Fellaini maydonda faqat murabbiyning ko'rsatmalariga amal qilishini bir necha marotaba isbotlagan. Demak, Van Gal belgiyalik yarim himoyachining o'yiniga o'zgartirish kiritishga qaror qilmas ekan, Maruan uchun barcha tanqidchilarning oh-vohlari quruq gap bo'lib qolaveradi.
Belgiya termasida ham, «Manchester Yunayted»da ham murabbiylar 28 yoshli qat'iyatli va mehnatkash futbolchini qadr-lashadi. Faqat Mark Vilmotsga «MYu»dagi hamkasbining Fellainidan o'z pozitsiyasida foydalanmayotgani yoqmayapti - qanot himoyasi Maruanning joyi emas.
Futbolchining o'zi bunga faylasufona munosabat bildirmoqda.
- Murabbiy seni qaysidir nuqtaga qo'ydimi, demak sen o'sha chiziqda o'ynashing shart, - deydi u. - Mavsum boshida o'tkazilgan «Liverpul»ga qarshi bahsda men hujumchi sifatida o'ynashim kerak edi. O'zimga qolsa, bu rolni tanlamasdim, biroq o'sha uchrashuvda biz g'alaba qozondik. Har qanday vaziyatga doimo tayyor turish lozim.
******
- Eng yaqin do'stlarim ko'pincha «Birinchi navbatda, o'zingni o'yla» qabilida maslahat berib, xudbin bo'lishimni talab qilishadi. Ammo men bunday emasman. Professionalman, klubim foydasi uchun ishlayman, murabbiyim ko'rsatmalariga amal qilaman. Tayanch chizig'i - mening eng sevimli pozitsiyam, ammo joy o'zgarishi borasida murabbiy bilan muammoga duch kelmayman. Shunchaki, o'z ishimni bajaraman, xolos.
Fellaini ustozlarini hech qachon ranjitmaydi, ammo 2013 yili «Everton»ni tark etgach, bir savolga tez-tez to'qnash kelmoqda: u «MYu»da o'ynashga loyiqmi?
- Ayni mavzu oilamni mendan-da ko'proq o'ylantirib qo'ygan, - deydi belgiyalik. - Yana qaytaraman - professionalman, ayni turdagi gap-so'zlarga e'tibor qaratmaslikdan o'zga ilojim yo'q. Shunchaki, quloq solmaslikka urinaman. Ba'zan bu qi-yinchilik tug'diradi, ammo bu - futbol, ayniqsa, shunday buyuk klubda to'p surgach, hammasiga ko'nish lozim. Ayrim hollarda «MYu»da o'ynashga loyiqman, deb o'ylayman, ba'zan esa, yo'q. Faqat shuni bilamanki, muhimi - maydonda astoydil mehnat qilish.
Maruan ilk marta «Everton» libosida maydonga tusharkan, dastlabki 17 o'yinda 10ta sariq kartochka ishlab oldi. Sobiq hakam Xovard Vebb Evropa Ligasi doirasidagi «MYu»-«Liverpul» bahsidan so'ng Fellainini «qassob»ga qiyosladi. Chunki Maruanning Roberto Firmino va Deyan Lovrenga ishlatgan qo'polligi mashhur referiga yoqmagan.
Jingalaksochni shuningdek, mersisaydliklarga qarshi kechgan dastlab uchrashuvda Emre Janga atayin zarba berganlikda ayblashdi, biroq UEFA mazkur masalada biror chora qo'llamadi. «Liverpul» o'yinchisi esa raqibining yonini oldi.
- So'nggi paytlarda tirsagim bilan jarohat etkazishga urinayotganim haqida ko'p gapirishyapti, ammo buni ata-yin qilayotganim yo'q, - deydi Fellaini. - E'tiborimni raqibga emas, to'pga qarataman. Kimnidir jo'rttaga urishdan ma'no yo'q. Shu tariqa himoyalanaman, xolos. Menga qarshi ikki-uch futbolchi o'ynagan paytlar ham uchrab turadi.
******
- Firmino sakrash chog'ida unga tirsagim bilan zarba berganimni aytdi. Lekin bunday qilishdan menga nima naf? Axir gavdam yordamida to'p uchun kurashda yutishimni o'zim ham bilaman-ku. Ro'paramda Endi Kerroll bo'lganida boshqa masala edi, Firminoga qarshi tirsagimni ishlatishga hojat yo'q.
Fellaini bu kabi ayblovlar raqiblarni muntazam ravishda qo'polliklar va zo'ravonliklarga etaklashidan hayiqmoqda.
- Endilikda menga nisbatan boshqacha munosabatda bo'lishadi, - deydi u. - Lekin hakamlar sariq kartochka ko'rsatishmagan ekan, nega endi o'yin uslubimni o'zgartirishim kerak? Nima sababdan qoidabuzarlikni futbol maydonining o'zida qayd etishmayapti? Hech kim menga nisbatan qo'pollik ishlatilganini gapirmayapti-ku - nimaga?
Davomi InterFUTBOL gazetasi blogida.
— deya xabar beradi uff.uz nashri.