2016 yilning 6-8 may kunlari Turkiyaning Istambul shahrida sport kurashlari bo'yicha XXXI yozgi Olimpiada o'yinlarining yo'llanmalari o'ynaladigan ikkinchi jahon saralash musobaqasi o'tkaziladi.
Mazkur nufuzli musobaqa sport kurashlari bo'yicha “Rio-2016” o'yinlariga yo'llanmalar o'ynaladigan so'nggi saralash bosqich musobaqasi bo'lib, ushbu musobaqada Vatanimiz sharafini jami 11 nafar sportchimiz himoya qiladi.
Ta'kidlash joizki, og'irlik vazni 74 kg.gacha bo'lgan polvonlar musobaqasida bu safar Bekzod Abdurahmonov Rashid Qurbonov o'rniga bellashuvlarda ishtirok etadi.
Quyida, Istambulga yo'l oladigan hamyurtlarimiz ro'yxati berilgan:
Erkin kurash: Abbos Rahmonov (-57 kg), Bekzod Abdurahmonov (-74 kg), Umidjon Ismanov (-86 kg), Hasanboy Raximov (-125 kg):
Ayollar kurashi: Dauletbike Yaxshimuratova (-48 kg), Shahodat Jullibaeva (-48 kg), Salomat Kuchimova (-58 kg), Xolbozor Norboeva (-63 kg), Lalaxan Orinbaeva (-75 kg):
Yunon-rim kurashi: Aram Vardanyan (-66 kg), Abrorbek Mamasoliev (-98 kg).
Eslatib o'tamiz, bugungi kunga kelib sport kurashlarida 6 nafar polvonimiz yo'llanmalarni naqd qilib qo'yishgan. Bular – Rustam Assakalov, Dilshod Turdiev, Elmurat Tasmuradov, Mo'minjon Abdullaev (barchasi yunon-rim kurashi), Ixtiyor Navro'zov, Magomed Ibragimov (erkin kurash).
Polvonlarimizga bo'lajak mas'uliyatli musobaqada ham omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.