«Liverpul»ning  APLda qayd etgan natijasi jamoa muxlislarini sira  qoniqtirmagani aniq. Lekin «qizillar» EL finaliga chiqib, ichki musobaqadagi omadsizlik o'rnini to'ldirishdi qaysidir ma'noda, ya'ni ma'lum darajada o'zlarini oqlashdi. Xullas, Yurgen Klopp yangi ish joyida o'z g'oyalarini shogirdlariga singdirib, ijobiy o'zgarishlarni amalga oshirmoqda. «Liverpul»ning etakchi hujumchisi Daniel Starrij EL finali arafasida ana shu o'zgarishlar, jamoaning yangi mavsumdagi rejalari va germaniyalik mutaxassis bilan shaxsiy munosabatlari xususida intervyu berdi.
Daniel Starrij suhbat avvalidayoq «Liverpul» bilan Klopp davrida durustroq sovringa sazovor bo'lishdan umidvor ekanligini ta'kidlab, germaniyalik mutaxassis va futbolchilar o'rtasida hech qanday muammo yo'qligini bildirdi: «Bu erdagi barcha sharoitlardan mamnunman. Hech qachon biror narsa yoki kimdir haqida salbiy fikr aytgan emasman. Shunchaki, ko'pchilik g'iybat-ig'vo qilib, o'zgacha lazzatlanishga odatlangan. Ba'zan tarkibdan chetda qolayotganimni ko'rib, «Starrij qattiq xafa va o'ta norozi», deb o'ylashlari mumkin. Lekin aslida unday emas. Har kimning o'z vazifasi bor. Murabbiy muayyan uchrashuvga yaxshiroq tayyorgarlik ko'rgan futbolchilarni tanlab oladi. Shogirdning vazifasi esa bitta - maydonda ustozi ishonchini oqlash».
 - Jiddiy nazorat ostida ekanligimni yaxshi bilaman. 3 yildan buyon Liverpul havosidan bahra olyapman. Maydonga tushganimda, o'zimni baxtiyor his etaman. Ma'lum muddat jarohatlar tufayli safdan chetda yurdim, lekin aslo nolimayman. «Chelsi»dan keyin meni shunchalik kutib olishganiga, jamoaga taklif qilgan Brendan Rojersga rahmat!
 - Endi Yurgen Klopp bilan maroqli ishlayapman. Asosiysi, u meni o'yin amaliyoti bilan ta'minlayapti. Ha, iloji boricha ko'proq o'ynashni xohlardim, lekin boriga baraka. Demoqchimanki, sabr qilishni ham bilish kerak.
Starrij suhbat davomida Kloppga nisbatan qandaydir e'tiroz bildirolmasligini yana bir marta alohida ta'kidladi: «Hech qanday muammo yo'q, hattoki, ikir-chikirlarda ham. Tarkibni tanlash - uning vazifasi. Bu borada ranjishim noo'rin. Futbol - jamoaviy o'yin. Murabbiy boshqa o'yinchiga ishonch bildirsa na iloj? Lekin asosiy tarkibdan chetda qolish nafaqat men, balki barchaga yoqmasligi turgan gap. Maydonga tushdingmi, ishonchni oqlashga harakat qilishing shart. Boshqa gaplar esa befoyda».
 - Shaxsan men o'z imkoniyatlarimga to'liq ishonaman. Maydonda harakatlanayotganimda, tinmay golli vaziyatlar yaratishga urinaman. O'zim darvozani ishg'ol qilolmagan taqdirda raqib ko'ngliga g'ulg'ula solish orqali jamoadoshlarimga yordam beraman. Avvallari Luis Suares bilan raqobatlashardim. Mana, u «Barselona»da gollar «konveyri»ni yo'lga qo'ydi. Yana bir jamoadoshim Rahim Sterling ham nomdorroq jamoaga o'tib ketdi. Demak, «Liverpul»  yangi futbolchilar xarid qilish orqali tarkibini kuchaytirishi lozim. Qaytaraman, har qanday holatda, kim kelishidan qat'iy nazar, maydonda nimaga qodirligimni yaxshi bilaman.
26 yoshli Starrij «Enfild»dagi dastlabki sovrinini intiqlik bilan kutmoqda:  «Umid qilamanki, yangi mavsum qandaydir o'ziga xos o'zgarishlarni taqdim etadi. Ochig'i, chempionlik unvonisiz yurishdan zerikdim. Misol uchun, Liga kubogi finalidan keyin ko'z yoshlarimni tiyolmadim. Mag'lubiyatga uchraganimiz tufayli emas, o'ta muhim imkoniyatni qo'ldan boy berganimiz uchun. Zero, biz yangi davrni boshlamoqchi edik, lekin omadimiz chopmadi. Bu achchiq saboq bo'lishi kerak».
Hujumchi shuningdek, jarohatlar davri ortda qolganiga astoydil ishonmoqda: «Safga qaytganimga bir necha oy bo'ldi. Shu davr ichida bir kun ham dam olmadim. Mashg'ulotlarga qatnashdim, jismoniy holatimni yaxshilash uchun o'z ustimda jiddiy ishladim. Bu bilan kimdadir shafqat hissini uyg'otmoqchi emasman - bizga mehnatimiz uchun haq to'lashadi. Boz ustiga, men aynan shuni orzu qilganman».
Davomi Akmal Eshonxonov blogida.
— deya xabar beradi uff.uz nashri.