Assalomu alaykum, aziz futbol muxlislari! Mana bugun Borsakelmas qishlog'idagi markaziy «Chakalakzor» stadioni futbolchilarning qarindosh muxlislari bilan liq to'la. «Chang-TV» kanali sizlarga Borsakelmas chempionati eng qiziqarli o'yinining ikkinchi taymini namoyish etadi. Maydonda ikki buyuk jamoa — «Yantoqzor» va «Chorvador»…
Mana qarang, hozir «Yantoqzor» jamoasi keng front bo'ylab hujumga o'tmoqda! To'p bilan darvozabon Beshqulov… Zarba! Go-ooo-ooo-oooll!!! E, kechirasiz… To'p darvoza to'riga tashqi tomondan tegibdi… Ana,  Beshqulov o'z darvozasiga  qaytmoqda. Endi kim? Ha, endi «Chorvador» futbolchilari hujum uyushtirmoqda. Norg'ulov… U to'pni Shoshildievga oshirdi. Shoshildiev shoshqaloqlik bilan oldinga intilmoqda. Darvozaga qadar qirq olti yarim metrlar masofa bor, eh!
Shu erdan ursa bo'ladi!!! A-ha! U tepni to'pdi… Kechirasiz, to'pni tepdi! Ha-aaa-aaa! Shoshildiev tepgan to'p vertolyot singari havoga ko'tarildi. Birodarlar, negadir to'p erga tushmayapti. Bu — maydondagi o'yinchilar uchun ayni muddao bo'ldi. Ularning ba'zilari biroz mizg'ib olish uchun cho'zilishdi… «Yantoqzor» bosh murabbiyi esa paytdan foydalanib, oyoqda tik turgan uch nafar shogirdiga nimalarnidir uqtirmoqda, shekilli… Chamamda, u futbolchilarga, «xotirjam bo'linglar, baribir biru no'l bo'ladi», deyotgan bo'lsa kerak…
Ana, nihoyat, to'p maydonga qaytib tushdi, «Chorvador»ning hujumi. Boyshakarov. U Haqqievga pas berdi. Haqqiev o'ziga va faqat Zidanga ma'lum bo'lgan texnikasini ishga solib, to'pni orqasi bilan Mallaevga tashlab berdi. Mallaev! U ro'parasidan chiqqan bir, ikki, uch, to'rt… Sakkiz raqibini aldab o'tdi. Nima uchundir raqiblaridan biri unga qichqiryapti. Lekin Mallaev eshitmadi. U olg'a intilmoqda. Darvoza bo'sh… Udar!!! Goo-ooo-oooll! Mana buni haqiqiy shedevr desa bo'ladi!.. To'xtang, nimalar bo'layapti maydonda? Mallaev «Chorva» futbolchisi edi, chog'i… Negadir, uning  golini  «Yantoq»chilar nishonlamoqda! Ana, xolos! Mallaev raqib emas, o'z darvozasini ishg'ol qilibdi-ku! Nima bo'lgandayam, juda chiroyli gol va hisob biru no'l...
Davomi Tafsilot.Uz blogida.
— deya xabar beradi uff.uz nashri.