Kuni kecha oliy ligada 26-tur uchrashuvlari bo'lib o'tdi. Ushbu turning markaziy uchrashuvlaridan biri Farg'onada "Neftchi" - "Andijon" qarama-qarshiligi bo'ldi.
Bu jamoalar musobaqa jadvalida qaysi o'rinlardan borishidan qat'iy nazar o'zaro o'yinlar vodiy derbisini nomini olib, doim murosasiz ruhda o'tadi. Kechagi bahs ham ana shunday shiddatli kechdi. Ayni paytda "Neftchi" klubi mazmunli o'yinlari bilan Osiyo Chempionlar ligasi yo'llanmasi uchun kurashayotgan bo'lsa, "Andijon" oliy ligada o'z o'rnini saqlab qolishga harakat qilmoqda. Shuni aytish kerakki, kechagi bellashuvda andijonliklar tarixiy g'alabaga erishdilar.
1992 yildan beri o'tkazilib kelinayotgan chempionatimiz bahslarida "Andijon" jamoasi Farg'onada shu kungacha biror marta g'alaba qozonmagandi. Bungacha Farg'onada o'tkazilgan 21 ta o'yinni 20 tasida "Neftchi" zafar quchgandi va faqat bir bor 2010 yilgi mavsumda andijonliklar safarda durang o'ynashgandi. Jamoamiz nihoyat bu noxush an'anaga barham berdi.
E'tiborli jihati, "Andijon"ga Farg'onada g'alaba keltirgan golni "Neftchi"ning sobiq futbolchisi Anvar Berdiev kiritdi. Kechagi bahsda Berdievdan tashqari Sanjar Asqaraliev, Abdulloh Olimov, Javlon Guseynov, Iqbol Boboxonov, Iqbol Akramov va Shukur Jumaboev sobiq jamoasiga qarshi to'p surishdi. Vodiy derbisidagi g'alabadan keyin "Andijon" klubi ochkolarini sonini 24 taga etkazib, musobaqa jadvalida 13-pog'onaga ko'tarilib oldi.
— deya xabar beradi uff.uz nashri.