Bugun Qarshi shahridagi “Markaziy” stadionimizda oliy liga peshqadamlari qatorida borayotgan “Nasaf” jamoamiz Navoiy shahrining “Qizilqum” jamoasini qabul qiladi.

Ushbu uchrashuv 8-turning markaziy uchrashuvi sanaladi. Chunki, jamoamiz joriy mavsum turnir jadvalida peshqadamlar qatorida borayotgan bo'lsa, “Qizilqum” jamoasi ham bu yilgi chempionatni g'alabalar seriyasi bilan boshlab, o'z oldiga yuqori maqsadlarni qo'yganligi ko'rinib turibdi.

Mazkur jamoalar bugun, o'zaro 33-uchrashuvini o'tkazishadi. Oxirgi etti uchrashuvda jamoamiz o'z maydonida "Qizilqum"ni mag'lub etishga erishgan.

Shubhasiz, bugungi uchrashuv murosasiz va muxlislarbop qiziqarli o'yin bo'lishini oldindan taxmin qilish mumkin.

Uchrashuvga bo'lgan qiziqish yuqori, bunga misol tariqasida Navoiy shahridan ham ko'psonlik muxlislar Qarshiga kelayotgani ko'rsatib turibdi.

Jamoamiz muxlislar klubi ham bugungi o'yinga tayyorgarliklarni allaqachon boshlab yuborishdi. Ular bugun “Markaziy” stadionimizda 12-o'yinchi sifatida o'z seviklariga dalda bo'lishni rejalashtirishgan.

Bugungi uchrashuvga chiqarilgan chiptalarning sotuvi ham davom etmoqda. Yakshanba dam olish kunida muxlislarning qiziqarli o'yinni tomosha qilib, munosib hordiq chiqarishlarini taklif etib qolamiz.

Yana bir qiziqarli faktlardan, avval “Nasaf” jamoasi sharafini himoya qilgan Ilhom Yunusov va Alisher Yusupovlar bugun sobiq jamoalariga qarshi maydonga tushishlari mumkin.

Keling, bugun bo'ladigan uchrashuvda jamoamizga zafar tilaylik va ularni stadionda faol qo'llab-quvvatlaylik!

O'zPFL 8-tur. 08.05.2016.
“Nasaf” (Qarshi) – “Qizilqum” (Navoiy)
Qarshi sh., “Markaziy” stadion. Soat 18:45da
Bosh hakam: Vadim Agishev (Toshkent),
Qanot hakamlari: Vladlen Lushin (Guliston), Aleksandr Burov (Buxoro),
Zahira hakami: Shuhrat Rajabov (Buxoro)
Nazoratchi: Igor Nexochin (Namangan).

O'zPFL vakili: Aleksey Frolov (Toshkent).

Uchrashuv kech soat 18:45da boshlanadi. “Markaziy” stadionimizga marhamat!
— deya xabar beradi uff.uz nashri.