Futbol millionlar o'yinidan milliardlar o'yini darajasiga ko'tarilganiga ancha bo'ldi. Qaysi bir soha bo'lmasin, bu sport turiga qiyoslanishi yangilik emas. Gap shundaki, yaqinda gazetada bosib chiqilgan Xayrulla Hamidovning “Himoya chizig'i” nomli maqolasi qalbimizning tub-tubida yotgan tuyg'ularni silkitib yubordi. Ana shu maqoladan ilhomlanib ichimizdagi g'alayonlarni qog'ozga tushirdik.
Albatta, maqolani ko'pchilik o'qigan, shunday bo'lsa-da, bir eslab o'tishga ijozat bering.  Muallif bu maqolasida jurnalistikani futbolga qiyoslagan. Qalam ahli vakillarining ichida matbuotni (gazeta, jurnal) himoya chizig'iga, radioni yarim himoyaga va televidiniyani hujum chizig'iga mengzaydi. Hujumda o'ynaydigan futbolchilar o'n o'yinda gol urolmay, bittasida muhim golni urib qo'ysa, millat qahramoniga aylanishi mumkinligini aytadi. Shatskix terma jamoamizda “Dinamo”da o'ynaganichalik to'p surmasa-da, familiyasidagi salobat uchun-da termamiz tarkibida ko'rishni xohlayverar edik.
Uloa degan o'yinchini hech kim tanimasa ham, jamoasidagi muhim gollarni urib, nafaqat Angliyada , balki butun dunyoda tanilishi mumkinligi haqidagi misollarni son-sanoqsiz keltirishimiz mumkin. Muallif maqolasining oxirida o'zining hujum chizig'ida o'ynashini sog'inganini aytib o'tgan. Agar televidiniyani hujum chizigiga qiyosan aytsak, biz ham sog'indik, deb yubordim. To'g'ri-da, bir paytlar Ja'far Irismetov singari bir mavsumda qator gollarni qalashtirib tashlagan hujumchini kim ham yana oldingi chiziqda o'ynashini sog'inmaydi, deysiz. (Bu o'rinda gollar – “Futbol+”, “FIFA”, sport sharhlari)
Ayniqsa, hozirda jamoamizda (sport kanali) hujum chizig'ida muammo bo'lib turgan paytda. Agar sevimli jamoangizda shunday hujumchini himoyaga o'tqazib qo'ysa, sirtingizda bo'lmasa ham, ichingizda buralab so'kasiz. Murabbiydan tortib rahbarlarigacha. Ketma-ket ajoyib mavsumlarni o'tkazgan, qandaydir tushunarsiz qizil kartochka sabab diskvalifikatsiyaga uchragan, superforvard allaqachon chetlanish muddatini tamomlagan bo'lishiga qaramay haliyam himoyada yuribdi. Qo'lida sardorlik bog'ichi ostida Ramos singari himoyaning markazida o'ynasa ham shedevr gollarni urayotganini futbolga tushunadigan inson borki, ko'rmokda. Yarim himoyaga murabbiy ko'rsatmasi bo'lmasa ham, o'tib ajoyib paslarni oshirayotgani alohida  mavzu (“Oriyat dono”dagi “Maydon markazi” eshittirishi).
Yaxshi futbolchiga Runi singari murabbiyning tushunarsiz qarorlari sabab himoyada o'ynasa ham yarashadi ekan. Lekin Ronaldu singari ketma-ket betakror mavsumlarni o'tkazgan hujumchining himoyada o'ynashi baribir alam qilarkan-da odamga!
Rosti sog'indik, oldingi chiziqda o'ynashini. Hozir jamoamizdan fayz ketgandek guyo. Ikki mavsum avval Yoxan Kroyffimizni yo'qotgandik (Davlat Turdialievni nazarda tutyapman). Rauldek hujumchimiz (M. To'xtamirzaev) o'z sevimli jamoasi turib, qaerdadir to'p tepib yuribdi. Jamoadagi hujumchilar na burchak to'pida qatnashadilar, na offsayddan qochishni biladilar. Shunday iste'dodli insonlar turib, haliyam Balotellilarga qolgan kunimiz... (Kimligini aytmadim, o'zingiz qo'yib olavering!) Hujumda bu orada yarim himoya vakillari ham o'zlarini hujumda sinab ko'rishmoqda, garchi o'xshamasa ham (Maqoladagi mengzashdan kelib chiqib, kimligini yana topib olavering!)
O'tgan mavsumda hujumchilar o'rtasida turnir o'tkazilganidan xabarimiz bor (FACE-SPORT ko'rsatuvi), chamamda o'xshamadi. Hujumchi bo'lgan haqiqiy iste'dodlarni oldin o'z joyiga qo'ya olsak, bu kabi turnirlarning keragi bo'lmasdi aslida...
O'rtoq maqola muallifi. Qayting!!! Tezroq hujumga o'ting! Yaqinda o'zimizda ham shayxlarning katta puliga yangilangan “PSJ”ga o'xshash yangi jamoa tuzildi - O'zreport tv degan! Bu jamoa nafaqat yurtimizda, balki jahon arenalarida ham vatanimiz sharafini himoya qilmoqchiligini eshitdik (Sputnikka qo'yilarkan). Ana shu jamoaga taklifimiz bor: Zlatan Ibrohimovichning (D. Fayziev) yoniga hujumchi kerak! U bechora kimlar bilan bir jamoada to'p surayotganini hamma ko'ryapti (bejizga “PSJ” yarim finalga etib kelolmadi, shekilli?!) Unga tendem hosil qilayotganlarni ko'rmoqdamizki, bo'sh qolgan darvozani ishg'ol qila olmayotir. Tezda mazkur hujumchining transferini sotib oling! Qancha ketsa ham. Ehtimol haligacha erkin agent bo'lib yurgandir?!
Baraka topishingiz aniq! Axir kim ham bosh bilan chiroyli zarbalar bera oladigan, ikkala oyokda bir xil kuchga ega, jarima maydonida o'ta xavfli o'ynaydigan hujumchini o'z jamoasida ko'rmaydi, deysiz. Birgina diskvalifikatsiyasini yuziga solavermang-da hadeb! Sizga murojaat qilayotganimizning sababi bor - nurab borayotgan eski jamoada u endi o'ynay olmasa kerak... (Qaysi kanalni nazarda tutganimni darhol angladingiz!) Chunki u erda hujumchilar “Oqtepa” yoki “Obod” darajasida o'ynayaptilar, xolos. O'yin sifati ham shunga monand.
Vah, yaqinda juda katta turnir yaqinlashmoqda. Mazkur futbol yulduzi unda qatnashishi shart! Eshityapsizmi, ShART! To'purar bo'lib ketishidan cho'chiyapsizmi? Yo'q, u endi orqaroqda Messiga o'xshab zargarona to'plar uzatib ham yuraveradi. Yugurmasdan-da gollarda qatnasha olishiga ishonamiz... Yana ishonamizki, bu tirik afsona hali oldingi chiziqqa qaytadi. Cho'loqlanib bo'lsa ham, Tottiga o'xshab so'nggi soniyalarda maydonga tushib bo'lsa ham, uchrashuv masalasini hal qilish uchun qaytadi. Chunki biz bir futbolchini o'zi butsasini mixga ilganini e'lon qilganini eshitmagunimizcha, futboldan ketdi, deb hisoblay olmaymiz!!! Uzr...
Orifjon Ibragimov, Ohangaron tumani
"Chempion" gazetasi
— deya xabar beradi uff.uz nashri.