Aziz futbol ishqibozlari, bilasiz, SPORTS.uz internet-portali yaqin vaqtdan buyon o'zbek futbolchilari faoliyatini ishqibozlarga yanada yaxshiroq tanishtirish uchun mo'ljallangan “Maydon markazida” loyihasini taqdim etib kelmoqda.
O'tgan gal Farg'onaning “Neftchi” jamoasi yarim himoyachisi Abbos Maxstaliev bilan suhbat uyushtirgan edik. Bu safar “Paxtakor” klubi a'zosi Jaloliddin Masharipov “Maydon markazida” loyihasi mehmoni bo'ldi. Mahoratli futbolchi suhbat davomida o'zining futbolga qanday kirib kelgani, aslida qo'shiqchi bo'lish orzusi bo'lgani, futboldan bo'sh paytdagi xobbilari va kelajak rejalari haqida gapirib berdi.
- Jaloliddin, “millionlar o'yini” bo'lmish futbolga kirib kelishingiz qanday sodir bo'lgan?
- Barcha qatori yoshlikdan mahallada do'stlarim bilan futbol o'ynashni yoqtirardim. Akamning ham “millionlar o'yini”ga qiziqishi juda katta. U bilan birgalikda ko'cha changitishni sevardik. So'ng maktabda o'qib yurgan kezlarimda jismoniy tarbiya o'qituvchimiz to'garak ochayotganini aytdi. Men o'ylab o'tirmay rozi bo'ldim va aynan o'sha palla mening futbolga tashlagan ilk qadamim bo'ldi, deya olaman.
- Uydagilaringiz futbolni tanlashingizga qarshi bo'lishmaganmi?
- Yo'q, aslo! Oilamdagilar hech ham mening qarorimga qarshi bo'lishmagan. Aytib o'tganimdek, akamning o'zi ham futbol o'ynab turardi. Shu sababli ota-onam ham qarorimni xurmat qilishgan.
- Futbolchi bo'lmaganigizda sizni qaysi kasb egasi sifatida ko'rishimiz mumkin bo'lardi… Nima deysiz?
- Kinoaktyor yoki ashulachi! Sababi san'atga oshufta insonman. Qo'shiqlar hirgoyi qilishni juda sevaman. Agar futbolchi bo'lmaganimda, o'zimni albatta san'atda sinab ko'rgan bo'lardim…
- Professional faoliyatingizni “Paxtakor”da boshlagansiz, bilamiz. Oliy Ligadagi birinchi golingizni qaysi jamoa darvozasiga urganingiz yodingizdami?
- Ha, albatta. Buni qanday unutib bo'ladi?! “Lokomotiv” jamoasiga qarshi kechgan bellashuvda 2:1 hisobida zafar quchgandik. O'sha bahsda jamoamning ikkinchi golini kiritgandim. Bu gol hech ham yodimdan chiqmaydi.
Davomi Sports.uz blogida.
— deya xabar beradi uff.uz nashri.