: «Ochkolarimiz soni 15taga etdi. Mavsum so'ngigacha shu ko'rsatkichni 40taga etkazsak bo'lgani». O'sha paytda bu rejaning amalga oshishi haqiqatga yaqindek tuyulgandi.
15 dekabr: «O'zimizni yo'qotib qo'ymasligimiz kerak. Ha, mavsumni ajoyib tarzda o'tkazyapmiz, biroz orzu qilishga haqqimiz bor. Ammo bizdan yana 5 ochko to'plash talab etiladi. Shundagina xavf-xatardan xoli bo'lamiz». 19 dekabr: «38 ochko to'plaganimiz yoqimli. Yana ikkita ochko olsak kifoya».
Yanvarda «Lester»ning ochkolari soni nihoyat, 40taga etgach, Raneri mabodo «tulkilar» chempionshipga tushib ketishgan taqdirda ham klubda qolishini bildirdi. Shu zahoti ikkinchi davraga mo'ljallangan rejalarni oshkor etdi: yana 40 ochko. Balki Raneri maqsadi keyingi yilga mo'ljallangandir? Ehtimol, shu tariqa jamoasini kelasi mavsum elitada saqlab qolishga intilgandir?
Fevral oxirlariga kelib jurnalistlarning chempionlik haqidagi savollaridan qochish qiyin bo'lib qoldi. Ammo Raneri o'ziga xos tarz­da javob qaytarishda davom etdi: «Bukmekerlar bizni chempionlik poygasi favoriti sifatida ko'rishyaptimi? Men bukmekerlarga ishonmayman». Yoki: «Chempionlik? Shuni aytishim mumkinki, ha, eplaymiz. Faqat boshqa jamoalar kuchiga-kuch qo'shilayotgan bir pallada bizdan imkon qadar ko'proq yugurish talab etiladi». Martda italiyalik mutaxassis premer-liga etakchilari sifatida «Arsenal» va «Tottenxem»ni ko'rsatdi.
Aprelda Raneri nihoyat, plastinkani almashtirdi: Angliya chempionati peshqadamining murabbiyi endilikda «Lester»ning maqsadi evrokuboklarda ishtirok etishdan iborat ekanini bildirdi. To'g'ri, bir hafta muqaddam Raneri chempionlikni nishonlash lozimligi, shundagina bu voqeani yillar davomida eslab yurishlarini aytdi. Aftidan, bu uning eng «balandparvoz» gapi. Biroq shu zahoti «xato»sini tuzatib, keyingi mavsum rejalarini oshkor qildi: chempionatda yuqori o'nlikdan joy olish. Shunchaki, Raneriga ushbu rejalarini amalga oshirish chog'ida hozirgi sur'atni saqlab qolishni tavsiya etamiz.
Qurbon Berdiev.«Eplolmayman» deyish yo'q
«Quruq» o'yinlar seriyasini davom ettirayotgan «Rostov» RPLda peshqadamlikni saqlab turibdi. Aslida, maqsadi turnir jadvalining to'qqizinchi pog'onasini egallash bo'lgan jamoaning hozirgi holatini Qurbon Berdiev shunday ta'rifladiki, unga hattoki, Simeone ham havas qilsa, ajabmas: «Ha, hozir bizga ruhiy bosim yuklanadi. Ammo yigitlar «eplolmayman» deyishmayapti, buning uchun ulardan minnatdorman». So'ngra rostovliklar ustozi fidokorlik va tartib-intizom haqida ham gapirdi. Umuman, bu ta'kidlardan na Berdiev, na «Rostov» haqida biror yangilik ola bildik.
Darvoqe, u o'zini «Rubin»da ham shunday tutardi. 2008 yili Qurbon Bekievich bir vaqtning o'zida ham jamoani maqtab, ham natijadan nolishning yo'lini topdi: «Yigitlarni tanqid qilishdan yiroqman, jonbozlik ko'rsatishganidan mamnunman. Faqat ochko yo'qotayotganimiz achinarli», - dedi u TsSKAga qarshi kechgan uchrashuvdan so'ng. Birinchi davra yakunlariga ko'ra, qo'lga kiritilgan natijalar murabbiyni qoniqtirdi: «Biz kuchli beshlikka kirmoqchi edik, ayni damda 1-o'rindamiz. Bu unchalik yaxshi emas, chunki doimo etakchilik qilish qiyin. Umuman olganda esa, birinchi davradagi ko'rsatkichlardan qoniqdim».
Chempionat g'olibligi naqd bo'lgach, Berdiev Qozon aholisini tabriklash chog'ida EChL kabi jiddiy turnirdagi debyut xavotir tug'dirayotganini aytdi. Keyinchalik o'sha jiddiy turnirda «Barselona»dan 6 ochko tortib oldi.
Umuman, joriy mavsum «Rostov»da tanish yo'nalish guvohiga aylandik: «hech nima ko'rmayapman, hech nima eshitmayapman, deyarli hech nima demayman». Hozircha yomon emas, Berdievning murabbiylik salohiyati yana namoyon bo'lmoqda. Bahor fasli boshlarida u moliyaviy qiyinchilikni boshdan kechirayotgan klub hech qachon jiddiy turnirlarda oliy maqsadlarni ko'zlamasligini aytgandi. Ko'p o'tmay, TsSKA manziliga bir-ikkita maqtov yo'lladi. Qurbon Bekievichning nazdida «armiyachilar» Rossiyaning etakchi klubi ekani, ularga qarshi ochiq futbol namoyish etish qiyinligini bildirdi. Darhaqiqat, «Rostov» deyarli o'ynamadi: to'pni raqibga topshirib, asosan himoyalandi va yakunda 2:0 hisobida g'alaba qozondi. Berdiev darhol  turnir jadvaliga e'tibor qaratmasligini aytib, shu tariqa, Raneriga salom yo'lladi.
Davomi InterFUTBOL gazetasi blogida.
— deya xabar beradi uff.uz nashri.