Frantsiyalik tajribali mutaxassis Arsen Venger joriy mavsum «to'pchilar»ni yana shohsupaga olib chiqish imkoniyatiga ega edi. Biroq ayrim sabablarga ko'ra, yuzaga kelgan qoqilishlar qimmatli ochkolar boy berilishiga olib keldi. Oqibatda «Arsenal» etakchi - «Lester»dan ancha ortda qolib ketdi. Murabbiyning fikricha, jamoa sha'niga yog'dirilayotgan tanqidiy fikrlar o'rinli emas, «tulkilar»ning nimalarga qodir ekanliklari esa yana bir yildan keyin ma'lum bo'ladi.
- Etakchi to'rtlikdan joy olish uchun kechayotgan kurash va jamoangiz mavqeini qanday baholaysiz?
- Hammasi juda oddiy. Vaziyat, ya'ni «Lester»ning etakchiligi uchun barcha klublar o'zlarini aybdor his etishayotganiga shubha qilmayman. Lekin ikkinchi tomondan, «tulkilar» ochkolarni o'g'irlab olishgani yo'q. Jamoa o'z o'yini bilan natijaga erishmoqda. Mavsumning ramziy terma jamoasiga e'tibor qaratsangiz, unga asosan «Lester» vakillari kiritilganiga guvoh bo'lasiz. Demak, jamoa kuchli. Ishonchim komilki, turnir jadvali barcha jamoalarni hayron qoldirayotgani aniq. Biroq o'sha klublar ham «Lester» kabi ko'plab bahslarni 1:0 hisobida yakunlay olishganida, hozir etakchiga aylanishardi. Darhaqiqat, ular texnik mahorat bobida «tulkilar»dan ustun.
Ammo ayrim muammolarga duch kelishdi. Deylik, «Lester»da jarohatlanganlar yo'q, raqobatchilar bir nechta musobaqada ishtirok etishdi, «tulkilar» esa Angliya kubogidan barvaqt chiqib ketishdi. Lekin klub hurmatga loyiq, baribir. Sportda shunday nazariya bor: «Muvaffaqiyatga erishish uchun alamzada bo'lish shart». «Lester» tarkibiga e'tibor bering: uning biror futbolchisiga 18 yoshida ChLda to'p surish nasib etgan emas. Qolaversa, ularning ko'plari taqdir siylovidan bebahra ulg'ayishgan. Misol uchun, N~Golo Kanteni olaylik - vaqtida Frantsiyada ham hech kimga kerak bo'lmay qolgandi. Shu noxush kechinma uning tabiatini shakllantirgan. Kante va unga o'xshash yigitlar o'z oldilariga amalga oshirish qiyin bo'lgan orzuni qo'yishgan, endi maqsadni ro'yobga chiqarish uchun bor kuch-mahoratlarini ishga solishmoqda. «Lester» boshqa  jamoalar uchun - bebaho saboq! Albatta, bu jamoa ham kamchiliklar xoli emas. Ammo u ajoyib samaradorlik va hayratomuz ruhiyatni namoyish etmoqda.
- Demak, sizningcha, «Lester»ning muvaffaqiyatga chanqoqligi boshqalarnikidan kuchliroq. Bu bilan «Arsenal» va bosh­qa jamoalarni tanqid qilmayapsizmi?
- «Tulkilar» ham, mening jamoam ham chanqoq. Farq shundaki, «Lester» yuksak samaradorlikni namoyish etmoqda, bizga esa bir qator muammolar xalal berdi. O'zingiz o'ylab ko'ring, chorshanba kuni «Barselona»ga qarshi maydonga tushgan jamoa shanba oqshomi «Kristall Pelas» yoki «Everton» bilan bahslashishga majbur. Imkoniyatlar teng emasligi ko'rinib turibdi. Hoziroq bashorat qilishim mumkin: «Lester» yangi mavsumda muammolarga uchraydi. To'g'ri, hozirda yulduzlik nash'asidan mast bo'lmagan futbolchilar ajoyib uyushqoqlikni ko'rsatishmoqda. Taajjubki, klubning bunday yurishida ko'proq bizni ayblashyapti. Vaholanki, bu jamoa­ni 2 marta mahv etdik.
Shunday ekan, «tulkilar»ning cho'qqida turishganida biz emas, boshqa jamoalar aybdor. «Lester» deylik, «Manchester Siti», «Tottenxem», «MYu» va «Liverpul» bilan safar uchrashuvlarida faqat bir marta mag'lubiyatga uchradi. Tan olish kerak, jamoaga gap yo'q! Sport - bu shou. Uni qoyilmaqom tarzda uddalayotgan jamoani e'tirof etish uchun mardlik talab etiladi. «Lester» o'zining tirishqoq, mehnatsevarligi bilan hurmatga loyiq. Biroq bunday «tomosha»ning umri qisqa. Agar jamoa shu uslub bilan g'olib chiqsa, uni muvaffaqiyat bilan samimiy muborakbod etaman. Lekin ChLda butun bir o'yin­ni to'psiz o'tkazsang, shanba kuni rosa qiynalishing aniq. Xullas, «tulkilar»dan yangi muhitga moslashish talab etiladi. Jamoaning keyingi taqdiriga kafolat berish uchun aqlim zaiflik qiladi. Lekin o'z hurmatimni izhor etishga kuchim etadi.
- Jamoangizning mart oyidagi natijalariga qanday omillar ta'sir o'tkazdi?
- Aytaylik, 2ta uchrashuvning ahamiyati katta edi: «MYu» va «Suonsi»ga qarshi kechgan bahslarniki. Boz ustiga, tarkibda kadrlar muammosiga uchradik. Ya'ni Uelbek, Kasorla va Uilshir xizmatidan foydalanolmadik. O'sha davrning ijobiy xususiyati shuki, al Neni va Ivobi kabi yoshlarni kashf etdik. Ammo jamoaga «qotillik xislati» etishmadi. Umuman olganda, mavsum davomida namoyish etgan o'yinlarimizning sifati chakki emas. Hatto mart-aprel oylaridagi bellashuvlarda ham yomon ko'rinmadik. Afsuski, quvuvchi rolida edik va xato qilishga haqqimiz yo'q edi. Ana shu asabiy vaziyat xalaqit berdi. Shuningdek, musobaqa taqvimi ham jiddiy ta'sir ko'rsatdi. «Sanderlend»ga qarshi bahs uning elitada jon saqlab qolish uchun kurashayotgan paytiga to'g'ri keldi. Vaholanki, ancha oldinroq, bayram kunlari kuch sinashganimizda, nisbatan oson bo'lardi.
Davomi InterFUTBOL gazetasi blogida.
— deya xabar beradi uff.uz nashri.