Avval xabar berganimizdek, joriy yilning 18-21 may kunlari Toshkent viloyatining Yuqorichirchiq tumanida joylashgan “Do'stlik” stadionida Regbi-15 bo'yicha Osiyo chempionatining ikkinchi divizion o'yinlari o'tkaziladi.
Mazkur musobaqada O'zbekiston, BAA, Tailand va Guam erkaklar terma jamoalari o'zaro kuch sinashadilar.
Osiyo chempionatining ikkinchi divizion o'yinlari Guam va Tailand terma jamoalari uchrashuvi bilan boshlanadi. Mazkur o'yinga soat 14:00da start beriladi. Shundan so'ng maydonga BAA va O'zbekiston terma jamoalari tushadilar. Ushbu uchrashuv 16:00da boshlanadi.
Mazkur uchrashuvlarda g'olib jamoalar 21 may kuni 1-2 o'rinlar uchun o'zaro bahs yuritishsa, mag'lub jamoalar 3-4 o'rinlar uchun kuch sinashadilar.
Musobaqada birinchi o'rinni egallagan terma jamoa birinchi divizionga yo'l olsa, 4-o'rinni band etgan jamoa uchinchi divizionga tushib ketadi.
Eslatib o'tamiz, 2015 yili o'tkazilgan uchinchi divizion o'yinlarida O'zbekiston erkaklar terma jamoasi birinchi o'rinni egallab, ikkinchi divizionda qatnashish xuquqini qo'lga kiritgan edi.
Ma'lumot uchun. Regbi bo'yicha Osiyo chempionati beshta diviziondan iborat.
Shavkat Jalilov
O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.