Mamlakatimizda mehmon bo'lib turgan Osiyo suzish federatsiyasi (AASF) Bosh direktori Taxa Al-Kishri bugun kunning birinchi yarmida O'zbekiston suzish federatsiyasi rahbari, senator Quvondiq Sanakulov hamroxligida O'zbekiston Milliy olimpiya qo'mitasiga tashrif buyurdi.
Osiyo suzish federatsiyasi Bosh direktori dastavval qo'mita muzeyida bo'lib, bu er o'rnatilgan turli eksponatlar, kubok hamda medallarni ko'zdan kechirdi.
Shundan so'ng mehmon O'zbekiston Milliy olimpiya qo'mitasi xuzuridagi Respublika sport tibbiyoti ilmiy amaliy markazida bo'lib, markaz faoliyati bilan yaqindan tanishdi.
“Menda O'zbekiston Milliy olimpiya qo'mitasining yangi binosi hamda qo'mita qoshida faoliyat ko'rsatayotgan Respublika sport tibbiyoti ilmiy amaliy markazi katta qiziqish uyg'otdi, - dedi Taxa Al-Kishri. Bu erda eng so'nggi rusumdagi tibbiy uskunalar o'rnatilgan bo'lib, barcha zarur shart-sharoitlar muhayyo etilgan. Bu ham o'z navbatida O'zbekistonda Olimpiya harakatiga qay darajada ahamiyat qaratilishidan dalolat beradi”.
Madaniyat va sport ishlari vazirining birinchi o'rinbosari Murod Aliev, Milliy olimpiya qo'mitasi bosh kotibi Oybek Kasimov hamda O'zbekiston suzish federatsiyasi rahbariyati bilan bo'lib o'tgan muzokaralar chog'ida Osiyo suzish federatsiyasi Bosh direktori avvalo taklif uchun o'z minnatdorchiligini bildirdi va mana shunday uchrashuvlar o'zaro hamkorlik rishtalarini yanada keng quloch yozishiga xizmat qilajagini ta'kidlab o'tdi.
“Men O'zbekistonga birinchi bor tashrif buyurdim. Tinch va osoyishta yurtingiz, mehmondo'st o'zbek xalqi, go'zal va tarixiy shaharlaringiz haqida ko'p eshitganman. Yurtingizga tashrif buyurib, jannatmakon o'lkaning odamlari, tobora chiroy ochib borayotgan Toshkent shahri, bu erda barpo etilayotgan biri-biridan shinam binolar, keng va ravon ko'chalar mening xayratimni yanada oshirdi. Shu bilan birga O'zbekistonda sport sohasini taraqqiy ettirish borasida amalga oshirilayotgan ishlar har qancha taxsinga sazovor ekanligini mamnuniyat bilan ta'kidlab o'tmoqchiman. Bevosita yurtingizga qilgan tashrifimdan ko'zlangan asosiy maqsadga kelsak, birinchi navbatda O'zbekiston suzish federatsiyasi bilan o'zaro hamkorlik rishtalarini yangi bosqichga olib chiqishni maqsad qilganmiz. Tashrif davomida Toshkent hamda Samarqand shaharlarida qad rostlagan suv sporti inshoatlarini bevosita kuzatishni rejalashtirganmiz. Shuni ishonch bilan aytamanki, O'zbekistonga qilgan tashrifim hayotimda yorqin sahifa bo'lib muxrlanadi”, dedi Taxa Al-Kishri.
O'z navbatida Madaniyat va sport ishlari vazirining birinchi o'rinbosari Murod Aliev hamda Milliy olimpiya qo'mitasi bosh kotibi Oybek Kasimov O'zbekistonda jismoniy tarbiya va sportga, xususan, bolalar sportini rivojlantirishga Davlatimiz hamda xukumatimiz rahbariyati tomonidan qaratilayotgan alohida e'tibor, yaratilayotgan shart-sharoitlar, yurtimizda uch bosqichli tizim asosida o'tkaziladigan “Umid nihollari”, “Barkamol avlod” va Universiada o'yinlari haqida atroflicha ma'lumot berdilar.
Tashrif so'ngida mehmonlarga O'zbekiston Milliy olimpiya qo'mitasi hamda Respublika suzish federatsiyasining esdalik sovg'alari topshirildi.
Osiyo suzish federatsiyasi Bosh direktori Taxa Al-Kishri boshchiligidagi delegatsiya bugun kunning ikkinchi yarmida poytaxtimizda faoliyat ko'rsatayotgan suzish havzalarida bo'lib, bu erda yaratilgan sharoitlar bilan yaqindan tanishadilar.
19-20 may kunlari esa mehmonlar qadim va hamisha navqiron Samarqand shahrida bo'lib, bu erda barpo etilgan suv sporti inshoatlarini ko'zdan kechiradilar.
Shavkat Jalilov
O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.